Ke Kin Mweidohng Sapwellimen Koht Manaman en Kahluwa Iuk?

“Komw ketin kupwur mwahu ong ie, oh kahluwa ie nan ahl me pwung.”—MEL. 143:10.

1, 2. (a) Kihda ekei irair kan me Siohwa ketin doadoahngki sapwellime manaman ong sapwellime aramas akan. (b) Sapwellimen Koht manaman kin doadoahkte ahnsou kesempwal tohrohr kan? Menlau kawehwehda.

DAHME ke kin tamanda ni omw kin medewe duwen doadoahk en sapwellimen Koht manaman? Ke kin medewehla duwen ahn Kidion oh Samson ara kin kehlail? (Sounkopwung 6:33, 34; 15:14, 15) Mwein ke kin medewe duwen tepin Kristian akan ar eimah de Stipen eh meleilei ni eh kesihnenda nan Mwoalen Kopwung Lapalapo. (Wiewia 4:31; 6:15) Ia duwen nan atail ahnsou, ke kin medewe duwen peren laud me kin mi nan kapokon kan, lelepek en riatail kan me kin selidi nan imweteng pwehki arail kin soupoupali, oh pil kekeirda laud en doadoahk en kalohk? Karasepe pwukat koaros kin kadehdehda doadoahk en sapwellimen Koht manaman.

² Ia duwe, sapwellimen Koht manaman kin doadoahkte ahnsou kesempwal tohrohr kan? Soh. Mahsen en Koht mahsanih duwen Kristian akan en weweidki oh momourki sapwellimen Koht manaman oh pil mweidohng manamano en kahluwa irail. (Kal. 5:16, 18, 25) Met kin kasalehda me sapwellimen Koht manaman kak ahnsou koaros kamwakid atail mour. Ehuehu rahn, kitail anahne peki rehn Siohwa en ketin kaweidki atail madamadau, lokaia oh wiewia kan sapwellime manaman. (Wadek Melkahka 143:10.) Ni atail kin mweidohng manamano en doadoahk nan atail mour, kitail pahn kapwarehda wa me kin kansenamwahwih meteikan oh me kin kihong Siohwa kaping.

3. (a) Dahme kahrehda kitail anahne mweidohng sapwellimen Koht manaman en kahluwa kitail? (b) Peidek dah kan me kitail pahn tehkpene?

³ Dahme kahrehda e kesempwal kitail en mweidohng sapwellimen Koht manaman en kahluwa kitail? Pwehki mie manaman tohrohr ehu me kin kaunda kitail oh e kin uhwong doadoahk en sapwellimen Koht manaman. Paipel kahdaneki manaman wet “ahnepen aramas” me pid ineng suwed en paliwaratail me iei soh unsek me kitail kin sohsohki nin duwen kadaudoken Adam. (Wadek Kalesia 5:17.) Eri, dahme kin pidada atail mweidohng sapwellimen Koht manaman en kahluwa kitail? Mie kahk mwahu kan me kitail kak doadoahngki pwe kitail en powehdi atail ineng suwed? Kitail pahn tehkpene peidek pwukat ni atail koasoiapene duwen irair weneu en kisehn “wahn sapwellimen Koht manaman” me iei “kanengamah, kadek, kamwahu, pwoson, opampap, kaunda pein kitail.”—Kal. 5:22, 23, NW.

Opampap oh Kanengamah Kin Kapwarehda Popohl nan Mwomwohdiso

4. Ia duwen opampap oh kanengamah ar kin sewese mwomwohdiso en ahneki popohl?

⁴ Wadek Kolose 3:12, 13. Opampap oh kanengamah kin doadoahkpene pwehn wiahda popohl nan mwomwohdiso. Irair pwukat kin sewese kitail pwe kitail en kadek ong meteikan, meleilei ni ahnsou me aramas kin kalingeringerehda kitail oh dehr dupukohng meteikan me kin ndaiong de wiahiong kitail mehkot suwed. Ma kitail ahneki kahpwal ehu rehn emen iengetail Kristian, kanengamah pahn sawas  pwe kitail en dehr pwangahkihda riatail men ahpw wia dahme kitail kak wia pwe kitail en kamwahwihala atail nanpwung suwed. Ia duwe, opampap oh kanengamah kin uhdahn anahn nan mwomwohdiso? Ei, pwehki kitail koaros me soh unsek.

5. Dahme wiawi nanpwungen Pohl oh Parnapas? Dahme met kin kasalehda?

⁵ Nna medewehla dahme wiawi nanpwungen Pohl oh Parnapas. Ira doadoahkpene sounpar kei ong kekeirdahn rongamwahu. Ira koaros ahneki irair mwahu kan. Ahpw ehu ahnsou, ira ‘akamaida nanpwungara, oh tohrohrpeseng.’ (Wiewia 15:36-39) Met kasalehda me ekei pak, sapwellimen Koht ladu poadidi kan pil sohte kak pwungkipene mehkot nanpwungarail. Ma mie sawehwe nanpwungen Kristian riemen, dahme emen kak wia pwe en irehdi irairo en susuwedla lao lel akamai me kak kauwehla nanpwungara?

6, 7. (a) Mehnia kaweid en Paipel me kitail kak idawehn mwohn atail koasoi rehn iengetail pwoson men eh wiahla akamai? (b) Ia kamwahu kan “en nan kapehd mwadang ong rong, ahpw dehr nan kapehd karuaru en lokaia oh lingeringer”?

⁶ Ni Paipel eh mahsanih me Pohl oh Parnapas ‘akamaida,’ ara kahpwalo wiawi ni soh kasikpe oh e inenen laud. Ma Kristian men pehmada me e lingeringerda ni eh koasoakoasoia ire kan rehn ienge pwoson men, e pahn loalokong en idawehn kaweid nan Seims 1:19, 20 me mahsanih: “Emenemen kumwail koaros en nan kapehd mwadang ong rong, ahpw dehr nan kapehd karuaru en lokaia oh lingeringer; pwehki lingeringer en aramas sohte kin sewese kapwaiada sapwellimen Koht kupwur pwung.” Ele e pahn song en wekidala audepen koasoio, kauhdi koasoio, de kohkohlahsang wasao mwohn koasoio eh pahn wiahla akamai.—Lep. Pad. 12:16; 17:14; 29:11.

⁷ Ia kamwahu kan en idawehn kaweid wet? Sang ni eh kin doadoahngki ahnsou en meleileidi, kapakapki ireo, oh medemedewe ia duwen eh pahn sapeng, Kristian men kin mweidohng sapwellimen Koht manaman en kaweid ih. (Lep. Pad. 15:1, 28) Pwehki eh mweidohng manamano en kaweid ih, e kak kasalehda opampap oh kanengamah. Eri, e kin kaunopada en kapwaiada kaweid nan Episos 4:26, 29 me mahsanih: “Ma kumwail pil lingeringer, kumwail dehr mweidohng amwail lingeringer en kahrehiong kumwail nan dihp; . . . Dehr wia koasoi me pahn kamadakahla emen. Kumwail doadoahngkihte mahsen mwahu, soangen mahsen me kin sewese oh kakairada dahme anahnepe mie, oh kin kamwahwihala me kin rong kumwail kan.” Mehlel, ni atail kin opampap oh kanengamah, kitail kin sewese mwomwohdiso en popohl oh miniminpene.

Kansenamwahwiheki Omw Peneinei Kadek oh Kamwahu

8, 9. Dahkot kadek oh kamwahu? Dahme irair pwukat kin wiahiong peneinei kan?

⁸ Wadek Episos 4:31, 32; 5:8, 9. Kadek oh kamwahu kin kansenamwahwih kitail duwehte  ahnsoun engitik oh pihl lemwulemwur nan ahnsoun karakar. Irair pwukat kin kansenamwahwih tohnpeneinei. Kadek iei irair kaselel ehu me kin kohsang emen ni eh kin nsenohki mehlel meteikan. Met sansalda sang ni eh kin sawas oh lokaia kadek. Kamwahu iei irair mwahu ehu duwehte kadek. Met kin kasalehda wiewia kan me meteikan kin paiekihda. E kin wia kilelepen sapan. (Wiewia 9:36, 39; 16:14, 15) Ahpw kamwahu kin pidada laud sang met.

⁹ Kamwahu iei irair ehu me inenen kaselel. Met sohte kin pidadahte dahme kitail kin wia ahpw, kesempwal sang met, e kin pidada soangen aramas dahmen kitail. Met rasehng wahn tuhke ehu me pwon uhdahn mem oh sohte ohla kis loale oh liki. Duwehte, kamwahu me sapwellimen Koht manaman kin kapwarehda kin sansalda nan en Kristian men eh elen mour pwon.

10. Dahme kak wiawi pwehn sewese tohnpeneinei kan ren kakairada wahn sapwellimen Koht manaman?

¹⁰ Nan peneinei Kristian ehu, dahme kak sewese tohnpeneinei kan ren kadekpene oh kamwahupene? Loalokong pwung en Mahsen en Koht kin kesempwal pwe ren kasalehda irair pwukat. (Kol. 3:9, 10) Ekei tapwin peneinei kin kapatahiong nan arail Kaudok en Peneinei ehuehu wihk ire kan me pid wahn sapwellimen Koht manaman. Onopki duwen wahn manamano sohte kin apwal. Kumwail kak doadoahngki pwuhken sawaspen Paipel kan oh pilada ehu irair me wia kisehn wahn manamano. Kumwail kak medemedewe ekeite parakrap kan nan ehuehu wihk, oh doadoahngki erein wihk kei en koasoiapene duwen ehuehu irair. Ni amwail kin onop, wadek oh koasoiapene iren Paipel kan me kileldi nan parakrap kan. Kumwail rapahki ahl en doadoahngki dahme kumwail sukuhlki oh kapakapohng Siohwa en ketin kapaiada amwail nannanti. (1 Tim. 4:15; 1 Sohn 5:14, 15) Ia duwe, soangen onop wet kin uhdahn kahrehiong tohnpeneinei kan ren wekidala arail wiewia ong emenemen?

11, 12. Ia duwen pwopwoud riau ar paiekihda arail kin onopki duwen irair en kadek?

¹¹ Pwopwoud pwulopwul ehu me men ara pwopwoud en pweida pilada ira en onopki duwen wahn sapwellimen Koht manaman. Ia duwen ara paiekihda met? Liho nda: “At sukuhlki laud duwen limpoak-kadek kin sewese kiht sen wekidala mwomwen at wiewia ong emenemen leledo rahnwet. E padahkihong kiht sen kin uhpahpene oh pil mahkpene. E pil sewese kiht sen sukuhlki at pahn kin nda ‘kalahngan’ oh ‘kupwurmahk’ ni ahnsou me konehng.”

¹² Pil ehu pwopwoud me ahneki kahpwal nan ara pwopwoud diarada me ira sohte kin kadekpene. Ira eri koasoanehdi ira en onopkihpene ire wet. Ia imwilahn met? Ohlo nda: “At onopki duwen kadek kin sewese kiht sen ese me se  anahne likih oh song rapahki mehkot mwahu rehn emenemen, ahpw sohte peikasalki madamadau en emenemen. Se kalaudehla at kin nsenohki en emenemen anahn kan. Ei kin kadekohng ei pwoudo kin sewese ie ien mweidohng ei pwoudo en kasalehda ni saledek dahme e medemedewe oh sohte nsensuwedkihla dahme e nda. Met wehwehki me I anahne powehdi ei kin aklapalap. Ni at tapiada kadekpene, se ekis ekis sohla kin akupwungpene. At mouren pwopwoud kin nsenamwahu sang mahs.” Ia duwe, omw peneinei pil pahn paiekihda onop en wahn sapwellimen Koht manaman?

Pwoson Mehlel ni Omw Kelehpwla

13. Dahme kin keper ong atail nanpwungmwahu rehn Koht me kitail anahne kanahieng?

¹³ Kristian akan anahne mweidohng sapwellimen Koht manaman en kahluwa irail ni ahnsou me re kin mi rehn aramas oh pil ni ar kelehpwla. Nan ahn Sehdan sampah rahnpwukat, kilel suwed kan oh mehn kamweit suwed kan kin paraparala wasa koaros. Mepwukat kak kauwehla atail nanpwungmwahu rehn Siohwa. Dahme Kristian men anahne wia? Mahsen en Koht mahsanih: “Kumwail kesehweisang rehmwail soangen tiahk samin kan koaros oh soangen wiewia sapwung kan koaros. Kumwail peikiong Koht oh ale mahsen kan me e kin padokediong nan mohngiongimwail, ihme kak komourkumwailla.” (Seims 1:21) Kitail pahn tehkpene ia duwen pwoson, me iei kisehn wahn sapwellimen Koht manaman, eh kak sewese kitail pwe kitail en kin mwakelekel mwohn silangin Siohwa.

14. Ia duwen emen eh sohte ahneki pwoson eh kak kahrehiong ih en wiahda me suwed?

¹⁴ Ma kitail kin ahneki pwoson mehlel, kitail pahn medewe me Siohwa kin wia emen me ieias ong kitail. Ma soh, e pahn mengei ong kitail en wia me suwed. Medewehla dahme wiawihong sapwellimen Koht aramas akan mahs. Siohwa ketin kasalehiong soukohp Esekiel me soahng kasaut kan kin wiawi ni rir rehrail oh mahsanih: “Kowe, nein aramas, ke kilang dahme kaunen mehn Israel wiewia ni rir? Re wiewia ar kaudok nan pere ehu me diren dikedik en eni. Re kin akupwungki ndinda me: ‘KAUN-O sohte mwahn mahsanih kitail! E keselahr sahpwet.’” (Esek. 8:12) Ke tehk dahme kin kahrehda kahpwalo? Re sohte kin kamehlele me Siohwa mwahngih dahme re kin wiewia. Siohwa sohte wia emen me ieias ong irail.

15. Ia duwen atail uhdahn pwoson Siohwa eh kin pere kitail?

¹⁵ Ahpw, medewehla mehn kahlemeng mwahu en Sosep. Mendahki e sohte mi rehn eh peneinei oh kiseh kan, Sosep sohte dipikihda kamwahl rehn en Podipar eh pwoudo. Dahme kahrehda? E nda: “Ia duwen ei pahn wiahda soangen sapwung laud wet, oh dipikihda mwohn Koht?” (Sen. 39:7-9) Ei, Siohwa kin wia emen me ieias ong ih. Ma Koht kin ieias ong kitail, kitail sohte pahn kilang mehn kamweit suwed kan de wia mehkot ni rir me pahn kansensuwedihala ih. Kitail kin koasoanehdi teng duwehte sounmelkahkao me koulki: “I  pahn weweid nan mour mwakelekel nan imwei oh sohte mweidohng me suwed en kin wiawi. I kin kailongki wiewiahn irail kan me kin sohpeisang Koht; I sohte pahn iang irail.”—Mel. 101:2, 3.

Pere Mohngiongomw Sang Omw Kaunda Pein Uhk

16, 17. (a) Nin duwen pwuhken Lepin Padahk eh koasoia, ia duwen “emen pwutak pweipwei” eh lohdi nan dihp? (b) Nan kilel en pali 28, ia duwen mehkot duwehte met eh kak wiawihong emen sohte lipilipil eh sounpar?

¹⁶ Kaunda pein kitail, me iei kaimwiseklahn wahn sapwellimen Koht manaman, kin sewese kitail pwe kitail en kak soikala soahng kan me Koht kin kalahdeki. E kak sewese kitail pwe kitail en perehla mohngiongitail. (Lep. Pad. 4:23) Medewehla ireo me kileldi nan Lepin Padahk 7:6-23. E koasoia duwen “emen pwutak pweipwei” me dukula pahn lihen netiki paliwere men. E lohdi mwurin eh “alialu kohkohla pohn ahlo, limwahn wasa me lih emen kin kousoan ie.” Ele e kohla wasa me karanih imwen liho pwe e men kilang dahme kin wiawi wasao. Ahpw e mwadangete lohdiong tiahk pweipwei pwe “e sohte mwahn ese me eh mour kohkolahng apwal.”

¹⁷ Ia duwen mwahnakapwo eh kak soikala sapwung laud wet? Sang ni eh pahn kapwaiada peneu wet: “Dehr idawehnseli soangen lih menet.” (Lep. Pad. 7:25) Mie mehn kasukuhl ong kitail: Ma kitail men sapwellimen Koht manaman en kahluwa kitail, kitail en dehr kohla wasa me mie kasongosong. Ehu ahl emen kakete idawehn elen ‘pwutak pweipweio’ iei sang ni eh pahn kilikilang TV de doadoahngki internet ni soh kahrepe. Sohte lipilipil ma e men de soh, ele e kakete kilangada kilel suwed ehu. E kak ekis ekis kakairada tiahk samin en kilang kilel suwed me pahn kauwehla eh nsenmwakelekel oh eh nanpwungmwahu rehn Koht. Met kak pidada eh mour.—Wadek Rom 8:5-8.

18. Koasoandi dahkei emen Kristian en wia pwe en perehla eh mohngiong? Ia duwen koasoandi pwukat ar kin kasalehda me e kin kaunda pein ih?

¹⁸ Ni mehlel, kitail kak oh anahne kaunda pein kitail ni atail pahn mwadang mwekid ma kitail kilangada kilel suwed. Ahpw ia uwen eh pahn mwahu ma kitail soikala irairo nin tapio! (Lep. Pad. 22:3) Atail kin wiahda koasoandi mwahu kan oh kapwaiada kin kasalehda me kitail kak kaunda pein kitail. Karasepe, en kihong computer nan wasa ehu me koaros kak kilang kak pere kitail. Ekei kin diarada me e keieu mwahu ma irail doadoahngki computer de kilang TV ahnsou kante me meteikan kin iang mi wasao. Meteikan kin koasoanehdi ren sohte doadoahngki Internet. (Mad. 5:27-30) Ele kitail kin wiahda koasoandi kan me konehng en perehla kitail oh atail peneinei pwe kitail en kak kaudokiong Siohwa “ni mohngiong mwakelekel, sang ni kadeikpen loale mwahu, oh pil sang ni pwoson mehlel.”—1 Tim. 1:5.

19. Ia kamwahupe kan en atail mweidohng sapwellimen Koht manaman en kahluwa kitail?

¹⁹ Wa me sapwellimen Koht manaman kin kapwarehda kin wahdo kamwahu tohto. Opampap oh kanengamah kin sewese mwomwohdiso en ahneki popohl. Kadek oh kamwahu kin sewese peneinei en nsenamwahu. Pwoson oh kaunda pein kitail kin sewese kitail pwe kitail en kolokol atail nanpwungmwahu rehn Siohwa oh kin mwakelekel mwohn silangi. Patehng met, Kalesia 6:8 (NW) kin kamehlelehiong kitail: “Ih me kin padokekihdi sapwellimen Koht manaman pahn dolung mour soutuk sang sapwellime manaman.” Ei, pwehki tomw en Krais, Siohwa pahn ketin doadoahngki sapwellime manaman en ketikihda mour soutuk ong irail kan me mweidohng manamano en kahluwa irail.

Ia Duwen Omw Pahn Sapeng?

• Ia duwen opampap oh kanengamah ar kin sewese mwomwohdiso en ahneki popohl?

• Dahme kak sewese Kristian akan ren kasalehda kadek oh kamwahu nan imwarail?

• Ia duwen pwoson oh kaunda pein ih ar kin sewese Kristian men en perehla eh mohngiong?

[Peidek en Onop]

[Kilel nan pali 26]

Ia duwen omw kak irehdi akamai?

[Kilel nan pali 27]

Onopki wahn sapwellimen Koht manaman kak sewese omw peneinei

[Kilel nan pali 28]

Soangen keper dah kan kitail en soikala ni atail kin doadoahngki pwoson oh kaunda pein kitail?