Na o Dumelela Moya o Mokgethwa Gore o go Hlahle?
Na o Dumelela Moya o Mokgethwa Gore o go Hlahle?
“Moya wa gago o lokile; anke o ntlhahle nageng ya go loka.”—PS. 143:10.
1, 2. (a) Bolela maemo a mangwe moo Jehofa a ilego a diriša moya o mokgethwa go thuša bahlanka ba gagwe. (b) Na moya o mokgethwa o šoma mabakeng a kgethegilego feela? Hlalosa.
GO NAGANA ka go šoma ga moya o mokgethwa go go gopotša’ng? Na go go gopotša ditiro tše matla tša Gideone le Simisone? (Baa. 6:33, 34; 15:14, 15) Mohlomongwe o nagana ka go ba sebete ga Bakriste ba pele goba go ikhomolela ga Stefano ge a be a eme pele ga Sanhedrine. (Dit. 4:31; 6:15) Mehleng ya rena, go thwe’ng ka lethabo leo le phophomago dikopanong tša ditšhabatšhaba, go botega ga bana babo rena bao ba golegilwego ka baka la boemagare le kgolo e makatšago ya modiro wa boboledi? Mehlala ye ka moka e hlatsela gore moya o mokgethwa o a šoma.
2 Na moya o mokgethwa o šoma mabakeng a kgethegilego feela goba maemong ao a sa tlwaelegago? Aowa. Lentšu la Modimo le bolela gore Bakriste ba “sepela ka moya,” ba “išwa ke moya” e bile ba “phela ka moya.” (Bagal. 5:16, 18, 25) Dipolelwana tše di bontšha gore moya o mokgethwa o ka tšwela pele o tutuetša maphelo a rena. Re swanetše go lopa Jehofa letšatši le letšatši gore a diriše moya wa gagwe go hlahla seo re se naganago, seo re se bolelago le seo re se dirago. (Bala Psalme 143:10.) Ge re dutše re dumelela moya wo gore o šome ka bolokologi maphelong a rena, o tla dira gore re be le dika tšeo di lapološago ba bangwe le go tumiša Modimo.
3. (a) Ke ka baka la’ng re swanetše go hlahlwa ke moya o mokgethwa? (b) Re tla hlahloba dipotšišo dife?
3 Ke ka baka la’ng go le bohlokwa gore re hlahlwe ke moya o mokgethwa? Ka gobane go na le matla a mangwe ao a nyakago go re tutuetša, matla ao a ganetšanago le go šoma ga moya o mokgethwa. Mangwalo a re matla ao ke “nama,” e lego tshekamelo ya sebe ya nama ya rena e sa phethagalago, bohwa bja go se phethagale bjo re bo hweditšego go Adama bjalo ka ditlogolo tša gagwe. (Bala Bagalatia 5:17.) Ka gona, go dumelela moya wa Modimo gore o re hlahle go akaretša’ng? Na go na le megato yeo re ka e gatago gore re lwe le dikgoketšo tša nama ya rena ya sebe? Anke re hlahlobeng dipotšišo tše ge re dutše re ahlaahla dika tše di šetšego tše tshelelago “tšeo di enywago ke moya,” e lego “go se fele pelo, botho, toko, tumelo, boleta le boitshwaro.”—Bagal. 5:22, 23.
Boleta le go se Fele Pelo di Godiša Khutšo ka Phuthegong
4. Boleta le go se fele pelo di tlaleletša bjang khutšong ya phuthego?
4 Bala Bakolose 3:12, 13. Ka phuthegong, boleta le go se fele pelo ke monwana le lenala gore go be le khutšo. Dika tše tšeo di enywago ke moya di re thuša go swara ba bangwe ka botho, go dula re theošitše maswafo ge re hlohlwa le go phema go itefeletša ge ba bangwe ba bolela goba ba dira dilo tšeo di sego botho. Ge e ba re na le dikgohlano le Mokristegotee le rena, go se fele pelo go tla re thuša gore re se ke ra ngalela ngwanabo rena goba kgaetšedi eupša go tla re thuša go rarolla bothata. Na ruri boleta le go se fele pelo di a nyakega ka phuthegong? Ee, ka gobane ka moka ga rena ga se ra phethagala.
5. Paulo le Baranaba ba diragaletšwe ke’ng, gona se se gatelela’ng?
5 Ela hloko seo se diragaletšego Paulo le Baranaba. Ba feditše nywaga e mentši ba šoma mmogo go phatlalatša ditaba tše dibotse. Bobedi bja bona ba be ba na le dika tše dibotse. Lega go le bjalo, ka letšatši le lengwe, ba ile ba tsoša “ngangišano e bogale, moo ba ilego ba arogana.” (Dit. 15:36-39) Tiragalo ye e gatelela gore gaešita le bahlanka ba Modimo bao ba ineetšego, ba tla fela ba eba le dikgohlano. Ge e ba Mokriste a sa kwešišane le modumedigotee le yena, o swanetše go dira’ng gore a se ke a hlafiša boemo moo ba ka feleletšago ba sentše tswalano ya bona?
6, 7. (a) Re ka latela keletšo efe ya Mangwalo pele poledišano le modumedigotee le rena e ka hlafa? (b) Go ‘akgofela go kwa, go diega go bolela le go diega go galefa’ go hola ka’ng?
6 Go etša ge go bontšhwa ke mantšu a rego “ngangišano e bogale,” kgohlano ya Paulo le Baranaba e ile ya fo tsoga ka nako yeo gomme ya gakala. Ge e ba Mokriste a lemoga gore o thoma go galefa ge a boledišana le modumedigotee le yena ka taba e itšego, o tla ba a le bohlale ge a ka kwa keletšo e hwetšwago go Jakobo 1:19, 20, e rego: “Motho yo mongwe le yo mongwe a akgofele go kwa, a diege go bolela a be a diege go galefa; gobane kgalefo ya motho ga e tšweletše toko ya Modimo.” Go ithekgile ka maemo, a ka leka go fetoša taba, a fega poledišano mogwapa goba a kgopela go tloga pele poledišano e ka hlafa.—Die. 12:16; 17:14; 29:11.
7 Go latela keletšo ye go hola ka’ng? Mokriste o dumelela moya wa Modimo o mo hlahla ge a ipha nako ya go phohlela, a rapela ka taba yeo le go hwetša tsela e kaone ya go araba. (Die. 15:1, 28) Moya woo o ka mo tutueletša gore a bontšhe boleta le go se fele pelo. Ka go re’alo o tla kgona go kwa keletšo e hwetšwago go Baefeso 4:26, 29, e rego: “Ge le galefile, le se ke la dira sebe . . . Anke polelo e bodilego e se ke ya tšwa melomong ya lena, eupša go tšwe feela polelo e botse ya go aga moo go nyakegago, gore e fetišetše se se holago bao ba kwago.” Ee, ge re apara boleta le go se fele pelo, re tsenya letsogo khutšong le boteeng bja phuthego.
Lapološa Lapa la Gago ka Botho le Toko
8, 9. Botho le toko ke’ng, gona di ka kgoma bjang bophelo bja lapa?
8 Bala Baefeso 4:31, 32; 5:8, 9. Botho le toko di lapološa go swana le go hlabja ke phefšana le go nwa senwamaphodi phišong ya letšatši. Di tlaleletša lethabong la ka lapeng. Botho ke seka se se rategago seo re se bontšhago ka baka la go tshwenyega ka ba bangwe, go tshwenyega moo re go bontšhago ka go thuša ba bangwe le ka go bolela le bona ka go ba naganela. Toko, go swana le botho, ke seka se sebotse seo se bontšhwago ka mediro yeo e holago ba bangwe. E bonala ka go ba le seatla se se bulegilego. (Dit. 9:36, 39; 16:14, 15) Eupša toko e akaretša se se fetago seo.
9 Toko ke boemo bjo bo phagamego bja boitshwaro. Ga e akaretše feela seo re se dirago, eupša sa bohlokwa kudu e akaretša seo re lego sona. Akanya ka mosadi yo a direlago lapa la gagwe salate ya dienywa, o hlahloba seenywa seo a se swerego ge a dutše a se ripaganya go kgonthišetša gore se bose e bile se budule gabotse, ga se sa bola ka ntle goba ka gare. Ka mo go swanago, toko yeo e tšweletšwago ke moya o mokgethwa e kgoma bophelo ka moka bja Mokriste.
10. Go ka dirwa’ng go thuša ditho tša lapa go hlagolela dika tšeo di enywago ke moya?
10 Ka lapeng la Bakriste, ke’ng seo se ka thušago ditho tša lapa gore di swarane ka botho le ka toko? Tsebo e nepagetšego ya Lentšu la Modimo e kgatha tema e bohlokwa. (Bakol. 3:9, 10) Dihlogo tše dingwe tša malapa di dira gore go ithutwe ka dika tšeo di enywago ke moya mantšiboeng a Borapedi bja Lapa a beke le beke. Ga go thata go rulaganya gore go ithutwe ka dika tšeo. Kgethang taba yeo e bolelago ka seka se sengwe le se sengwe seo se enywago ke moya le diriša dikgatišo tša go dira nyakišišo tšeo di lego gona ka leleme la gabo lena. Le ka fetša dibeke tše itšego le hlahloba seka se sengwe le se sengwe, le ahlaahla dirapa tše mmalwa feela ka beke. Ge le dutše le ithuta ka taba yeo, balang le go ahlaahla mangwalo ao a bontšhitšwego. Tsomang ditsela tša go diriša seo le ithutago sona gomme le rapele Jehofa gore a šegofatše maiteko a lena. (1 Tim. 4:15; 1 Joh. 5:14, 15) Na ruri mokgwa o bjalo wa go ithuta o ka fetoša tsela yeo ditho tša lapa di swaranago ka yona?
11, 12. Dihlopha tše pedi tša banyalani ba Bakriste di ile tša holwa bjang ke go ithuta ka botho?
11 Banyalani ba bafsa bao ba nyakago go atlegiša lenyalo la bona ba ile ba kgetha go ithuta ka mo go tseneletšego ka dika tšeo di enywago ke moya. Se se ile sa ba hola bjang? Mosadi o re: “Go ithuta gore botho bo akaretša go botega go dirile phetogo e kgolo tseleng yeo re swaranago ka yona go fihla le lehono. Se se re rutile gore re fetofetoge le maemo gaešita le go lebalelana. E bile se re thušitše go ithuta go bolela mantšu a rego ‘ke a leboga’ le gore ‘ke kgopela tshwarelo’ ge go nyakega.”
12 Banyalani ba bangwe ba Bakriste bao ba bego ba na le mathata a lenyalo, ba ile ba lemoga gore botho bo be bo se gona tswalanong ya bona. Ba ile ba phetha ka gore ba ithute ka botho ba le gotee. Se se ile sa feleletša ka’ng? Monna o gopola gore: “Go ithuta ka botho go re thušitše go lemoga bohlokwa bja go kwešišana go e na le go naganelana dilo tše mpe e lego go nyakana diphošo. Yo mongwe le yo mongwe wa rena o ile a thoma go kgahlegela dinyakwa tša yo mongwe. Go ba botho go akaretša go dumelela mosadi wa ka go ntšha sa mafahleng ka bolokologi ntle le gore ke kgopišwe ke seo a se bolelago. Go be go bolela gore ke swanetše go tlogela go ikgantšha. Ge re be re thoma go ba ba botho lenyalong la rena, re ile ra thoma go fokotša mokgwa wa go iphahlelela. Ruri se se ile sa re imolla.” Na lapa la gago le ka holwa ke go ithuta ka dika tšeo di enywago ke moya?
Bontšha Tumelo ge o le ka Sephiring
13. Re swanetše go itiša kotsing efe ya bomoya bja rena?
13 Bakriste ba swanetše go dumelela moya wa Modimo gore o ba hlahle ge ba le gare ga batho le ge ba le ka sephiring. Diswantšho tše di gobogilego le boithabišo bjo bo šilafetšego di atile kudu lefaseng la Sathane lehono. Se se bea bomoya bja rena kotsing. Mokriste o swanetše go dira’ng? Lentšu la Modimo le re eletša ka gore: “Lahlang ditšhila ka moka le bobe bjo bo iphilego matla gomme le amogele ka boleta go bjalwa ga lentšu leo le kgonago go phološa meoya ya lena.” (Jak. 1:21) Anke re hlahlobeng kamoo tumelo, seka se sengwe seo se enywago ke moya, e ka re thušago ka gona gore re dule re hlwekile pele ga Jehofa.
14. Ke bjang go se be le tumelo go ka dirago gore re wele boitshwarong bjo bo fošagetšego?
14 Ge e le gabotse, tumelo e bolela gore re tšea Jehofa Modimo e le wa kgonthe go rena. Ge e ba Modimo e se wa kgonthe go rena, go ka ba bonolo go wela boitshwarong bjo bo fošagetšego. Ela hloko seo se ilego sa direga go batho ba Modimo mehleng ya bogologolo. Jehofa o ile a utollela moporofeta Hesekiele gore dilo tše di šišimišago di be di dirwa ka sephiring, a re: “Morwa wa motho, na o bone tšeo bagolo ba ntlo ya Isiraele ba di dirago leswiswing, tšeo yo mongwe le yo mongwe wa bona a di dirago diphapošing tša ka gare tša diswantšho tša bona tše di betlilwego? Gobane ba re: ‘Jehofa ga a re bone. Jehofa o tlogetše naga ye.’” (Hesek. 8:12) Na o lemogile gore bothata bo be bo bakwa ke’ng? Ba be ba sa dumele gore Jehofa o be a lemoga seo ba se dirago. Jehofa e be e se wa kgonthe go bona.
15. Go ba le tumelo e tiilego go Jehofa go re šireletša bjang?
15 Go fapana le seo, ela hloko mohlala wa Josefa. Gaešita le ge Josefa a be a le kgole le lapa labo le batho ba gabo, o ile a gana go dira bohlotlolo le mosadi wa Potifara. Ka baka la’ng? O itše: “Nka dira bjang bobe bjo bjo bogolo gakaakaa gomme ka direla Modimo sebe?” (Gen. 39:7-9) Ee, Jehofa e be e le wa kgonthe go yena. Ge e ba Modimo e le wa kgonthe go rena, re ka se bogele boithabišo bjo bo šilafetšego goba ra dira selo se sengwe ka sephiring seo re tsebago gore se nyamiša Modimo. Boikemišetšo bja rena bo tla swana le bja mopsalme yo a opetšego ka gore: “Ke tla itshepelela ka ntlong ya ka ka pelo e botegago. Selo le ge e le sefe seo se se nago mohola nka se se bee pele ga mahlo a ka.”—Ps. 101:2, 3.
Šireletša Pelo ya Gago ka go ba le Boitshwaro
16, 17. (a) Go etša ge go hlalositšwe pukung ya Diema, ke bjang “lesogana leo le nago le pelo ya bošilo” le ka tanywago ke sebe? (b) Go etša ge go bontšhitšwe go letlakala 26, ke bjang selo sa mohuta wo se ka diregago lehono, go sa šetšwe gore motho ke yo mokaakang ka bogolo?
16 Boitshwaro, seka sa mafelelo sa tšeo di enywago ke moya, bo re thuša go gana dilo tšeo Modimo a di hloilego. Bo ka re thuša go šireletša dipelo tša rena. (Die. 4:23) Ela hloko tiragalo e hwetšwago go Diema 7:6-23, yeo e hlalosago kamoo “lesogana leo le nago le pelo ya bošilo” le ineelago dikgoketšong tša mogweba-ka-mmele. Le a tanywa ka morago ga go “sepela mokgotheng kgauswi le sekhutlo sa ntlo ya mosadi.” Mohlomongwe le be le itshepelela motseng wa gabo mosadi yoo ka baka la go rata go bona. Kapejana, le palelwa ke go lemoga gore le wela tseleng ya bošilo yeo e ‘kgomago bophelo bja lona.’
17 Lesogana le le be le ka phema bjang go dira phošo ye ya go šiiša gakaakaa? Ka go latela keletšo e rego: “O se ke wa fapogela ditseleng tša gagwe.” (Die. 7:25) Go na le seo re ka ithutago sona mo, gore: Ge e ba re nyaka go hlahlwa ke moya wa Modimo, re swanetše go phema go ipea tekong. Tsela e nngwe yeo motho a ka fapogelago tseleng ya bošilo ya “lesogana leo le nago le pelo ya bošilo” ke ka go fetofetoša mananeo a thelebišene a sa tsebe seo a se nyakago goba ka go fetleka Inthanete. Go sa šetšwe gore o dira seo ka boomo goba go se bjalo, a ka ba a wela dilong tšeo di tsošago kganyogo ya botona le botshadi. Ganyenyaneganyenyane a ka ba a wela mokgweng o sa hlwekago wa go bogela diswantšho tše di kgothaletšago bootswa, e lego seo se tla feleletšago se bolaile letswalo la gagwe le go senya tswalano ya gagwe le Modimo. Se se ka kgoma bophelo bja gagwe.—Bala Baroma 8:5-8.
18. Mokriste a ka dira’ng go šireletša pelo ya gagwe, gona dilo tšeo di akaretša bjang go ba le boitshwaro?
18 Ke therešo gore re ka kgona e bile re swanetše go ba le boitshwaro ka go gata megato ka pela ge e ba go tšwelela seswantšho se se goketšago. Ruri go kaone gore re pheme boemo bjoo bo sa tšwelela! (Die. 22:3) Go ipeela mellwane e swanetšego le go e kgomarela go akaretša go ba le boitshwaro. Ka mohlala, go bea khomphutha moo e bonwago ke bohle go ka re šireletša. Ba bangwe ba hwetša go le kaone go diriša khomphutha goba go bogela thelebišene ge feela go na le ba bangwe kgauswi. Ba bangwe ba ile ba phetha ka gore ba se be le Inthanete ka mo go feletšego. (Bala Mateo 5:27-30.) Eka re ka dira sohle seo se nyakegago gore re itšhireletše gotee le malapa a rena e le gore re ka hlankela Jehofa ka ‘pelo e hlwekilego le ka letswalo le lebotse le ka tumelo e se nago boikaketši.’—1 Tim. 1:5.
19. Go dumelela moya o mokgethwa o re hlahla go na le mehola efe?
19 Dika tšeo di tšweletšwago ke go šoma ga moya o mokgethwa di na le mehola e mentši. Boleta le go se fele pelo di kgatha tema khutšong ya phuthego. Botho le toko di dira gore go be le lethabo ka lapeng. Tumelo le boitshwaro di re thuša go dula re le kgauswi le Jehofa e bile re hlwekile pele ga gagwe. Go feta moo, Bagalatia 6:8 e re kgonthišetša gore: “Yo a bjalago moyeng o tla buna bophelo bjo bo sa felego moyeng.” Ee, motheong wa sehlabelo sa Kriste, Jehofa o tla diriša moya o mokgethwa go fetišetša bophelo bjo bo sa felego go bao ba dumelelago moya o mokgethwa go ba hlahla.
O be o tla Araba Bjang?
• Boleta le go se fele pelo di godiša bjang khutšo ka phuthegong?
• Ke’ng seo se ka thušago Bakriste go bontšha botho le toko ka lapeng?
• Tumelo le boitshwaro di thuša Mokriste bjang go šireletša pelo ya gagwe?
[Dipotšišo tša Thuto]
[Seswantšho go letlakala 24]
O ka phema bjang gore poledišano e se ke ya hlafa?
[Seswantšho go letlakala 25]
Go ithuta ka dika tšeo di enywago ke moya go ka hola lapa la gago
[Seswantšho go letlakala 26]
Re phema dikotsi dife ka go ba le tumelo le boitshwaro?