ʼE Kotou Tuku Koa Ke Taki Koutou e Te Laumālie ʼo Te ʼAtua?
ʼE Kotou Tuku Koa Ke Taki Koutou e Te Laumālie ʼo Te ʼAtua?
“Ko tou laumālie ʼe lelei; ʼofa pē ke ina taki au ʼi te fenua ʼo te faitotonu.”—PES. 143:10.
1, 2. (a) Kotou fakahā he ʼu ʼaluʼaga neʼe fakaʼaogaʼi ai e Sehova tona laumālie māʼoniʼoni moʼo tokoni ki tana ʼu kaugana. (b) ʼE gāue pē koa te laumālie māʼoniʼoni ʼi te ʼu ʼaluʼaga makehe? Kotou fakamahino.
KOTEĀ ʼaē ʼe kotou manatu kiai mokā kotou fakakaukauʼi te gāue ʼa te laumālie māʼoniʼoni? ʼE kotou manatuʼi koa te ʼu gāue mālohi ʼaē neʼe fai e Seteone pea mo Samisoni? (Ktf. 6:33, 34; 15:14, 15) ʼE lagi kotou manatuʼi te lototoʼa ʼaē neʼe maʼu e te kau ʼuluaki Kilisitiano peʼe ko te loto tokalelei ʼa Setefano ʼi tana tuʼu ʼaē iā muʼa ʼo te Sanetualio. (Gāue 4:31; 6:15) ʼI totatou temi, koteā ʼaē ʼe tupu ai te toe fiafia lahi ʼi tatatou ʼu fakatahi fakamālamanei, mo te nofo agatonu ʼo totatou ʼu tehina ʼaē ʼe pilisoni ʼi tanatou mole kau ʼaē ki te ʼu tau, pea mo te tuputupu lahi ʼo te gāue fai fakamafola? Ko te ʼu faʼifaʼitaki fuli ʼaia ʼe ko he ʼu fakamoʼoni ʼo te gāue ʼaē ʼe fai e te laumālie māʼoniʼoni.
2 ʼE gāue pē koa te laumālie ʼi he ʼu ʼaluʼaga makehe peʼe fakatalakitupua? Kailoa ia. ʼE talanoa ʼi te Folafola ʼa te ʼAtua ki te ʼu Kilisitiano neʼe natou “haʼele ʼaki te laumālie,” neʼe ‘takitaki nātou e te laumālie,’ pea mo natou “maʼuli ʼaki te laumālie.” (Kal. 5:16, 18, 25) ʼAki te ʼu kupusiga palalau ʼaenī, ʼe tou mahino ai ʼe feala pē ki te laumālie māʼoniʼoni ke gāue ʼi te temi fuli pē ʼi totatou maʼuli. ʼI te ʼaho fuli pē ʼe tonu ke tou kole kiā Sehova ke ina fakaʼaogaʼi tona laumālie moʼo takitaki tatatou ʼu manatu, tatatou ʼu palalau, pea mo tatatou ʼu gāue. (Lau ia Pesalemo 143:10.) Kapau ʼe tou tuku ke gāue lahi te laumālie ki totatou maʼuli, pea ʼe tou fakatupu ai anai iā tātou ia tona fua, ʼo tou fakalotomālohiʼi ai te hahaʼi pea mo fakavikivikiʼi ai te ʼAtua.
3. (a) He koʼē ʼe ʼaoga ke taki tātou e te laumālie māʼoniʼoni? (b) Koteā te ʼu fehuʼi ʼaē kā tou vakaʼi ʼi te ʼalatike ʼaenī?
3 He koʼē ʼe maʼuhiga ke taki tātou e te laumālie māʼoniʼoni? Koteʼuhi ʼe ʼi ai te tahi mālohi ʼe faiga ke ina puleʼi tātou, ko te mālohi ʼaia ʼe fakafeagai ki te gāue ʼa te laumālie māʼoniʼoni. Ko te tahi mālohi ʼaia ʼe fakahigoaʼi ʼi te Tohi-Tapu ko “te kakano,” ʼe ko he ʼu meʼa ʼe holi kiai totatou kakano agahala, ko te tofiʼa ʼaia neʼe tuku mai e Atama heʼe tou hifo mai ai. (Lau ia Kalate 5:17.) Koteā te fakaʼuhiga ʼaē ke tou tuku ke taki tātou e te laumālie ʼo te ʼAtua? ʼE ʼi ai koa he ʼu meʼa ʼe feala ke tou fai moʼo tauʼi te fakaneke ʼo totatou kakano agahala? Tou vakaʼi te ʼu fehuʼi ʼaia, ʼi tatatou talanoa ki te ʼu agaaga e ono kei toe ʼo “te fua ʼo te laumālie,” ʼaē ko “te kātaki fualoa, te lotoʼofa, te agalelei, te tui, te agamalū, te loto lolomi.”—Kal. 5:22, 23.
ʼE Lagolago Te Agamalū Pea Mo Te Kātaki Fualoa Ki Te Tokalelei ʼo Te Kōkelekāsio
4. ʼE lagolago feafeaʼi te agamalū pea mo te kātaki fualoa ki te tokalelei ʼo te kōkelekāsio?
4 Lau ia Kolose 3:12, 13. ʼE ʼaoga ki te tokalelei ʼo te kōkelekāsio, ke maʼu ai te agamalū pea mo te kātaki fualoa. Ko te ʼu agaaga ʼaia ʼo te fua ʼo te laumālie ʼe tokoni mai ke tou felōgoi lelei mo ʼihi, ke tou nofo fakalogologo mokā ʼita mai he tahi, pea ke mole tou liufaki te kovi ʼaki te kovi. Kapau ʼe tou tokakovi mo he tehina peʼe ko he tuagaʼane, ko te kātaki fualoa ʼe tokoni mai anai ke mole tou fakamamaʼo mai ia ia kae ke tou faiga ke tou fakatokatoka te fihifihia. ʼE ʼaoga moʼoni koa ke tou agamalū pea mo kātaki fualoa ʼi te kōkelekāsio? ʼEī, heʼe ko tātou fuli ʼe tou agahala.
5. Koteā ʼaē neʼe hoko kiā Paulo pea mo Palenapa, pea koteā ʼaē ʼe fakahā lelei mai e te faʼahi ʼaia?
5 Kotou tokagaʼi te meʼa ʼaē neʼe hoko kiā Paulo pea mo Palenapa. Lolotoga ni ʼu taʼu neʼe nā gāue fakatahi moʼo fakamafola ia te logo lelei. Neʼe nā tahi maʼu tonā ʼu kalitātē. Kae ʼi te tahi lakaga, neʼe hoko iā nāua “te toe ʼita lahi, ʼo nā tahi māvete ai.” (Gāue 15:36-39) Ko te meʼa ʼaia neʼe hoko ʼe ina fakahā lelei mai, māʼiapē lā mo te ʼu kaugana agatonu ʼa te ʼAtua, ʼe feala ʼi ʼihi temi ke natou tokakovi. Kapau ʼe femahinohalaʼaki he ʼu tehina peʼe ko he ʼu tuagaʼane, koteā ʼaē ʼe feala ke natou fai ke mole liliu te ʼaluʼaga ʼaia ʼo kovi, ʼo tupu ai hanatou toe mole fegūfiʼaki?
6, 7. (a) Koteā te tokoni Fakatohi-tapu ʼe feala ke tou mulimuli kiai, ʼi muʼa ʼo hatatou ʼita mokā tou fai palalau mo he tehina peʼe ko he tuagaʼane? (b) Koteā te ʼu fua lelei ʼaē ʼe tou maʼu mo kapau ʼe tou ‘vave ʼi te fagono, mo tuai ʼi te palalau, mo tuai ʼi te ʼita’?
6 ʼAki te kupusiga palalau “te toe ʼita lahi,” ʼe kita mahino ai ko te fihi ʼa Paulo pea mo Palenapa neʼe hoko fakapunamaʼuli pea neʼe kovi ʼaupitō. Kapau ʼe logoʼi e he Kilisitiano ʼe kua kamata ʼita ʼi tana fai palalau mo hona tehina ki he faʼahi, ʼe lelei hana manatuʼi te tokoni ʼaē iā Sake 1:19, 20: “ ʼE tonu ki te tagata fuli pē, ke vave ʼi te fagono, ke tuai ʼi te palalau, mo tuai ʼi te ʼita; heʼe ko te ʼita ʼo te tagata, ʼe mole ina fakahoko te faitotonu ʼa te ʼAtua.” Kapau ʼe feala, ʼe lagi faiga anai e te tehina ke fetogi tanā fai palalau, peʼe ke tuku atu ki he tahi age temi, peʼe ke fai fakalelei naʼa faifai pē tanā fai palalau pea kovi ʼosi.—Taag. 12:16; 17:14; 29:11.
7 Koteā te ʼu fua lelei ʼaē ʼe tou maʼu ʼi tatatou mulimuli ki te tokoni ʼaia? Kapau ʼe fakamalu ifo e te tehina tona ʼita, mo faikoleʼi te faʼahi ʼaia, pea mo fakakaukauʼi peʼe feafeaʼi hana tali, ʼe ina tuku ai anai ia ia ke takitaki e te laumālie ʼo te ʼAtua. (Taag. 15:1, 28) ʼI te gāue ʼa te laumālie kiā ia, ʼe feala ai anai ke agamalū pea mo kātaki fualoa. ʼE feala ai ke ina manatuʼi ia te tokoni ʼaenī ʼe tuʼu iā Efesi 4:26, 29: “Kotou ʼiʼita, kae ʼaua naʼa kotou agahala . . . Ke ʼaua naʼa haʼu he palalau ʼuli mai tokotou gutu, kae ko he ʼu lea ʼe lelei moʼo laga mokā ʼe ʼaoga, ke feala hona ʼaoga kiā nātou ʼaē ʼe fagono kiai.” Koia, kapau ʼe tou fakatuputupu iā tātou te agamalū pea mo te kātaki fualoa, ʼe tou lagolago ai ki te tokalelei pea mo te logotahi ʼo te kōkelekāsio.
Kotou Fakalotomālohiʼi Tokotou Fāmili ʼAki Takotou Maʼu Te Lotoʼofa Pea Mo Te Agalelei
8, 9. Koteā te fakaʼuhiga ʼo te lotoʼofa pea mo te agalelei, pea ʼe feafeaʼi te maʼuli ʼi te loto fale mokā ʼe maʼuliʼi e te fāmili te ʼu kalitātē ʼaia?
8 Lau ia Efesi 4:31, 32; 5:8, 9. Ko te lotoʼofa pea mo te agalelei ʼe fakalotomālohi, ohagē ko te mokomoko ʼo te matagi pea mo hatatou ʼinu ʼo he moʼi vai momoko ʼi he ʼaho ʼe vevela. Kā fakahā te ʼu kalitātē ʼaia ʼi te loto fale, pea ʼe maʼuli fiafia te fāmili. Ko he tahi ʼe lotoʼofa ʼe ina fakalotofīmālie ʼihi, heʼe tokaga kiā nātou, ʼo hā ʼi tana ʼu aga pea mo tana ʼu palalau lotomahino. Ohagē pē ko he tahi ʼe lotoʼofa, kā agalelei he tahi, pea ʼe hā ʼi tana ʼu aga ʼaē ʼe lelei moʼo tokoni ki ʼihi. ʼE hā tāfito tana agalelei ʼi tana loto foaki. (Gāue 9:36, 39; 16:14, 15) Kae ʼe ʼi ai te tahi faʼahi ʼe hā ai ko he tahi ʼe agalelei.
9 Ko te agalelei ʼe aga fakapoipoi. ʼE mole hā pē anai ʼi te ʼu gāue ʼaē ʼe tou fai, kae ʼe liliu anai ko totatou ʼuhiga ʼaia ʼo tātou totonu, ʼaē ʼe ko he faʼahi ʼe maʼuhiga age. ʼE hagē ko he fuaʼi ʼakau ʼe malie pea ʼe mole pala ia ʼi loto. ʼO toe fēia aipē, ko te agalelei ʼaē ʼe fakatupu e te laumālie māʼoniʼoni, ʼe hā ʼi te ʼu faʼahi fuli pē ʼo te maʼuli ʼo he Kilisitiano.
10. Koteā ʼaē ʼe feala ke fai moʼo tokoni ki te fāmili ke natou fakatuputupu ia te fua ʼo te laumālie ʼi tonatou loto fale?
10 Koteā ʼaē kā tokoni ki he fāmili Kilisitiano ke natou lotoʼofa pea mo feagaleleiʼaki? ʼE maʼuhiga ʼaupitō ke natou maʼu ia te ʼatamai mālama totonu ʼo te Folafola ʼa te ʼAtua. (Kol. 3:9, 10) Ko ʼihi pule fāmili ʼe natou fakatuʼutuʼu ke natou ako te fua ʼo te laumālie ʼi tanatou Tauhi Fakafāmili ʼaē ʼe fai ʼi te afiafi. ʼE mole ko he fakatuʼutuʼu ʼe faigataʼa tona fai. Kotou filifili te ʼu ʼalatike ʼaē ʼe talanoa ki te ʼu agaaga takitahi ʼo te fua ʼo te laumālie, ʼo kotou fakaʼaogaʼi ia te ʼu kumiʼaga ʼaē ʼe kotou maʼu ʼi takotou lea. ʼE feala pē ʼi te vāhaʼa fuli ke kotou vakavakaʼi he ʼu palakalafe, ʼo kotou vakaʼi te ʼu agaaga takitahi ʼaia lolotoga he ʼu vāhaʼa. ʼI takotou ako he ʼalatike, kotou lau pea mo fai palalau ki te ʼu vaega Tohi-Tapu. Kotou kumi peʼe feafeaʼi hakotou maʼuliʼi te ʼu manatu ʼaē ʼe kotou ako, pea mo kotou kole kiā Sehova ke ina tapuakina takotou ʼu faiga. (1 Tim. 4:15; 1 Soa. 5:14, 15) ʼAki te taʼi ako ʼaia, ʼe feala moʼoni ai koa ke lelei age te ʼu felōgoi ʼa he fāmili?
11, 12. Koteā te ʼu fua lelei neʼe maʼu e te ʼu taumātuʼa Kilisitiano e lua ʼi tanatou ako ia te lotoʼofa?
11 Ko te taumātuʼa, ʼi tanā loto ʼaē ke fiafia tonā maʼuli fakataumātuʼa, neʼe nā fakatotonu ke nā ako fakalelei ia te fua ʼo te laumālie. Koteā te ʼu lelei neʼe nā maʼu? ʼE ʼui fēnei e te fafine ʼohoana: “ ʼI te tuputupu ʼo tamā mahino ki te lotoʼofa, neʼe lelei age tamā ʼu felōgoi ʼo aʼu mai pē ki te temi nei. Neʼe mā ako ai ke mā aga fakapotopoto, pea ke mā fefakamolemoleʼaki. Pea ʼi tamā fakatuputupu ʼaē te lotoʼofa, neʼe tokoni mai ke mā popoto ʼi te fefakamāloʼaki pea mo fefaifakaleleiʼaki mokā tonu ke fai te faʼahi ʼaia.”
12 Ko te tahi taumātuʼa Kilisitiano, neʼe tau mo tonā ʼu fihifihia ʼi tonā maʼuli fakataumātuʼa, pea neʼe mahino kiā nāua neʼe mole nā maʼu te lotoʼofa ʼi tanā ʼu felōgoi fakataumātuʼa. Neʼe nā fakatotonu ke nā ako tokolua te lotoʼofa. Koteā tona fua? ʼE manatuʼi fēnei e te tagata ʼohoana: “Ko tamā ako ia te lotoʼofa, neʼe tokoni mai kiā māua ke mā mahino ʼe mole tonu ke mā femahalohaloʼaki ʼo ʼuhiga mo te ʼu meʼa ʼaē ʼe mā fai, kae ke au kumi te ʼu kalitātē ʼo toku ʼohoana, ʼo fēia mo ia ʼo ʼuhiga mo au. Neʼe au kamata tokaga ki te ʼu meʼa ʼaē ʼe ʼaoga kiā ia, ʼo fēia mo ia, neʼe tokaga ki te ʼu meʼa ʼaē neʼe ʼaoga kiā au. ʼI taku maʼu te lotoʼofa, ʼe au tuku ai toku ʼohoana ke ina fakahā faʼifaʼitaliha tana ʼu manatu, ʼo mole au ʼita mokā palalau mai ki he meʼa. Ko tona fakaʼuhiga, neʼe tonu ke au lolomi iā te au toku fialahi. ʼI tamā kamata maʼuliʼi te lotoʼofa ʼi tomā maʼuli fakataumātuʼa, neʼe kua tahitahiga tamā fihi. Neʼe ko he ʼaluʼaga neʼe fakatupu fakafīmālie moʼoni ki tomā maʼuli!” ʼE maʼu anai koa e tokotou fāmili te ʼu lelei ʼaē ʼe maʼu ʼi te ako ʼo te fua ʼo te laumālie?
Tou Maʼu Te Tui ʼi Te ʼu Temi ʼAē ʼe Tou Tō Tokotahi Ai
13. Koteā te faʼahi ʼe tonu ke tou tōkakaga kiai naʼa fua kovi ki tatatou ʼu felōgoi ʼaē mo Sehova?
13 ʼE ʼaoga ke tuku e te kau Kilisitiano ke taki nātou e te laumālie ʼo te ʼAtua ʼi te ʼu temi ʼaē ʼe natou felōgoi ai mo niʼihi, pea ʼi te ʼu temi ʼaē ʼe natou tō tokotahi ai. Iā ʼaho nei, ʼi te mālama ʼa Satana, kua mafola ʼaupitō te fakahā ʼo te ʼu pāki heʼeʼaoga pea mo te ʼu fakafiafia fakalialia. ʼE feala ke fua kovi te ʼu faʼahi ʼaia ki tatatou ʼu felōgoi ʼaē mo Sehova. Koteā ʼaē ʼe tonu ke fai e he Kilisitiano? ʼE tokoni fēnei mai ʼi te Folafola ʼa te ʼAtua: “Ke kotou liʼaki te aga heʼemaʼa fuli pea mo te agakovi ʼaē kua lahi ʼaupitō, pea mo kotou tali ʼaki te agamalū ke tō te folafola iā koutou, ʼaē ʼe feala ke ina haofaki tokotou ʼu nefesi.” (Sake 1:21) Tou vakaʼi age muʼa, peʼe lava tokoni feafeaʼi mai te tui, te tahi agaaga ʼo te fua ʼo te laumālie, ke tou maʼa iā muʼa ʼo Sehova.
14. He koʼē ʼe feala ke agahala he tahi ʼe mole tui?
14 Ko te fakaʼuhiga tāfito ʼo te tui, ʼe ko hatatou tui ʼe maʼuli moʼoni ia Sehova ʼAtua. Kapau ʼe mole maʼuli moʼoni te ʼAtua kiā tātou, pea ʼe faigafua pē hatatou fai he aga ʼe kovi. Kotou tokagaʼi pe koteā ʼaē neʼe hoko ʼi te lotolotoiga ʼo te hahaʼi ʼa te ʼAtua ʼi te temi muʼa. Neʼe fakahā e Sehova ki te polofetā ko Esekiele te ʼu meʼa fakalialia ʼaē neʼe lolotoga fakahoko ʼi te ʼu loto fale, ʼo ʼui fēnei māʼana: “Kua ke sio koa, Ê foha ʼo te tagata, te meʼa ʼaē ʼe fai e te hahaʼi matuʼa ʼo te ʼapi ʼo Iselaele ʼi te pōʼuli, ʼo tahi nofo ʼi te ʼu koga fale ʼo tona tamapua matalelei? Heʼe natou ʼui fēnei: ‘ ʼE mole sio mai ia Sehova kiā tātou. Kua mavae ia Sehova ʼi te fenua.’ ” (Esk. 8:12) Neʼe kotou tokagaʼi koa pe koʼē neʼe hoko te faʼahi ʼaia? Neʼe mole natou tui neʼe sio ifo ia Sehova ki te ʼu meʼa ʼaē neʼe natou lolotoga fai. Kiā nātou, neʼe mole maʼuli moʼoni ia Sehova.
15. Koteā te puipui ʼe tou maʼu mo kapau ʼe tou maʼu he tui ʼe mālohi?
15 ʼI te tahi age faʼahi, kotou tokagaʼi ia te faʼifaʼitaki ʼa Sosefo. Logolā tana nofo mamaʼo mo tona fāmili pea mo tana hahaʼi, kae neʼe mole tali e Sosefo ke tono mo te ʼohoana ʼo Potifale. Koteā tona tupuʼaga? Neʼe ina ʼui fēnei: “ ʼE lava feafeaʼi anai haku fai te toe meʼa kovi ʼaia pea mo au agahala moʼoni ki te ʼAtua?” (Sen. 39:7-9) ʼEī, kiā Sosefo neʼe maʼuli moʼoni ia Sehova. Kapau ʼe maʼuli moʼoni te ʼAtua kiā tātou, pea ʼi te ʼu temi ʼaē ʼe tou tō tokotahi ai, ʼe mole tou sioʼi anai he ʼu fakafiafia heʼeʼaoga peʼe tou fai anai he aga ʼe tou ʼiloʼi ʼe mole leleiʼia e te ʼAtua. ʼE tou lotomālohi anai ohagē ko te tagata fai pesalemo ʼaē neʼe hiva fēnei: “ ʼE au haʼele anai ʼi te agatonu ʼo toku loto, ʼi toku loto fale. ʼE mole au tuku anai he meʼa ʼe kovi iā muʼa ʼo toku ʼu mata.”—Pes. 101:2, 3.
Kotou Loto Lolomi Ke Puipui Ai Tokotou Loto
16, 17. (a) Ohagē ko tona fakamatala ʼi te tohi ʼo Tāʼaga Lea, he koʼē neʼe tō ki te agahala ia ‘te talavou ʼaē neʼe mole he meʼa ʼi tona loto’? (b) Ohagē ko tona fakahā ʼi te pāsina 31, ʼe lava hoko feafeaʼi te faʼahi ʼaia ʼi totatou temi, peʼe tou tūpulaga peʼe tou mātutuʼa?
16 Kapau ʼe tou maʼu te loto lolomi, te agaaga fakamuli ʼo te fua ʼo te laumālie, pea ʼe feala ai anai ke tou fakafisi ki te ʼu aga ʼaē ʼe tauteaʼi e te ʼAtua. ʼE tokoni mai te kalitātē ʼaia ke tou puipui totatou loto. (Taag. 4:23) Kotou tokagaʼi ia te hisitolia ʼaē ʼe tou maʼu iā Tāʼaga Lea 7:6-23, ʼaē ʼe fakamatala ai pe neʼe tō feafeaʼi ‘te talavou ʼaē neʼe mole he meʼa ʼi tona loto’ ki te ʼu fakahala ʼa te fafine paomutu. Neʼe tō ki te hele ʼi tana ʼosi “fakalaka ʼi te ala ʼaē ʼe ovi ki te tuliki ʼo te fafine ʼaia.” Neʼe lagi fia ʼiloʼi meʼa fuli te talavou ʼaia, ko te tupuʼaga lā ʼaia ʼo tana ʼalu ʼi te koga meʼa ʼaē ʼe nofo ai te fafine paomutu. Mole tuai pea hē ki he agavale, “ ʼe lava mate ai tona nefesi.”
17 Koteā ʼaē neʼe feala ke fai e te talavou ke mole tō ki te tuʼutāmaki ʼaia? Neʼe feala ke ina manatuʼi ia te tokoni ʼaenī: “ ʼAua naʼa ke ʼeva ʼi tona ʼu ala.” (Taag. 7:25) ʼE ʼi ai te ako ʼe tou lava tāʼofi mai te hisitolia ʼaia: Kapau ʼe tou loto ke taki tātou e te laumālie ʼo te ʼAtua, pea ʼe tou tōkakaga anai ʼo fakamamaʼo mai te ʼu ʼaluʼaga ʼaē ʼe feala ai ke tou tō ki te fakahala. ʼE feala ke fakahalaʼi he tahi ke ina fai he agavale ohagē ko “te talavou ʼaē neʼe mole he meʼa ʼi tona loto,” mo kapau ʼe ina sioʼi te ʼu polokalama fuli ʼaē ʼi te televisio peʼe ʼi te Neti. Pe neʼe holi kiai peʼe kailoa, kae ʼe feala pē ke sio ki he ʼu felāveʼi fakasino heʼeʼaoga ʼe uga ai ia ia ke holi kiai. ʼE feala māmālie pē ke liliu ko hana agamāhani ia te sioʼi ʼo he ʼu pāki ʼe fai ai ni ʼu felāveʼi fakasino heʼeʼaoga, ʼo fua kovi ʼaupitō ai ki tona leʼo ʼo loto pea mo tana ʼu felōgoi ʼaē mo te ʼAtua, ʼo feala ai ke tuʼutāmakiʼia tona maʼuli.—Lau ia Loma 8:5-8.
18. Koteā te ʼu puleʼaki ʼe feala ke fai e he Kilisitiano moʼo puipui tona loto, pea he koʼē ʼe maʼua ke ina maʼu te loto lolomi moʼo fai te ʼu puleʼaki ʼaia?
18 ʼE mahino papau ia, ʼe feala pea ʼe tonu ke tou loto lolomi tuʼumaʼu, ʼo tou foimo molehi he pāki heʼeʼaoga mokā hā mai. Kae ʼi meʼa lelei age mo kapau ʼe tou fai he ʼu puleʼaki fakatomuʼa ke mole hoko te faʼahi ʼaia! (Taag. 22:3) ʼE maʼua ke tou maʼu te loto lolomi ke tou fai he ʼu puleʼaki moʼo puipui ai tātou ke ʼaua naʼa tou sio ki he ʼu pāki heʼeʼaoga, pea ke tou muliʼi te ʼu puleʼaki ʼaia. Ohagē lā, ko te puleʼaki lelei ʼe feala ke tou fai, ke tou hili te olotinatea ʼi he koga meʼa ʼe sio fuli kiai niʼihi. ʼI te manatu ʼa ʼihi, ʼe lelei age hanatou fakaʼaogaʼi te Neti peʼe natou sio televisio ʼi te temi pē ʼaē ʼe natou fakatahi ai mo niʼihi. Pea ko ʼihi, neʼe natou fakatotonu ke mole natou ʼai te Neti. (Lau ia Mateo 5:27-30.) ʼOfa pē ke tou fai te ʼu fakatuʼutuʼu fuli ʼaē ʼe ʼaoga moʼo puipui ia tātou pea mo totatou fāmili, ke feala ai hatatou tauhi kiā Sehova ʼaki “he loto ʼe maʼa pea mo he leʼo ʼo loto ʼe lelei pea mo he tui ʼe mole mālualoi.”—1 Tim. 1:5.
19. Koteā te ʼu lelei ʼe tou maʼu mo kapau ʼe tou tuku ke taki tātou e te laumālie māʼoniʼoni?
19 ʼE lahi te ʼu lelei ʼe tou maʼu mai te fua ʼo te gāue ʼa te laumālie māʼoniʼoni. Ko te agamalū pea mo te kātaki fualoa ʼe lagolago ki te tokalelei ʼo te kōkelekāsio. Ko te lotoʼofa pea mo te agalelei ʼe fakatupu ai he maʼuli fakafāmili fiafia. Ko te tui pea mo te loto lolomi ʼe tokoni mai ke tou nonofo ovi kiā Sehova pea mo nofo maʼa. Tahi ʼaē meʼa, ʼe fakapapau fēnei mai iā Kalate 6:8: “Ko ʼaē ʼe ina tō maʼa ko te laumālie, ʼe ina utu anai mai te laumālie te maʼuli heʼegata.” ʼEī, ʼo fakatafito ki te totogi ʼaē neʼe foaki e Kilisito, ʼe fakaʼaogaʼi anai e Sehova te laumālie māʼoniʼoni moʼo foaki te maʼuli heʼegata kiā nātou ʼaē ʼe natou tuku ke taki nātou e te laumālie.
ʼE Kotou Tali Feafeaʼi Anai?
• ʼE tou lagolago feafeaʼi ki te tokalelei ʼo te kōkelekāsio mo kapau ʼe tou agamalū pea mo kātaki fualoa?
• Koteā ʼaē ʼe feala ke tokoni ki te kau Kilisitiano ke natou lotoʼofa pea mo agalelei ʼi tonatou loto fale?
• Ko te tui pea mo te loto lolomi ʼe tokoni feafeaʼi ki he Kilisitiano ke ina puipui tona loto?
[ʼU fehuʼi ʼo te ako]
[Paki ʼo te pasina 28]
Koteā ʼaē ʼe feala ke tou fai ke ʼaua naʼa tou ʼiʼita mokā tou fai palalau mo he tahi?
[Paki ʼo te pasina 29]
Ko te ako ʼo te fua ʼo te laumālie ʼe feala ke fua lelei ki tokotou fāmili
[Paki ʼo te pasina 31]
Ko te ʼu tuʼutāmaki fea ʼaē ʼe tou tekeʼi mokā tou maʼu te tui pea mo te loto lolomi?