U Ngu Nan Jijingi U Aôndo Ian Wer A Hemen We Kpa?
U Ngu Nan Jijingi U Aôndo Ian Wer A Hemen We Kpa?
“Jijingi Wou u dedoo la, A̱ za a mo ken tar u u lu vaanaa.”—PS. 143:10.
1, 2. (a) Pase ashighe agen a Yehova yange er tom a icighan jijingi na sha ci u mbacivir un yô. (b) Icighan jijingi eren tom sha ashighe a akaa a vesen a er tseeghlee? Ta iwanger.
KA WEA hen sha gbenda u icighan jijingi a eren tom la nahan, kanyi ka i va u ken ishima? Ka ityom i agee i Gidion kua Semson yange ve er la ka i va u ken ishima yee? (Mbaj. 6:33, 34; 15:14, 15) Alaghga a lu vangertiôr u Mbakristu mba tsuaa mbara lu a mi la, shin mtil u Sefanu tile sha ishigh ki Mkohol u Mbaajiriv ving la, ka u hen sha mi ye. (Aer. 4:31; 6:15) Nyian ne, ka iember i ka se zua a mi kpishi sha mbamkohol asev mba ityar ityar, man mtil sha mimi u anmgbianev asev mba i wuhu ve ken purusu sha ci u mba paleghaa sha akaa a taregh la, kua mvese u kpilighyol u tom u pasen kwagh la, ka u hen sha mi yee? Akaa ne cii tese er icighan jijingi a eren tom yô.
2 Kpa icighan jijingi eren tom sha ashighe a akaa a vesen shin a kpilighyol a er la tseegh shinii? Ei. Mkaanem ma Aôndo ôr kwagh u Mbakristu ér mba ‘zenden sha jijingi’ shin “jijingi . . . hemen” ve shin mba “uma sha jijingi.” (Gal. 5:16, 18, 25) Asember ne tese ér icighan jijingi una fatyô u hemen se hanma shighe cii. Doo u hanma iyange cii yô se sônon Yehova ser jijingi na a̱ kura se sha mhen wase man iliam yase kua aeren a ase. (Ôr Pasalmi 143:10.) Aluer se lumun ser jijingi ne a er tom ken uma wase yô, una ume ityamegh ken avese ki kia va mbagenev a mkpeyol shi kia va Aôndo a icivir yô.
3. (a) Gba u se de ser icighan jijingi a hemen se sha ci u nyi? (b) Ka mbampin mba nyi se lu timen sha mini?
3 Er nan ve i gbe hange hange u icighan jijingi una hemen se? Ityôkyaa yô, tahav mbugenev mbu keren u hemen se, shi mbu hendan a gbenda u icighan jijingi a eren tom la kpaa. Ruamabera yila tahav mbugenev mbura ér “iyol.” Ka iyol i inyam man awambe, i ka i mgbegha se u eren isholibo ne, ka dyako u myen u se ônov mba Adam se ngohol hen a na je la. (Ôr Mbagalatia 5:17.) Nahan yô, u se lumun ser icighan jijingi a hemen se la wa nyi man nyi kere? Igbenda ngi i se kar ve se fatyô u hemban asaren a iyol yase i isholibo ne yôô? De se time nen sha mbampin mban er se lu timen sha avegher a ataratar a “ityamegh ki Jijingi” a a shi ne, a yô, ka “ishima i wan man sar sar man mlu u dedoo man jighjigh man ishima i legh legh man u kôron iyol tsaha.”—Gal. 5:22, 23.
Ishima i Legh Legh man Ishima i Wan mba Ve a Bem ken Tiônnongo
4. Ishima i legh legh man ishimawan mba ve a bem ken tiônnongo nena?
4 Ôr Mbakolose 3:12, 13. Ishima i legh legh man ishimawan mba eren tom imôngo sha u van a bem ken tiônnongo. Avegher a ahar a ityamegh ki jijingi ne cii nga wasen se u eren a mbagenev kundu kundu, shi ishima ia vihi se kpa se er teghelee, shi se palegh u oron iyev shighe u mbagenev ve ôr kwagh a vese shin ve er a vese dang je kpaa. Aluer iyongo zua se a ma anmgbian u ken Kristu yô, ishimawan ia na kwagh u anmgbian u nomso shin u kwase la una due se ishima ga, kpa se nôngo er se fetyô la se sôr zayol shon. Mimi je, gba u mba ken tiônnongo vea lu a ishima i legh legh kua ishimawan keng-nee? Een, gba u se lu a ieren ne sha ci u se cii se yina.
5. Kanyi yange i za hemen hen atô u Paulu man Barnaba, man kwagh ne tese se nyi?
5 Nenge ase kwagh u yange za hemen hen atô u Paulu kua Barnaba ne. Yange ve er tom imôngo anyom kpishi sha u samber a loho u dedoo. Ve cii ve lu a aeren a dedoo. Nahan kpa, sha shighe ugen la, “anyiman nga gbe her atô ve tsung yô, maa ve pav zende.” (Aer. 15:36-39) Kwagh u yange er ve ne tese ér, hen atô u mbacivir Aôndo sha gbashima la je kpa ashighe agen anyiman aa fatyô u duen. Aluer iyongo gba hen atô u Orkristu vea Orkristu ugen yô, kanyi alaghga a gba u nana er sha er iyongo la ia kera na ve u zôhôn zwa kpoghuloo, vihin mlu ve gburu gburu ga?
6, 7. (a) Shighe u iliam yase vea or u nan ne jighjigh a vese imôngo i lu nôngon u za duen ken ayôôso yô, ka kwaghwan u Ruamabera u nyi se fatyô u dondono? (b) Aluer se mba ‘tsev tsev sha u ungwan kwagh kpa se mba geman ngôôr a kwaghôron, shi ngôôr a iyugh’ yô, se zua a mbamtsera mba nyi?
6 Er ishember i ‘anyiman gba tsung’ la i tese nahan, anyiman yange gba hen atô u Paulu man Barnaba kpoo, shi ve zôhô zwa kpoghuloo. Aluer ma Orkristu nenge ér ishima hii u vihin nan ker shighe u nan lu lamen a ornanjighjigh a nan imôngo sha ma kwagh yô, doo u nana dondo kwaghwan u ken Yakobu 1:19, 20 ne; a kaa ér: “Hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa. Gadia iyugh i or yô, ngi ve a perapera sha ishigh ki Aôndo ga.” Alaghga anmgbian la una due a kwagh ugen u vea lam sha mi yô, shin una ver ian igen i lamen sha kwagh shon, gayô una kar kera cii man ayôôso a a due ye; kpa hanma kwagh cii har sha er or u ú lu lamen a nan la na tee kwagh shon la.—Anz. 12:16; 17:14; 29:11.
7 Ka mbamtsera mba nyi se zua a mi sha u dondon kwaghwan nee? Orkristu ka nan na jijingi u Aôndo ian ér a hemen nan sha u wan ishima, shi tôôn shighe eren msen sha ikyaa shon, shi henen kwagh u a hembe doon u nana kende a ôr yô. (Anz. 15:1, 28) Aluer Jijingi ngu hemen Orkristu yô, nana fatyô u tesen ishima i legh legh man ishimawan. Sha nahan yô, nana fatyô u dondon kwaghwan u ken Mbaefese 4:26, 29 ne, a kaa ér: “Nyoon nen ishima, kpa de eren nen isholibo ga . . . Ma kwaghôron u dang a̱ de dugh ken zwa wen ga, saa di u doon u una fatyô u maan a maa kwagh ape kwagh a gbe sha mi yô, nahan mba vea ungwa kpaa vea zua a mlumun u sha mhôôn.” Sha kpôô yô, aluer se haa ishima i legh legh man ishimawan iyol yô, se wase u van a bem kua mzough ken tiônnongo.
Lu a Ieren i Sar Sar man i Dedoo i Ia Na a Kundu Tsombor Wou Iyol La
8, 9. Kanyi i lu sar sar man mlu u dedoo, man ka ve na mlu u hen ya a hingir nena?
8 Ôr Mbaefese 4:31, 32; 5:8, 9. Mlu u sar sar man mlu u dedoo ne mkunduyol, er ahumbe a kundunyol ka a ta se iyol shin sea ma kwaghman u ndôhôr shighe u iyange i te kpishi ve i kundu se iyol nahan. Mlu u sar sar man mlu u dedoo mba ve a mkunduyol hen tsombor. Ka mgbe u kwagh u mbagenev ka a gba se ishima sha mimi la ngu a na se lu a ve sar sar ye, shi ka se tese ser kwagh u mbagenev gba se ishima sha u eren akaa a nan ve iwasen shi lamen a ve sha gbenda u tesen ér se wa ve ikyo. Mlu u dedoo ka ieren i injaa, i í tesen i sha u eren akaa a wasen mbagenev, di vough er sar sar nahan yô. Or ka nana lu a ieren ne yô, nan naan mbagenev kwagh mgbeghaa. (Aer. 9:36, 39; 16:14, 15) Kpa mlu u dedoo ne shi ngu a kwagh ugen kpaa.
9 Mlu u dedoo ka u lun a ieren i wang. Mlu u dedoo saa sha kwagh u se eren la tseegh ga, kpa a kua injaor i se lu jim la kpaa. Tôô ase wer kwaseya ugen ngu tsemben atam a ikyon sha ci u tsombor na; ka una pav hanma ityamegh ki kon yô, a yenge ki iyol tsembelee sha u una fa kia via shi kia nyoho, shin kia lu a an-mshi ken won shin ken atô yô. Kape mlu u dedoo u icighan jijingi ka a na ken Orkristu la ngu a bende a uma u nan vindi vindi je la.
10. A fatyô u eren nyi sha u wasen mba hen tsombor u umen ityamegh ki jijingi?
10 Kanyi ia wase mba hen tsombor u Orkristu, u eren kwagh a mbagenev hen tsombor la sar sar shi eren a ve doo doo? Mfe u vough u ken Mkaanem ma Aôndo la ngu hange hange. (Kol. 3:9, 10) Mbayaav mbagenev ka vea eren Mcivir u hen Tsombor ve aikighe yô, ve tsua môm ken avegher a ityamegh ki jijingi la kpa ve time sha mi. Taver u eren kwagh ne ga. Yar tom a ityakerada man akaa agen a tôvon sha kwagh, a a lu ken zwa wou la, nahan hanma vegher u ityamegh ki jijingi yô, zua a ngeren u a er kwagh sha mi yô. Ne fatyô u timen sha akumahiange kpuaa ken hanma kasua, nahan ne tôôn ukasua imôngo ne henen hanma vegher u ityamegh ki jijingi la i môm. Nea henen ngeren la yô, ne ôr shi ne gbidye kwar sha avur a ruamabera a i nger la. Ker nen igbenda i ne fatyô u dondon kwagh u ne lu henen la yô, shi sôn nen Yehova a ver iniôngon yen la doo doo. (1 Tim. 4:15; 1 Yoh. 5:14, 15) Imba kwaghhenen ne ia fatyô u wasen mba hen tsombor sha gbenda u ve eren kwagh a ayolave la je he?
11, 12. Mbakristu mbagenev uhar vea kasev vev yange ve zua a mtsera sha u henen kwagh u mlu u sar sar nena?
11 Gumor ugen vea kwase na yange ve soo ér ivese ve i doo, nahan ve tsua ér vea hen vea fa kwagh u ityamegh ki jijingi kin tsembelee. Yange wase ve nena? Kwase na kaa ér: “U se fan ser ieren i sar sar ne kua u eren kwagh a or sha jighjigh man sha mimi la wase se kpishi sha gbenda u se eren kwagh a ayol a ase la zan zan nyian. Kwagh ne tese se u nômbon ikyôr sha kwagh ga shi den orgen a kwaghbo kpaa. Shi kwaghhenen ne wase se u fan shighe u i doo u se kaa ser ‘m sugh ú’ shin ‘yam anyi’ yô.”
12 Orkristu ugen vea kwase na yange ve tagher a mbamzeyol ken ivese ve, nahan ve kav er mlu u sar sar kera lu hen atô ve ga yô. Maa ve tsua ér vea time sha ieren i sar sar ne imôngo. Lu nyi i due kere? Nom na kaa ér: “Kwagh u se hen sha kwagh u mlu u dedoo la yange wase se u nengen er i gbe u se naan ayol a ase jighjigh, se luun a mbamhen mba kpeegh sha orgen ga, kpa se keren u nengen a kwagh u dedoo ken ayol a ase yô. Maa m hii u wan mbamgbe mba kwase wam ikyo hemban mba av, kwase wam di kpa nahan. Mlu u sar sar la yange kua u kaan a kwase wam mer, a̱ pasen mo hanma kwagh u a lu un ken ishima la cii, shi kwagh u una pasem cii kpa ishima i vihim sha mi ga. Shi m nenge mer gba u me ta imanger yam la kera. Er se hii u lun a ieren i sar sar la ken ivese yase yô, tegh tegh tsô se de ishô i kperan. Sha kpôô yô kwagh ne yange sagh se ken zayol ne tuhwa.” Tsombor wou ua zua mtsera sha u henen kwagh u ityamegh ki jijingi kpa?
Lu a Jighjigh u Nan Shighe u U Lu Tswen Yô
13. Gba u se palegh kwaghbo u nyi sha u kuran ikyaryan yase vea Yehovaa?
13 Gba u Mbakristu vea lumun ér jijingi u Aôndo a hemen ve shighe u ve lu vea mbagenev man shighe u ve lu ve tseegh la kpaa. Nyian ne, ufoto mba jimbagh kua iemberyolough i dang ngi samber seer seer ken tar u Satan ne. Kwagh ne una fatyô u vihin mlu wasen vea Yehova. Kanyi Orkristu nana eree? Mkaanem ma Aôndo wa se kwagh ér: “Gbihi nen hanma kwagh u hôngorough man shi ifer i i dumbur la kera, ngohol nen kwaghôron u i môôr un ken a ven la sha ishima i legh legh, u una fatyô u yiman uuma enev” yô. (Yak. 1:21) De se nenge er vegher u ityamegh ki jijingi, u i yer ér jighjigh la una wase se u lun a aeren a wang sha ishigh ki Yehova yô.
14. M-ban u jighjigh u nan una fatyô u nan or nyôron iyol ken ieren i dang nena?
14 Aluer se mba a jighjigh u nan u mimi yô, se nenge ser Yehova Aôndo ngu kpôô kpôô. Aluer se nenge ser Aôndo ngu kpôô kpôô ga yô, se ngôôr gban ken ieren i dang ga. Nenge ase kwagh u yange er hen atô u ior mba Aôndo mba sha ashighe a tsuaa la. Yehova yange pase Esekiel ér ior mba eren akaa a hôngorough myer, a kaa a na ér: “Wan u or, u nenge kwagh u mbatamen mba ya u Iserael ve lu eren ken ime, hanma or ken iyou i ieev mbi nan la kpa? Gadia mba kaan er: TER ngu nengen a vese ga; TER undu tar ne.” (Esek. 8:12) U nenge kwagh u yange va a zayol ne kpa? Yange ve na jighjigh ér Yehova fa kwagh u ve lu eren la ga. Yange ve nenge ér Yehova ngu kpôô kpôô ga.
15. Aluer se na Yehova jighjigh taveraa yô, kwagh la una kura se nena?
15 Kpa gema nenge ase ikyav i Yosev yange ver ne. Yange Yosev venda u eren idya a kwase u Potifar, shin er lu ica a tsombor na kua ior nav nahan kpaa. Sha ci u nyi? A kaa ér: “A er nan man me er kwaghbo u vesen ne, me er Aôndo isholibo nahana?” (Gen. 39:7-9) Mimi je, yange nenge ér Yehova ngu kpôô kpôô. Aluer se nenge ser Aôndo ngu kpôô kpôô yô, se er iemberyolough i dang ga, shin se er kwagh môm ken myer u a vihi Aôndo ga. Se kpa se kange ishima u eren er Orpasalmi nahan, yange wa icam wener: “Me zende a ishima i lun a acôghor a wan iyol ga ken iyou yam. Me kera ver kwagh u dang sha ashe am mayange ga.”—Ps. 101:2, 3.
Kura Ishima You sha u Kôron Iyol You Tsaha
16, 17. (a) Er i pase ken takerada u Anzaakaa nahan, “wanyekwaor ugen u kaven kwagh ga” yange gba ken imeen nena? (b) Er foto u sha peeji 26 la a tese nahan, imba kwagh la ia fatyô u eren agumaior shin mbaganden nyian nena?
16 Iyolkôrontsaha ka vegher u masetyô u ityamegh ki jijingi, man ieren ne i wasen se u palegh akaa a Yehova a vende la. Ia fatyô u wasen se u kuran ishima yase. (Anz. 4:23) Time ase sha kwagh u i er ken Anzaakaa 7:6-23, u a pase er “wanyekwaor ugen u kaven kwagh ga” yange gba ken imeen i idyakwase ugen yô. Yange gba ken imeen shighe u lu “karen sha gbenda ikyua ikyua [a] iniuugh ki gbenda na” la. Afaerenga yange kar ikyua a ya u idyakwase la sha ci u sar un u fan kwagh u hen ya na. Ngôôr hungur un er kwase la lu nyôron a na ken ibume, “sha ci u msaa u uma na je ga.”
17 Kanyi wanyekwaor ne yange ma er ve ma fatyô u palegh kwaghbo nee? Yange ma ungwa icintan i i kaa ér: “De kera kahan zaan sha igbenda na ga” la. (Anz. 7:25) Kwagh ngu u se hen sha kwagh ne yô: Aluer se soo ser jijingi u Aôndo a̱ hemen se yô, gba u se palegh kwagh u una na se gba ken imeen yô. Gbenda môm u or nana fatyô nyôron ken imba ieren i bume i “wanyekwaor . . . u kaven kwagh ga” ne yô, ka u bughun utashan mba televishen shin keren akaa sha Intanet wue wue a ityôkyaa shio la. Aluer ka awashima u nan u nengen ufoto mba kenden isharen i yaven a or shin ka awashima u nan la ga kpa, alaghga nana va tagher a ufoto mban aburabur. Kure kure tsô nana va hingir u lun a ieren i hôngorough, i nengen ufoto mba jimbagh la, nahan kwagh ne una vihi imoshima i nan shi una vihi ikyar i nan ye vea Aôndo la kpaa. Kwagh ne una fatyô u nan nan ku je kpaa.—Ôr Mbaromanu 8:5-8.
18. Ka akaa a nyi Orkristu nana er ve nana kura ishima i nana, man iyolkôrontsaha ia wase nan u eren kwagh ne nena?
18 Zum u se tagher a foto u jimbagh abu yô, se fatyô u kôron iyol tsaha sha u eren ma kwagh u hemban imeen la fese, shi gba u se er nahan kpaa. Kpa aluer se gema se palegh kwagh u una va a imeen ne jimin cii yô, a hemba doon cii. (Anz. 22:3) Gba u se kôr iyol yase tsaha ve se tswer u zan sha ajiir agen sha Intanet shin sha televishen, shi se kange ishima ser se gema kposo ga ye. U tesen ikyav yô, aluer u ver kômputa wou hen ijiir i i lu ken igbar yô, kwagh la una fatyô u kuran we. Mbagenev nenge ér hemba doon u vea eren kwagh sha kômputa shin vea nengen televishen shighe u mbagenev ve lu her yô. Mbagenev di tsua ér vea keren akaa sha Intanet ga kuaa. (Ôr Mateu 5:27-30.) Yô, se ker nen igbenda i se fetyô la cii se kura nen ayol a ase man icombor yase sha er se civir Yehova a “ishima i wang, man imo i dedoo i ken ishima man shi jighjigh u lun a imanger ga la” yô.—1 Tim. 1:5.
19. Ka mbamtsera mba nyi se zua a mi sha u nan icighan jijingi ian ser a hemen se?
19 Ityamegh ki icighan jijingi ka una eren tom ken or ve nan ume la ka ki va a mbamtsera kpishi. Ishima i legh legh man ishimawan mba ve a bem ken tiônnongo. Mlu u sar sar man mlu u dedoo mba ve a msaanyol hen tsombor. Jighjigh u nan man iyolkôrontsaha ka ve wase se se zan hemen u lun ikyua a Yehova shi lun wang sha ishigh nagh kpaa. Heela tseegh ga, Mbagalatia 6:8 na se ibumun ér: “[Or] u nana lôô ken Jijingi yô, shi ka di sha Jijingi nana sunda uma u tsôron ye.” Sha mimi yô, mba ve lumun ér jijingi a hemen ve la, Yehova una yar tom a icighan jijingi sha u nan ve uma u tsôron, sha ci u nagh ku ipaan ku Kristu kura.
Ú Na Mlumun Wer Nyi?
• Ishima i legh legh man ishimawan mba ve a bem ken tiônnongo nena?
• Kanyi ia wase Mbakristu vea lu a mlu u sar sar man mlu u dedoo hen ya?
• Jighjigh u nan man iyolkôrontsaha mba wasen Orkristu u kuran ishima i nan nena?
[Mbampin mba ngeren u henen]
[Foto u sha peeji 24]
U er nan ve iliam you vea anmgbian ugen ia due ken ayôôso ga?
[Foto u sha peeji 25]
Tsombor wou ua zua a mtsera sha u henen kwagh u ityamegh ki jijingi
[Foto u sha peeji 26]
Jighjigh u nan man u kôron iyol tsaha vea wase se u palegh akaabo a nyi?