¿Mi chavakʼ akʼo sbeiltasot li xchʼul espiritu Diose?

«Jaʼ acʼo yicʼun batel ta tuqʼuil be [li chʼul espiritue].» (SAL. 143:10)

1, 2. 1) Alo kaʼitik ti butik stunesoj xchʼul espiritu Jeova sventa stabe sbalil li yajtuneltake. 2) ¿Mi jaʼ noʼox ch-abtej chʼul espiritu kʼalal oy kʼusi stuk noʼox jech chkʼot ta pasele? Alo ti kʼu yuʼun jech chatakʼe.

 ¿KʼUSI chtal ta anopben kʼalal chavaʼi ti «ikoltavan li chʼul espiritu», xijchie? ¿Mi jaʼ van chtal ta ajol li kʼusi labal sba la spasik Gedeón xchiʼuk Sansone? (Jue. 6:33, 34; 15:14, 15.) Yikʼaluk van jaʼ chtal ta ajol xtok ti toj tsots yoʼonton i-echʼik li baʼyel yajtsʼaklomtak Cristoe xchiʼuk ti kʼuyelan jun noʼox yoʼonton Esteban kʼalal te vaʼal ta stojolal Sanedrine (Hech. 4:31; 6:15). Mi jaʼ ta jnopbetik skʼoplal li kʼusi achʼtik to kʼotem ta pasele yikʼaluk van jaʼ chtal ta joltik li muyubajel chakʼ mukʼta tsobajeletik internasionale, o jaʼ van chtal ta joltik ti laj yichʼ chukel li ermanoetik ti tukʼ yoʼontonik ta skoj ti muʼyuk stikʼ sbaik ta politika o ti kʼuyelan yakal chichʼ cholel batel li mantal ti toj labal xa noʼox sbae. Ta melel, taje jaʼ chakʼ ta ilel ti abtej ta stojolalik li xchʼul espiritu Jeovae.

² Vaʼun chaʼa, ¿mi jaʼ van skʼan xal ti jaʼ noʼox chkoltavan chʼul espiritu kʼalal oy kʼusi stuk noʼox jech chkʼot ta pasel o kʼalal oy tsots vokolile? Moʼoj. Yuʼun li Vivliae chal ti «[tspasik] cʼusi tscʼan [...] Chʼul [espiritu]» li yajtsʼaklomtak Cristoe, «[kuxulik] ta sventa li Chʼul Espiritue» xchiʼuk chakʼ sbaik ta «[tojobtasel yuʼun] li Chʼul Espiritue» (Gál. 5:16, 18, 25). Taje chakʼ ta ilel ti xuʼ nopajtik noʼox x-abtej ta jtojolaltik li chʼul espiritue. Jaʼ yuʼun skotol kʼakʼal skʼan jkʼanbetik xchʼul espiritu Jeova sventa sbeiltas jnopbentik, jkʼopojeltik xchiʼuk li kʼusitik ta jpastike (Sal. 143:10, NM). Lek kʼusi ta jpas ta jkuxlejaltik sventa chkichʼtik ta mukʼ Dios xchiʼuk tstabe sbalil jchiʼiltaktik mi chkakʼtik akʼo x-abtej ta jtojolaltik li chʼul espiritue.

3. 1) ¿Kʼu yuʼun toj tsots skʼoplal ti xkakʼ jbatik ta beiltasel yuʼun li chʼul espiritue? 2) ¿Kʼusi sjakʼobiltak ta jkʼelbetik batel skʼoplal?

³ ¿Kʼu yuʼun toj tsots skʼoplal ti xkakʼ jbatik ta beiltasel yuʼun li chʼul espiritue? Yuʼun oy jtos ipalil ti kontra ch-ilat li chʼul espiritue xchiʼuk ti tskʼan tstsalutike. Jaʼ li «jbecʼtaltique», ti jaʼ chalbe skʼoplal Vivlia ti jpas mulilutik ta skoj ti la jkuchinbetik li smul Adane (kʼelo Gálatas 5:17). Pe ¿kʼuxi chkakʼtik akʼo sbeiltasutik li chʼul espiritue? ¿Kʼusi xuʼ jpastik sventa mu stsalutik li kʼusi tskʼan jbekʼtaltike? Jtakʼtik batel taje xchiʼuk jkʼelbetik batel skʼoplal li vaktos «yabtel Chʼul [espiritu]» ti muʼyuk to kalojbetik skʼoplale: «oy smucʼul coʼntontic, lec noʼox chijcʼopojutic, oy slequil coʼntontic, oy xchʼunojel coʼntontic, mu jtoybauticuc [xchiʼuk] jnaʼtic spajesel jbatic» (Gál. 5:22, 23).

Jun koʼontontik ta tsobobbail kʼalal «oy smucʼul coʼntontic» xchiʼuk ti «mu jtoybauti[kuke]»

4. ¿Kʼuxi tskoltautik ta tsobobbail ti junuk koʼontontik kʼalal oy smukʼul koʼontontik xchiʼuk ti mu jtoybautikuke?

⁴ (Kʼelo Colosenses 3:12, 13.) Li talelaletik ti chakʼ jun oʼontonal ta tsobobbaile jaʼ ti mu jtoybautikuk xchiʼuk ti oyuk smukʼul koʼontontike. Li chaʼtos yabtel chʼul espiritu taje jaʼ tskoltautik sventa oyuk slekil koʼontontik, ti mu xij-ilin kʼalal oy kʼusi chijpasbate xchiʼuk ti mu jpak jkʼoplaltik mi mu lekuk chijkʼoponat o mu lekuk kʼusi chijpasbate. Kʼalal oy jkʼoptik xchiʼuk junuk ermanoe jaʼ me tskoltautik li smukʼul oʼontonal sventa mu jchʼak-o jbatike, yuʼun chkakʼtik persa sventa jchap li jkʼoptike. Ta melel, ta skoj ti naka jpasmulilutike toj tsots me skʼoplal  ta tsobobbail li smukʼul koʼontontik xchiʼuk ti mu jtoybautikuke.

5. ¿Kʼusi la spasik li Pablo xchiʼuk Bernabee, xchiʼuk kʼusi chakʼ jchantik taje?

⁵ Kalbetik skʼoplal li Pablo xchiʼuk Bernabee. Lek tajek stalelal xchaʼvoʼalik xchiʼuk oy xa ta sjayibal jabil jmoj chcholik mantal. Pe oy jun velta «ti tsots laj yut sbaique, jech te la svocʼ sbaic o» (Hech. 15:36-39). Oy kʼusi chakʼ jchantik taje: jaʼ ti oy bakʼintik chlik kʼop yuʼunik ek li tukʼil yajtsʼaklomtak Cristoe. ¿Kʼusi xuʼ jpastik sventa mu xijlik ta tsatsal utbail xchiʼuk li kermanotik mi oy jech lik jkʼoptike, ti jaʼ chchʼakutik-oe?

6, 7. 1) ¿Kʼusi mantal ta Vivlia tskoltautik sventa mu xlik-o tsatsal utbail kʼalal ta jchap jkʼoptik xchiʼuk junuk ermanoe? 2) ¿Kʼusi sbalil ta jtatik mi ta jchʼuntik liʼe: «Aʼyo lec avaʼyic li cʼusi chaʼalbatique. Mu xacʼopojic ta anil [xchiʼuk] mu xaʼilinic ta anil», xie?

⁶ Kʼalal chkaltik «ti tsots laj yut sbai[k]» li Pablo xchiʼuk Bernabee chakʼ ta aʼiel ti ta anil noʼox kʼot ta pasel xchiʼuk ti toj tsots ibate. ¿Kʼusi chakʼ jchantik? Mi kakʼtik venta ti yakal xa chij-ilin kʼalal ta jchapan jkʼoptik xchiʼuk junuk ermanoe, jaʼ me lek ti jchʼuntik li mantal chal Santiago 1:19, 20: «Aʼyo lec avaʼyic li cʼusi chaʼalbatique. Mu xacʼopojic ta anil; mu xaʼilinic ta anil. Yuʼun li bochʼo ta xʼiline, mu xa jaʼuc tspas li cʼusi lec chil Diose». Jel jloʼiltik mi xuʼ chkiltike, jaʼ to jloʼiltatik ta yan velta li kʼusi chlik-o kʼope o kaltik ti chijbat xa yoʼ to muʼyuk likem li kʼope (Pro. 12:16; 17:14; 29:11).

⁷ ¿Kʼusi sbalil ta jtatik kʼalal chkakʼ ta jkuxlejaltik li mantal taje? Yakal me chkakʼ akʼo sbeiltasutik chʼul espiritu kʼalal ta jpajtsan jbatik ta ile, kʼalal ta jkʼopontik Jeova xchiʼuk kʼalal ta jnoptik baʼyuk kʼuxi chijtakʼave (Pro. 15:1, 28). Taje jaʼ me tskoltautik sventa oyuk smukʼul koʼontontik xchiʼuk ti mu jtoybautikuke. Vaʼun jaʼ me tskoltautik sventa jchʼuntik li mantal ta Efesios 4:26, 29: «Me chaʼilinique, mu me teuc xasaʼ amulic o [...]. Mu xa me xlocʼ ta aveic scotol cʼusitic muʼyuc lec. Jaʼ alic cʼusitic lec ti jaʼ sventa chijtsatsubutic yuʼune, yuʼun jech xuʼ chtun yuʼunic ec li bochʼotic oy to cʼusi scʼan yuʼunique». Ta melel, jun koʼontontik ta tsobobbail xchiʼuk jmoj oyutik kʼalal oy smukʼul koʼontontik xchiʼuk kʼalal muʼyuk ta jtoy jbatike.

Xkuxet yoʼonton utsʼ-alalil mi «lec noʼox chijcʼopojutic [xchiʼuk mi] oy slequil coʼntonti[ke]»

8, 9. ¿Kʼusi jaʼ ti lek noʼox chijkʼopoje xchiʼuk kʼusi jaʼ li slekil oʼontonale, xchiʼuk kʼuxi chkoltavan ta kutsʼ kalaltik?

⁸ (Kʼelo Efesios 4:31, 32; 5:8, 9.) ¡Batsʼi xkuxet van tajek chkaʼitik kʼalal siket xa chtal ikʼ xchiʼuk ti oy kʼusi lek sik chkuchʼtik kʼalal jaʼo kʼixin tajeke! Jaʼ me jech chkaʼi jbatik yuʼun ek kʼalal lek noʼox chijkʼopoj xchiʼuk ti oy slekil koʼontontike. Jech xtok, jun noʼox koʼontontik yuʼun li ta kutsʼ kalaltike. Pe ¿kʼusi te smakoj li chaʼtos yabtel chʼul espiritu taje? Ti «lec noʼox chijcʼopojutic» xi ta griego kʼope jaʼ chalbe skʼoplal  ti buchʼu lek snaʼ xkoltavan xchiʼuk ti alakʼ sba skʼopojel tstunes ta skoj ti oy ta yoʼonton yantike. Ti «oy slequil coʼntontic» xijchie jaʼ jtos talelalil ti te chvinaj kʼalal chkakʼbetik yantik li kʼusi jsetʼ-juteb oy kuʼuntike (Hech. 9:36, 39; 16:14, 15). Pe oy to kʼusi yan smakojbe skʼoplal li slekil oʼontonale.

⁹ Jaʼ jun lekil talelal li slekil oʼontonale. Jaʼ te chvinaj ti kʼusi ta jpastike, pe mas to te chvinaj ti kʼu kelantike. Xkoʼolaj kʼuchaʼal jpʼej sat teʼ ti chetʼulan tal jun meʼil sventa chakʼbe li yutsʼ yalale. Li sat teʼe skʼan lek chiʼ xchiʼuk lek tokʼon, skʼan muʼyuk kʼoʼ ta yut mi jaʼuk ta spat. Jaʼ me jech ek un, li slekil oʼontonal chakʼ chʼul espiritu ti chlokʼ tal ta oʼontonale te chvinaj ta sjunul xkuxlejal li yajtsʼaklom Cristoe.

10. ¿Kʼusi chkoltaat li utsʼ-alalil sventa xchʼies ta xkuxlejalik li yabtel chʼul espiritue?

¹⁰ ¿Kʼusi chkoltaat li utsʼ-alalil yoʼ lekuk noʼox skʼopon sbaik xchiʼuk ti oyuk slekil yoʼontonike? Jtos ti kʼusi toj tsots skʼoplale jaʼ ti xojtikinik lek li sKʼop Diose (Col. 3:9, 10). Oy totil-meʼiletik ti jaʼ chchanbeik skʼoplal yabtel chʼul espiritu li ta Akʼobal sventa Yichʼel ta Mukʼ Jeova ta Kutsʼ Kalaltike. ¿Mi xuʼ jech xapas ek? Mu vokoluk ta pasel. Tuneso li kʼusitik oy ta batsʼi kʼop sventa xasabe mas yaʼyejal li jujutos yabtel chʼul espiritue. Xuʼ jayib noʼox parafo xakʼelbeik skʼoplal kʼalal chachanunajik jujukoje xchiʼuk xachʼakbeik yorail jayibuk xemana li jujutose. Kʼalal chakʼelbeik skʼoplal ta jlikuk vune, kʼelik xchiʼuk albeik sloʼilal li tekstoetik te tsakal tale. Mi laj une nopik kʼuxi chavakʼ ta akuxlejalik li kʼusi laj achanike xchiʼuk kʼanbeik sbendision Jeova ti jech chavakʼ avipalike (1 Tim. 4:15; 1 Juan 5:14, 15). ¿Mi ta melel chkoltavan sventa lek xichʼ sbaik ta mukʼ li ta yut snaike?

11, 12. ¿Kʼusi sbalil la stabeik chib nupultsʼakal kʼalal la xchanbeik skʼoplal li slekil oʼontonale xchiʼuk ti lek chijkʼopoje?

¹¹ Jun nupultsʼakal ti kerem-tsebik toe tskʼan ti lekuk xbat li snupunelike, jech oxal lik xchanbeik lek skʼoplal li yabtel chʼul espiritue. Pe jaʼ mas to la xchanbeik skʼoplal li slekil oʼontonale. Xi chal li ajnilal kʼusi sbalil la stabeike: «Te laj kakʼkutik venta ti tukʼ stalelal xchiʼuk ti oy stukʼil yoʼonton li buchʼu oy slekil yoʼontone, jech oxal jaʼ la skoltaunkutik sventa xkichʼ jbakutik ta mukʼ. Mu xa bu ta jpas li kʼusi ta jkʼan jtukutike xchiʼuk ta jchʼaybe jba jmulkutik. Xchiʼuk nopem xa xkaʼikutik ti xi chkalbe jbakutike: “Kolaval”, “Paso perton”, xichikutik».

¹² Yan nupultsʼakale jaʼ lik xchanbeik skʼoplal ti lek noʼox chijkʼopoje. ¿Kʼu yuʼun? Yuʼun laj yakʼik venta ti jaʼ chlik-o skʼopik kʼalal muʼyuk lek tskʼopon sbaike. Xi chal li malalil kʼusi sbalil la stabeike: «Li kʼusi la jchankutike jaʼ ti mu chopoluk kʼusi jnopbe jbakutik ta ora ta jujuntale, moʼoj, ti kʼusie jaʼ ti jnopkutik ti lek li kʼusi la  spase, vaʼun jaʼ chkakʼ ta koʼontonkutik li kʼusi lek chkilbe jbakutike. Jech xtok, te lik ayanuk mas ta koʼontonkutik ti chkichʼ jbakutik ta mukʼe. Te laj kakʼ venta ti skʼan jtijbe yoʼonton kajnil sventa xal li kʼusi oy ta yoʼontone xchiʼuk ti mu chopoluk xkaʼi li kʼusi chalbune. Persa skʼan xkikta li jtoyobbaile. Vaʼun kʼunkʼun lekub batel li jtalelalkutike xchiʼuk mu xa bu mas ta jpak jkʼoplalkutik. Xkuxet koʼonton laj kaʼikutik». ¿Kʼusi xuʼ xkaltik ta atojolal xchiʼuk ta stojolal li avutsʼ avalale? ¿Mi xuʼ van skoltaoxuk ti xachanbeik skʼoplal li yabtel chʼul espiritue?

Kakʼ ta ilel xchʼunel koʼontontik kʼalal jtuk oyutike

13. ¿Kʼu yuʼun skʼan jchabi jbatik?

¹³ Skʼan me xkakʼ jbatik ta beiltasel ta stojolal chʼul espiritu skotol ora li yajtsʼaklomutik Cristoe, akʼo mi jtuk oyutik. Li ta slumal Satanás avie solel muʼyuk xa stukʼil li chʼayob oʼontonale xchiʼuk jaʼ tspukbe skʼoplal li lokʼoletik ti ibalik sba ti tsokesutik ta mantale. ¿Kʼuxi xuʼ jchabi jbatik? Jaʼ ti jchʼuntik li mantal liʼe: «Comtsanic scotol li cʼusitic mu xtune xchiʼuc li cʼusitic chopol ti epajem xae. Biqʼuit xavacʼ abaic cʼalal chavaʼyic li scʼop Dios ti tsʼunbil xa ta avoʼntonique, yuʼun jaʼ oy stsatsal xuʼ chacolic yuʼun» (Sant. 1:21). Ti kʼusi tskoltautik sventa sakutik ta sat li Diose jaʼ li xchʼunel koʼontontike. Jkʼeltik kʼuxi tskoltautik li jtos yabtel chʼul espiritu taje.

14. ¿Kʼuxi ta jpas-o jmultik kʼalal muʼyuk xchʼunel koʼontontike?

¹⁴ Skʼan me batsʼi kuxul xkiltik Jeova sventa xkakʼtik ta ilel ti oy ta melel xchʼunel koʼontontike. Ta ora me ta jpas jmultik mi mu jechuk chkiltike. Jnoptik avaʼi li kʼusi kʼot ta pasel ta skʼakʼalil Ezequiele, ti albat yuʼun Dios li kʼusi toj chopol tspas jlom yajtuneltak Jeovae, vaʼun xi albate: «¿Me chavil cʼusi tspasic ta mucul li moletic yuʼun achiʼiltaque, ta jujun scuartoic slocʼtaojic slocʼobal li diosetic yuʼunique? Li stuquique jech chalic: “Mu xijyilutic li Mucʼul Diose, yuʼun scomtsanoj xa li cosilaltic liʼi”» (Eze. 8:12). ¿Mi laj avakʼ venta ti kʼu yuʼun jech la spasike? Yuʼun muʼyuk ilbilik yuʼun Dios ti yalojike. Ta melel, xkoʼolaj kʼuchaʼal muʼyuk kuxul laj yilik li Jeovae.

15. ¿Kʼuxi tskoltautik kʼalal lek tsots li xchʼunel koʼontontike?

¹⁵ ¡Toj jelel stalelal i-echʼ maʼ Josee! Akʼo mi nom oy ta stojolal li yutsʼ yalale muʼyuk skʼan xchiʼinbe ta vayel li yajnil Potifare. Xi laj yal ti kʼu yuʼun muʼyuk jech la spase: «¿Cʼu yuʼun ta jpas li cʼusi toj chopole, xchiʼuc ti jaʼ sventa ta jta o jmul ta stojol Diose?» (Gén. 39:7-9). Ta melel, batsʼi kuxul laj yil li Jeovae. Mi jech batsʼi kuxul chkiltik eke, muʼyuk me ta jpastik ta mukul li kʼusi muʼyuk lek chile xchiʼuk muʼyuk me ta jchʼay-o koʼontontik skʼelel lokʼoletik ti ibalik sbae. Jaʼ jech jpʼel koʼonton ta jpastik kʼuchaʼal xi ikʼejin li jtsʼibajom yuʼun salmoe: «Jech coʼnton ti jaʼ ta jpas o cʼusi lec te ta jpasubmantale. Mu jcʼan xcacʼ jsat o ta sventa li cʼusi muʼyuc tuqʼue» (Sal. 101:2, 3).

 Jaʼ me chchabi koʼontontik ti jnaʼ jpajes jbatike

16, 17. 1) ¿Kʼuxi itsʼuj ta mulil jun «[kerem ti] solel muʼyuc [spʼijil]» kʼuchaʼal chal kaʼitik Proverbiose? 2) ¿Kʼusi xuʼ sokesutik jkotoltik avi kʼuchaʼal chakʼ kiltik ta pajina 26?

¹⁶ Li slajeb yabtel chʼul espiritue jaʼ ti jnaʼ jpajes jbatike. Kʼalal jnaʼ jpajes jbatike jaʼ me tskoltautik ta spʼajel li kʼusi mu skʼan Diose xchiʼuk ti akʼo jchabi koʼontontike (Pro. 4:23). Kakʼtik venta avil li kʼusi ikʼot pasel ti liʼ chal Proverbios 7:6-23. Oy jun kerem ti «solel muʼyuc sbijile», itsʼuj ta skʼob jun ants ti chchon sbae, yuʼun te iloʼlabat sjol ta «chiquin xoral». ¿Kʼu yuʼun te ijelav li kereme? Yuʼun naka noʼox van tskʼel yaʼi kʼusi te. Pe muʼyuk xakʼ venta ti kʼuyelan toj bol ti kʼusi la spase, ti «mu snaʼ me te xa [chcham-oe]».

¹⁷ ¿Kʼusi van la spas ti jechuke? Jaʼ ti lajuk xchʼun li mantal liʼe: «Mu [...] xachʼay ta be» (Pro. 7:25, Ch). ¿Kʼusi chakʼ jchantik taje? Mi ta jkʼan tsbeiltasutik li chʼul espiritue mu me stakʼ jtikʼ jbatik ti bu xuʼ jnuptantik prevae. Yuʼun xuʼ jech xkʼot ta jtojolaltik kʼuchaʼal li «[jun kerem ti] solel muʼyuc sbijile». Jtos ti kʼuyelan ta jchanbetik li xchopol talelale jaʼ ti kʼalal jujulikel ta jelulanbetik skanalil li televisione o ti xijlokʼ xij-och ta skʼelel Internete. Akʼo mi mu jechuk oy ta yoʼonton li jun krixchanoe, yikʼaluk van sta ta ilel li lokʼoletik ti tstij oʼontonal ta chiʼinejbail ta vayele, vaʼun xuʼ me jaʼ te xlik nopuk xaʼi skʼelel li pornografiae. Ta me sok tajek sjol yoʼonton mi nop xaʼi taje xchiʼuk ta me sok ti kʼuyelan xil sba xchiʼuk Diose. Pe maʼuk noʼox, yuʼun yikʼaluk van sta-o slajel (kʼelo Romanos 8:5-8).

18. ¿Kʼusi xuʼ jpastik sventa jchabi li koʼontontike, xchiʼuk kʼu yelan te chvinaj mi ta jpajes jbatik?

¹⁸ Melel onoʼox chaʼa, mu me teuk noʼox jkʼelojtik mi jtatik ta kʼelel junuk lokʼol ti tstij oʼontonal ta chiʼinejbail ta vayele: yuʼun skʼan xchiʼuk xuʼ kuʼuntik ta spajtsanel jbatik sventa mu jkʼeltik. Pe jaʼ me lek mi mu yolbajuk xbat jsaʼtike (Pro. 22:3). Kʼalal kak ta jnoptik lek li kʼusi ta jpastike xchiʼuk ti ta jpastik ta melele jaʼ me te chvinaj ti ta jkʼan ta jpajes jbatike. Toj lek li kʼusi tspas junantike, yuʼun jaʼ te chakʼ skomputadoraik ti bu xuʼ staik ta ilel yantike. Jlome snopojik lek ti jaʼ to tstunesik Internet o tskʼelik television mi oy buchʼu te xchiʼukike. Yantik xtoke muʼyuk tstunesik Internet (kʼelo Mateo 5:27-30). Ta melel, ti kʼusie jaʼ ti ta jujuntal skʼan oy kʼusi jpastik sventa jchabi jbatik xchiʼuk li kutsʼ kalaltike, yoʼ jech «lecuben xa coʼntontic ta [melel]» kʼalal chkichʼtik ta mukʼ Jeovae, «tucʼ cʼusi oy ta jol ta coʼntonti[k]» xchiʼuk «ti muc nacauc noʼox ta jcuy jbatic ti jchʼunojtique» (1 Tim. 1:5).

19. ¿Kʼuxi ta jtabetik sbalil kʼalal chkakʼ sbeiltasutik li chʼul espiritue?

¹⁹ Ta melel, toj ep me sbalil li talelaletik chakʼ chʼul espiritue. Jun noʼox koʼontontik ta tsobobbail kʼalal oy smukʼul koʼontontik xchiʼuk ti muʼyuk ta jtoy jbatike. Xkuxet koʼontontik ta kutsʼ kalaltik mi lek noʼox chijkʼopojutik xchiʼuk mi oy slekil koʼontontike. Li xchʼunel koʼontontik xchiʼuk ti jnaʼ jpajes jbatike jaʼ tskoltautik sventa nopoluk oyutik-o ta stojolal Jeova xchiʼuk ti sakukutik ta sate. Maʼuk noʼox taje, yuʼun xi chalbutik li Gálatas 6:8: «Li bochʼo jaʼ tstsʼun cʼusi tscʼan Chʼul Espiritue, jaʼ chcʼot scʼajbe sat li yabtel Chʼul Espiritue, jaʼ li cuxlejal sbatel osile». Jech, tstunes xchʼul espiritu Jeova sventa chakʼ kuxlejal sbatel osil ta skoj ti laj yakʼ sba ta matanal li Cristoe. Pe jaʼ noʼox me ch-akʼbat bendision yuʼun Dios li buchʼu chakʼ sba ta beiltasel ta xchʼul espiritue.

Jvules ta joltik

• ¿Kʼuxi chkoltavan sventa jun noʼox koʼontontik ta tsobobbail ti oy smukʼul koʼontontik xchiʼuk ti mu jtoybautikuke?

• ¿Kʼusi chkoltaat jun yajtsʼaklom Cristo sventa lek noʼox xkʼopoj xchiʼuk ti oyuk slekil yoʼonton ta yutsʼ yalale?

• ¿Kʼuxi tskoltautik li xchʼunel koʼontontik xchiʼuk ti jnaʼ jpajes jbatik sventa jchabi li koʼontontike?

[Sjakʼobiltak sventa xchanobil]

[Lokʼol ta pajina 24]

¿Kʼusi xuʼ jpastik sventa mu xijlik ta tsatsal utbail?

[Lokʼol ta pajina 25]

Tstabeik sbalil utsʼ-alalil kʼalal chchanbeik skʼoplal li yabtel chʼul espiritue

[Lokʼol ta pajina 26]

¿Kʼuxi mu jta-o jvokoltik kʼalal oy xchʼunel koʼontontik xchiʼuk ti jnaʼ jpajes jbatike?