Yu Larim Spirit Bilong God i Stiaim Yu?
Yu Larim Spirit Bilong God i Stiaim Yu?
“Mi laik bai spirit bilong yu i mekim gut long mi na i stiaim mi long gutpela rot.”—SNG. 143:10.
1, 2. (a) Kolim sampela eksampel we Jehova i bin yusim holi spirit bilong helpim ol wokman bilong em. (b) Holi spirit i mekim wok long taim ol bikpela samting tasol i kamap? Stori long dispela.
YU SAVE tingim wanem samting taim yu tingim wok em holi spirit i save mekim? Yu save tingim ol bikpela wok em Gideon na Samson i bin mekim? (Het. 6:33, 34; 15:14, 15) Ating yu tingim pasin bilong ol Kristen bilong bipo long sanap strong na i no pret, o yu tingim bel isi bilong Stiven taim em i sanap long ai bilong Sanhedrin. (Apo. 4:31; 6:15) Na long taim bilong yumi tu i gat ol samting i kamapim klia olsem holi spirit i mekim wok. Olsem: Bikpela amamas i save kamap long ol kibung intenesenel, pasin bilong ol brata long holimpas bilip taim ol i stap long kalabus long wanem ol i no insait long pait, na wok bilong autim tok i go bikpela.
2 Olsem wanem? Holi spirit i mekim wok long taim ol bikpela samting tasol i kamap? Nogat. Baibel i stori long ol Kristen olsem, ‘holi spirit i bosim wokabaut bilong ol’ na ‘holi spirit i stiaim ol.’ (Gal. 5:16, 18, 25) Ol dispela tok i soim olsem holi spirit inap wok oltaim long mekim sampela samting long laip bilong yumi. Long olgeta de, yumi mas beten askim Jehova long holi spirit bilong em i ken stiaim tingting, toktok, na pasin bilong yumi. (Ritim Song 143:10.) Taim yumi larim holi spirit i wok insait long laip bilong yumi, bai yumi kamapim ol pasin i givim nupela strong long ol narapela na i litimapim nem bilong God.
3. (a) Bilong wanem holi spirit i mas stiaim yumi? (b) Bai yumi skelim wanem ol askim?
3 Bilong wanem i bikpela samting long holi spirit i mas stiaim yumi? Long wanem, i gat narapela strong i traim long bosim yumi, em dispela strong i save pait wantaim wok bilong holi spirit. Baibel i kolim dispela narapela strong olsem “laik nogut bilong bel,” em sin i stap long skin bilong yumi na i save pulim yumi long mekim pasin nogut, em samting yumi bin kisim long Adam. (Ritim Galesia 5:17.) Olsem wanem yumi inap larim spirit bilong God i stiaim yumi? I gat sampela samting yumi inap mekim bilong sakim ol laik nogut bilong bel? Bai yumi skelim ol dispela askim taim yumi stori long narapela 6-pela “pasin holi spirit i kamapim,” olsem pasin bilong “i no les kwik, pasin helpim, gutpela pasin, bilip, pasin isi, na bosim bel.”—Gal. 5:22, 23.
Pasin Isi na i No Les Kwik i Helpim Kongrigesen
4. Olsem wanem pasin isi na pasin bilong i no les kwik i helpim kongrigesen long i stap bel isi?
4 Ritim Kolosi 3:12, 13. Pasin isi na pasin bilong i no les kwik, tupela pasin wantaim i save strongim bel isi insait long kongrigesen. Dispela tupela pasin em holi spirit i kamapim, i helpim yumi long mekim gutpela pasin long ol narapela, stap bel isi taim wanpela i sikirapim bel bilong yumi, na abrusim pasin bilong bekim rong taim wanpela i mekim tok nogut o pasin i no stret long yumi. Sapos yumi gat hevi wantaim wanpela wanbilip, pasin bilong i no les kwik o pasin isi, bai helpim yumi na yumi no les long brata o sista bilong yumi, na bai yumi mekim ol samting bilong stretim hevi. Olsem wanem? Yumi gat wok long mekim pasin isi na pasin bilong i no les kwik insait long kongrigesen? Yes, long wanem, yumi olgeta i gat sin.
5. Wanem samting i kamap namel long Pol na Barnabas? Dispela i kamapim klia wanem samting?
5 Tingim samting i bin kamap namel long Pol na Barnabas. Inap planti yia tupela i bin wok wantaim long helpim wok bilong gutnius. Tupela i gat ol gutpela pasin. Tasol wanpela taim, “bikpela tok kros i kamap namel long tupela na tupela i bruk.” (Apo. 15:36-39) Dispela samting i kamapim klia olsem, sampela taim tok kros bai kamap namel long ol gutpela wokman bilong God. Sapos wanpela Kristen i gat hevi wantaim narapela wanbilip, em i ken mekim wanem na bai kros i no ken kamap bikpela na i bagarapim pasin pren bilong ol?
6, 7. (a) Taim yumi toktok wantaim wanpela wanbilip na kros i laik kamap, yumi ken bihainim wanem tok bilong Baibel? (b) Bilong wanem i gutpela long ‘putim yau kwik long harim tok, na no ken hariap long mekim toktok, na no ken belhat hariap’?
6 Olsem dispela tok “bikpela tok kros” i makim, hevi i kamap namel long Pol na Barnabas i kamap wantu na i bikpela. Sapos wanpela Kristen i pilim olsem bel bilong em i wok long hat taim em i toktok wantaim wanpela wanbilip, i gutpela sapos em i bihainim savetingting na bihainim tok i stap long Jems 1:19, 20: “Olgeta man i mas putim yau kwik long harim tok, na ol i no ken hariap long mekim toktok. Na ol i no ken belhat hariap. Long wanem, belhat bilong man i no save kamapim stretpela pasin God i laikim.” Sapos i stret long mekim, em i ken kirap stori long narapela samting, o toktok long dispela samting long narapela taim, o lusim wanbilip paslain long kros i kamap.—Snd. 12:16; 17:14; 29:11.
7 Wanem ol gutpela samting i kamap taim Kristen i bihainim dispela tok? Sapos em i larim bel i kol pastaim, na beten long dispela samting, na tingim gutpela tok em i ken mekim, orait em i larim spirit bilong God i stiaim em. (Snd. 15:1, 28) Taim holi spirit i stiaim em, em inap kamapim pasin isi na pasin bilong i no les kwik. Olsem na em inap long bihainim tok i stap long Efesus 4:26, 29: “Sapos yupela i belhat, orait no ken mekim sin. . . . Ol stingpela tok i no ken kamaut long maus bilong yupela, nogat. Mekim ol gutpela tok bilong strongim ol man taim ol i no gat strong.” Tru tumas, taim yumi mekim pasin isi na pasin bilong i no les kwik, yumi strongim bel isi na pasin wanbel insait long kongrigesen.
Mekim Pasin Helpim na Gutpela Pasin Insait Long Famili
8, 9. Pasin helpim na gutpela pasin em wanem samting? Dispela tupela pasin inap mekim wanem long sindaun bilong famili?
8 Ritim Efesus 4:31, 32; 5:8, 9. Olsem naispela win na kol dring i givim nupela strong long taim bilong bikpela san, pasin helpim na gutpela pasin i save givim nupela strong. Dispela tupela pasin i mekim na famili i sindaun gut wantaim. Pasin helpim em pasin man i kamapim taim em i tingim tru narapela, em i laik mekim samting bilong helpim narapela na givim ol gutpela tok long em. Gutpela pasin i kain olsem pasin helpim, man i mekim gutpela pasin taim em i mekim samting bilong helpim narapela. Man i gat dispela pasin, em i amamas long givim ol samting. (Apo. 9:36, 39; 16:14, 15) Tasol i gat sampela samting moa i insait long gutpela pasin.
9 Gutpela pasin i makim pasin i stret olgeta na i nambawan tru. Em i no makim tasol samting yumi mekim, nogat, em i makim pasin tru bilong yumi. Kain olsem wanpela prut em ausait bilong en i luk nais, na taim yu katim, insait bilong en tu i gutpela olgeta na no gat wanpela hap i nogut. Na olsem tasol, gutpela pasin em holi spirit i save kamapim, dispela i mekim na olgeta wokabaut bilong wanpela Kristen i gutpela na i no gat wanpela hap bilong en i nogut.
10. Wanem samting bai helpim famili long kamapim ol pasin bilong holi spirit?
10 Insait long famili Kristen, wanem samting inap helpim ol long mekim pasin helpim na gutpela pasin long narapela narapela? Stretpela save long Tok Bilong God i bikpela samting. (Kol. 3:9, 10) Long taim bilong Famili Lotu long olgeta wik, sampela het bilong famili i save stadi wantaim famili long ol pasin holi spirit i kamapim. I no hatwok long mekim olsem. Yu ken yusim ol buk na nius samting i stap long tokples yu save long en bilong mekim wok painimaut, na skelim ol buk samting i stori long ol wan wan pasin bilong holi spirit. Ating yu ken skelim sampela paragraf tasol long wanpela wik, olsem na yu inap lusim sampela wik long skelim wanpela pasin bilong holi spirit. Taim yu stadi long buk, ritim na stori long ol skripsa ol i no raitim tok bilong en. Tingim ol rot we yu ken bihainim ol tok yu kisim save long en, na beten askim Jehova long blesim ol samting yu mekim. (1 Tim. 4:15; 1 Jon 5:14, 15) Yu ting kain stadi olsem inap mekim sampela senis long pasin ol wan wan long famili i mekim long narapela narapela?
11, 12. Olsem wanem 4-pela marit i bin kisim helpim long rot bilong stadi long pasin helpim?
11 Tupela yangpela marit i laik bai marit bilong ol i stap gut, olsem na ol i kirap stadi gut long ol pasin bilong holi spirit. Olsem wanem dispela i helpim ol? Meri i tok: “Taim mipela i kisim save olsem pasin bilong bilip long narapela na stap gut long em i insait long pasin helpim, dispela i mekim bikpela senis long pasin mipela i mekim long narapela narapela i kam inap long nau. Save mipela i kisim i skulim mipela long bihainim tingting bilong poroman na long fogivim narapela narapela. Na i kirapim mipela long tok ‘tenkyu’ na tok ‘sori.’ ”
12 Narapela tupela marit Kristen, husat i gat sampela hevi insait long marit, ol i luksave olsem i no gat pasin helpim insait long marit bilong ol. Ol i kirap stadi wantaim long dispela pasin. Wanem samting i kamap? Man i tok: “Taim mipela i stadi long wanem samting i insait long pasin helpim, dispela i helpim mipela long luksave olsem mipela i mas bilip long poroman na no ken ting em i gat tingting nogut, na tu, mipela i mas tingim ol gutpela pasin bilong narapela narapela. Mipela i kirap long tingim samting em poroman i nidim. Pasin helpim i makim tu olsem mi mas kirapim meri bilong mi long kamapim tingting bilong em na mi no ken bel nogut long tingting em i kamapim. Dispela i makim olsem mi mas daunim mi yet. Taim mipela i kirap long bihainim pasin helpim insait long marit bilong mipela, isi isi mipela i lusim pasin bilong strongim sait bilong mipela yet. Mipela i pilim gutpela tru.” Olsem wanem? Famili bilong yu inap kisim gutpela helpim sapos yupela i stadi long ol pasin bilong holi spirit?
Bihainim Bilip Taim Yu Yet i Stap
13. Wanem samting inap bagarapim pasin bilong yumi long pas gut wantaim Jehova?
13 Ol Kristen i mas larim spirit bilong God i stiaim ol taim ol i stap long ai bilong ol man na taim ol i stap long haus bilong ol yet. Long dispela graun bilong Satan long nau, ol piksa nogut na ol amamas nogut i kamap planti tru. Dispela inap bagarapim pasin bilong yumi long pas gut wantaim Jehova. Kristen inap mekim wanem? Baibel i tok: “Rausim olgeta samting i no klin na pasin nogut, em dispela pasin i save kamap planti tumas. Na long pasin isi, yupela i mas larim God i planim tok bilong en long bel bilong yupela, em dispela tok inap kisim bek laip bilong yupela.” (Jems 1:21) Narapela pasin bilong holi spirit em bilip. Nau yumi ken skelim olsem wanem dispela pasin inap helpim yumi long i stap klin yet long ai bilong Jehova.
14. Sapos yumi sot long bilip, olsem wanem dispela inap mekim na yumi insait long pasin nogut?
14 Bilip i makim olsem yumi tingim God Jehova olsem wanpela man i stap tru. Sapos yumi no gat dispela tingting, em bai isi tru long yumi insait long ol pasin nogut. Tingim samting i bin kamap namel long lain bilong God long bipo. Jehova i tokim profet Esekiel olsem ol man i mekim pasin nogut taim ol i stap ol yet, em i tok: “Lukim. Ol hetman bilong Israel i hait i stap na mekim dispela pasin nogut. Olgeta i save kam long dispela rum i gat kain kain piksa nogut i stap long banis bilong en, na ol i mekim lotu. Ol i save tok olsem, ‘Bikpela i no inap lukim yumi. Nogat. Em i lusim kantri bilong yumi pinis, na em i no tingting moa long yumi.’ Ol i tok olsem, na ol i mekim dispela pasin.” (Ese. 8:12) Yu luksave long wanem samting i as bilong dispela hevi? Ol i no ting Jehova i lukim samting ol i wok long mekim. Ol i no tingim Jehova olsem wanpela man i stap tru.
15. Olsem wanem pasin bilong bilip tru long Jehova i lukautim yumi?
15 Tasol tingim stori bilong Josep. Maski em i stap longwe long famili na lain bilong em, Josep i no laik mekim pasin pamuk wantaim meri bilong Potifar. Bilong wanem? Em i tok: “Olsem wanem bai mi mekim dispela pasin nogut tru? Sapos mi mekim olsem bai mi mekim sin long ai bilong God.” (Stt. 39:7-9) Yes, em i tingim Jehova olsem wanpela man i stap tru. Sapos yumi gat dispela tingting, orait taim yumi stap yumi yet bai yumi no lukim ol piksa nogut o mekim narapela samting em yumi save pinis olsem God i no laikim. Bai yumi gat wankain tingting olsem man bilong raitim song husat i singsing olsem: “Mi bai mekim stretpela pasin tasol long haus bilong mi. Mi no ken orait long pasin nogut. Nogat tru.”—Sng. 101:2, 3.
Bosim Bel—Dispela i Save Lukautim Yumi
16, 17. (a) Olsem Buk Sindaun i stori long en, olsem wanem ‘yangpela man i no gat gutpela tingting na save’ i pundaun long sin? (b) Olsem piksa long pes 26 i soim, olsem wanem wankain samting inap painim wanpela long nau maski em i gat hamas krismas?
16 Pasin bilong bosim bel em i laspela pasin bilong holi spirit, em i save helpim yumi long sakim ol samting God i nolaik tru long en. Dispela pasin i helpim yumi long was gut long bel na tingting bilong yumi. (Snd. 4:23) Tingim stori i stap long Sindaun 7:6-23, em i stori long ‘yangpela man i no gat gutpela tingting na save,’ na em i putim yau long tok gris bilong wanpela pamukmeri. Yangpela man i “wokabaut klostu long haus” bilong dispela meri na i kirap bihainim em. Ating em i go long hap meri i stap long en, long wanem, em i laik lukluk tasol long dispela hap. Em i no luksave olsem em i bihainim rot nogut we laip bilong em inap lus.
17 Olsem wanem dispela yangpela man inap abrusim pasin kranki? Em inap abrusim sapos em i bihainim dispela tok lukaut: ‘No ken bihainim dispela kain meri.’ (Snd. 7:25) Dispela i skulim yumi olsem: Sapos yumi laik bai spirit bilong God i stiaim yumi, yumi mas i stap longwe long ol samting em inap traim yumi. Wanpela rot we man inap bihainim pasin bilong dispela ‘yangpela man i no gat gutpela tingting na save,’ em long rot bilong senisim nating ol sanel bilong TV o lukluk nating long ol narapela narapela Web-sait bilong Intenet. Maski em i no min long lukim, ol piksa bilong kirapim laik nogut bilong bel inap kamap nating. Isi isi em inap kirap bihainim pasin i no klin na lukluk long ponografi, dispela inap bagarapim tru maus bilong bel na pasin bilong em long pas gut wantaim God. Laip bilong em tu inap lus.—Ritim Rom 8:5-8.
18. Wanpela Kristen inap mekim wanem bilong was gut long bel na tingting bilong em? Olsem wanem pasin bilong bosim bel i insait long dispela?
18 Yumi inap bosim bel na yumi mas mekim olsem, na taim piksa bilong pasin sem i kamap, yumi mas hariap long mekim samting. Tasol mobeta yumi abrusim ol rot we dispela samting inap kamap! (Snd. 22:3) Yumi ken putim sampela lo bilong lukautim yumi yet na bihainim, na bilong mekim olsem yumi mas bosim bel. Olsem: Yumi ken putim kompiuta long hap we olgeta i ken lukim. Sampela i pilim olsem i gutpela moa long ol i yusim kompiuta o lukim TV taim ol narapela i stap, na i no long taim ol i stap wanpis. Sampela i wokim disisen olsem ol i no ken kisim Intenet. (Ritim Matyu 5:27-30.) Yumi mas mekim olgeta samting yumi inap long mekim bilong lukautim yumi yet na famili bilong yumi, long dispela rot yumi ken lotuim Jehova wantaim “klinpela bel na gutpela maus bilong bel na bilip i no gat pasin giaman long en.”—1 Tim. 1:5.
19. Wanem ol gutpela samting i kamap taim yumi larim holi spirit i stiaim yumi?
19 Ol pasin em holi spirit i kamapim i helpim yumi long planti rot. Pasin isi na pasin bilong i no les kwik i strongim bel isi insait long kongrigesen. Pasin helpim na gutpela pasin i kamapim amamas insait long famili. Bilip na pasin bilong bosim bel i helpim yumi long stap klostu yet long Jehova na stap klin long ai bilong em. Na tu, Galesia 6:8 i tok: “Man i larim holi spirit i stiaim em, i olsem man i planim gutpela samting. Na kaikai em bai kamautim, em bai kisim laip oltaim long rot bilong holi spirit.” Tru tumas, long rot bilong pe em Krais i givim bilong baim bek man, Jehova bai yusim holi spirit bilong givim laip oltaim long ol man husat i larim holi spirit i stiaim ol.
Bai Yu Bekim Olsem Wanem?
• Olsem wanem pasin isi na pasin bilong i no les kwik i strongim bel isi insait long kongrigesen?
• Wanem samting inap helpim Kristen long kamapim pasin helpim na gutpela pasin insait long famili?
• Olsem wanem bilip na pasin bilong bosim bel inap helpim Kristen long was gut long bel bilong em?
[Askim Bilong Stadi]
[Piksa long pes 24]
Taim yu toktok wantaim narapela, yu ken mekim wanem na kros i no ken kamap?
[Piksa long pes 25]
Pasin bilong stadi long ol pasin bilong holi spirit inap helpim famili bilong yu
[Piksa long pes 26]
Pasin bilong bilip na bosim bel i helpim yumi long abrusim wanem ol hevi?