Gudiʼnu lugar guluíʼ espíritu stiʼ Dios laanu xi gúninu
Gudiʼnu lugar guluíʼ espíritu stiʼ Dios laanu xi gúninu
«Nabé nachaʼhuiʼ espíritu stiluʼ; guluiʼni naa guneʼ ni jneza.» (SAL. 143:10)
1, 2. 1) Bizeeteʼ chupa chonna de ca biaje huaquiiñeʼ Jiobá stipa stiʼ para gucané ca xpinni. 2) Ñee ora si chiguni ca xpinni Dios ti dxiiñaʼ risaca nga racané espíritu santu laacaʼ la? Bisiene ni.
XI RIDIʼDIʼ ndaaniʼ íqueluʼ ora runadiágaluʼ gucané espíritu santu binni dxiqué yaʼ. Zándaca redasilú lii guiráʼ ni biʼniʼ Gedeón ne Sansón (Jue. 6:33, 34; 15:14, 15). O zándaca guedasilú lii pabiáʼ nadxibalú guca ca primé xpinni Cristu ne ximodo qué nidxibi Esteban ora bidxiilú Sanedrín que (Hech. 4:31; 6:15). Ne pa guiníʼ íqueluʼ ni huazaaca ca tiempu riʼ, zándaca guietenaláʼdxiluʼ pabiáʼ nayecheʼ riuu ca Testigu ni reeda de gadxé gadxé guidxi ora guidagulisaacaʼ, ne modo qué ruchee ca xpinni Cristu neca guseguyoocabe laacaʼ purtiʼ qué riuucaʼ lu política, ne ora gúʼyaluʼ pabiáʼ zidale ca xpinni Cristu pur careeche diidxaʼ. Guiráʼ ni maʼ bidúʼyanu ca rusihuínnicani cayacané stipa stiʼ Jiobá laanu.
2 Yanna, ñee ora si chiguni ca xpinni Dios ti dxiiñaʼ risaca, ne ora nuu xquendanabánicaʼ ra naxoo nga racané espíritu santu laacaʼ la? Coʼ, cadi zacá diʼ ni. Biblia na canazá ca xpinni Cristu «modo rusiidi Espíritu Santu», «napa [ca] enda nabani ni rudii Espíritu Santu» ne «cayuni [ca] ni na Espíritu» (Gál. 5:16, 18, 25). Ca diidxaʼ ni maʼ bizéʼtenu ca rusihuínnicani zanda gacané stipa stiʼ Dios laanu guiráʼ ora. Nga runi, guiráʼ dxi naquiiñeʼ guinábanu Jiobá espíritu stiʼ para gacaneni laanu guiníʼ íquenu jneza, guininu ne gúninu ni riuulaʼdxiʼ Dios. Biblia na: «Bisiidiʼ naa guneʼ ni naluʼ, purtiʼ lii nga Dios stinneʼ. Nabé nachaʼhuiʼ espíritu stiluʼ; guluiʼni naa guneʼ ni jneza» (Salmo 143:10). Pa gudiʼnu lugar gacané espíritu santu laanu guiráʼ ora, zacaneni laanu gápanu ca guenda ni rudii espíritu ca, para gusisácanu Dios ne gacanenu sti binni.
3. 1) Xiñee naquiiñeʼ gudiʼnu lugar guluíʼ espíritu santu laanu xi gúninu. 2) Xi chupa guendarinabadiidxaʼ zacábinu lu tema riʼ.
3 Xiñee naquiiñeʼ gudiʼnu lugar guluíʼ espíritu santu laanu xi gúninu yaʼ. Purtiʼ nuu ti stipa ni cucaalú espíritu santu ne racalaʼdxiʼ stipa ca gucaa laanu gúninu ni na. Ora ruzeeteʼ Biblia de stipa ca la? caniʼni de modo riníʼ ique binni guidxilayú, ne cumu ralenenu donda bisaanané Adán laanu la? rucaa stipa ca laanu gucheʼnu (biindaʼ Gálatas 5:17). Ximodo rudiʼnu lugar gusiene espíritu santu ca laanu xi naquiiñeʼ gúninu yaʼ. Xi caquiiñeʼ gúninu para cadi guicá ni riníʼ ique binni guidxilayú laanu yaʼ. Yanna, guicábinu ca guendarinabadiidxaʼ ca ora maʼ zidúʼndanu de xcaadxi guenda ni napa espíritu santu ca. Ne laacani nga: Cadi guixhacaláʼdxinu stobi, cadi guninanu binni, gácanu nachaʼhuiʼ, cadi guiree chunu de lu neza stiʼ Dios, gácanu nadóʼ, ne gápanu xpiaʼnu o gucueezanu laca laanu (Gál. 5:22, 23).
Qué zadindenenu ca xpinni Cristu pa gácanu nadóʼ ne cadi guidxiichinu
4. Xi chupa guenda stiʼ espíritu santu zacané laanu para cadi chuʼdíndenu ne ca xpinni Cristu.
4 (Biindaʼ Colosenses 3:12.) Gunáʼ nga ca guenda ni racané laanu para cadi chuʼdíndenu ne ca xpinni Cristu yaʼ. Gácanu nadóʼ ne cadi guidxiichinu. Guiropaʼ guenda stiʼ espíritu riʼ racané cani laanu gácanu nachaʼhuiʼ, cadi guidxiichinu ora chuʼ tu gucaalú laanu, cadi guquíxenu ni guni binni laanu ora gábicaʼ o gúnicaʼ laanu xiixa ni guniná laanu. Ora gápanu xiixa guendanagana ne sti xpinni Cristu, qué zaníʼ íquenu maʼ qué zaca xhamígunu laabe, sínuque nagueendaca rúninu stipa pur gaca chaahuiʼ ni. Rihuínnica naquiiñeʼ gácanu binni nadóʼ ne cadi guidxiichinu ra ridagulisaanu, purtiʼ guiranu nácanu binni ruchee.
5. Xi bizaaca Pablu ne Bernabé, ne xi rusihuinni nga.
5 Guietenaláʼdxinu de Pablu ne Bernabé. Guirópacabe gúpacabe guenda sicarú ne maʼ xadxí de cucheechecabe stiidxaʼ Dios. Peru ti biaje gúpacabe ti guendanagana ne «nabé [gucuaayú nécabe ni] peru qué ñanda ñuu cabe tobi si», ngue runi «undaa saa cabe» (Hech. 15:36-39). Ni bizaaca ca rusihuínnini ti cosa: dede lade ca xpinni Cristu ni ruzuubaʼ diidxaʼ riuu guendaridinde. Pa guizaacanu zacá, xi zanda gúninu para cadi tinde diidxanu dede quíbanu ridxi ne pur nga gusaananu de guidxaaganu ti xpinni Cristu yaʼ.
6, 7. 1) Xi conseju zeeda lu Biblia zanda gacané laanu para cadi guidxiichi xhaatanu né sti xpinni Cristu. 2) Xi zabeendunu pa gánnanu gucaadiáganu, pa qué gundaa ruaʼnu xiixa, ne pa qué guidxiichi nagueenda.
6 Stale Biblia ruzeeteʼ málasi gudinde diidxaʼ Pablu ne Bernabé ne naroʼbaʼ guca guendanagana stícabe. Xi rusiidiʼ nga laanu yaʼ. Pa nápanu xiixa guendanagana ne ti xpinni Cristu ne gudiʼnu cuenta maʼ cadxiichi xhaatanu la? galán chinándanu conseju ni zeeda lu Santiago 1:19, 20: «Lachuu para ucaa diaga tu, peru cadi nisi undaa ruaa si tu xiixa, ne cadi casi ze tu idxiichi tu. Purti ora cadxiichi tuuxa la? qué zanda guni ni chuʼlaʼdxi Dios». Pa ganda la? zanda guchaʼnu de diidxaʼ, gusaananu ni caninu ca para sti ora o guininu chigúninu xiixa ne guireʼnu de raqué ante tíndenenu laabe (Pro. 12:16; 17:14; 29:11).
7 Xi guiráʼ zabeendunu pa chinándanu conseju ca yaʼ. Ora guyúbinu modo gucueezanu laanu, guni orarnu Jiobá ne guiníʼ íquenu ximodo guicábinu la? cudiʼnu lugar guluíʼ espíritu santu laanu xi naquiiñeʼ gúninu (Pro. 15:1, 28). Nga zacané laanu gácanu nadóʼ ne cadi guidxiichinu. Ne zacá ziuʼnu listu para chinándanu conseju ni zeeda lu Efesios 4:26, 29: «Pa idxiichi tu la? [...] lauyubi tidi ni nagueenda. Pacaa zuchee tu [...]. Cadi iníʼ tu diidxa ni guniná stobi, sínuque lainíʼ diidxa jneza ni zanda acané stobi uzuhuaa chaahuiʼ, ne ni acané tutiica guna diaga ni iníʼ tu». Casi maʼ bidúʼyanu ca, pa gácanu binni nadóʼ ne cadi guidxiichinu nagueenda la? zacanenu chuʼ ca binni ridagulisaa tobi si ne cadi chuʼdíndenu.
Riguʼnu gana binnilídxinu ora qué runinanu laacaʼ ne ora rácanu nachaʼhuiʼ né laacaʼ
8, 9. Ximodo zanda guiénenu diidxaʼ «qué runiná binni» ne diidxaʼ «nachaʼhuiʼ», ne ximodo racané cani laanu ndaaniʼ lídxinu.
8 (Biindaʼ Efesios 4:31, 32; 5:8, 9.) ¡Nabé nanixe runi sentirnu ora gundubi ti bi nisa laanu ne ora guideʼnu ti vasu nisa nagaʼndaʼ ti dxi nabé nandáʼ, purtiʼ riguu cani gana laanu! Zacaca nga runi sentir binni ora qué runinanu laacaʼ ne ora rácanu nachaʼhuiʼ ne laacaʼ. Ndaaniʼ lídxinu la? nabé racané ca guenda ca laanu para chuʼnu nayecheʼ ne binnilídxinu. Yanna, ximodo zanda guiénenu xi riníʼ guiropaʼ guenda ni rudii espíritu santu ca yaʼ. Diidxaʼ ni biquiiñecabe dxi gucuá Biblia ora guníʼcabe «qué runiná binni», caniʼni de ti guenda ni napa tuuxa ni racané sti binni ne rábibe binni diidxaʼ sicarú, purtiʼ dxandíʼ rizaaláʼdxibe laacaʼ. Cásica diidxaʼ «qué runiná binni», diidxaʼ biquiiñecabe para «nachaʼhuiʼ» ca, riniʼni de guenda ni rusihuinni tuuxa ora rudii de ni napa para gacané sti binni (Hech. 9:36, 39; 16:14, 15). Peru diidxaʼ nachaʼhuiʼ ca riniruʼ ni xcaadxi cosa.
9 Ti binni nachaʼhuiʼ runi puru si ni jneza lu xquendanabani. Rihuínnini lu ni runi, peru jma rihuínnini pur modo laa dede ndaaniʼ ladxidóʼ. Zeeda gácani casi ti cuananaxhi ni cuxuuxe ti gunaa para gudii binnilidxi. Naquiiñeʼ gácani nagüí ne nanaxhi dxiña, cadi gápani nin ti ndaa ra nayuudxuʼ. Zacaca nga rizaaca ne guendanachaʼhuiʼ ni rudii espíritu santu ca, ruzulú ni ndaaniʼ ladxidóʼ guiráʼ xpinni Cristu ne rihuínnini lu guiráʼ ni runi.
10. Xi zacané ca familia ca gápacaʼ ca guenda ni rudii espíritu santu ca.
10 Xi zacané ca familia ni naca xpinni Cristu para cadi guninacaʼ laacaʼ ne gácacaʼ nachaʼhuiʼ. Ti cosa ni jma risaca nga gunibiáʼ chaahuicabe Stiidxaʼ Dios (Col. 3:9, 10). Nuu de cani napa xiiñiʼ riguixhe íquecaʼ gacanecaʼ binnilídxicaʼ guiene ca guenda ni rudii espíritu santu ora runi adorarcaʼ Dios ne laacabe. Ñee zanda gúniluʼ zacaca la? Zanda gúniluʼ ni. Zanda iquiiñeluʼ ca libru ne revista ni nuu lu stiidxaluʼ, ne guyúbiluʼ ca tema ni cusiene de ca guenda ni rudii espíritu santu. Zanda gúʼndaluʼ chupa chonna párrafo cada biaje ne iquiiñeluʼ chupa chonna semana para guiéneluʼ cada guenda ni rudii espíritu santu. Ora gúʼndatu ca libru ne revista ni caníʼ de laacani la? laguundaʼ ca textu zeeda luni ne lagusiene cani. Despué, laguiníʼ ique ximodo zanda gúnitu cani biziiditu ca lu xquendanabánitu, ne laguinabaʼ Jiobá uguu ndaayaʼ ca stipa ni gúnitu (1 Tim. 4:15; 1 Juan 5:14, 15). Yanna, ñee dxandíʼ nga racanécani laanu para guibaninenu binnilídxinu jma galán la?
11, 12. Xi guleendú chupa guendaxheelaʼ ora biénecaʼ xi naquiiñeʼ gúnicaʼ para gácacaʼ nachaʼhuiʼ ne para cadi guninacaʼ sti binni.
11 Guzéʼtenu xi biʼniʼ ti guendaxheelaʼ ni cadi tan huaniisicaʼ, purtiʼ rápacaʼ gana cueenducaʼ ni galán. Gudixhe íquecabe guiene chaahuicabe guiráʼ ca guenda ni rudii espíritu santu, peru jma guyuuláʼdxicabe guiénecabe de guendanachaʼhuiʼ. Gunaa ca guníʼ xi guiráʼ guleenducaʼ: «Bidúʼyadu naca guendanachaʼhuiʼ ca ti guenda ni cayacané laadu para cadi chuʼ dxi guilaa xquendaxheeladu ne cadi guninadu laadu, nga huayacané laadu guibánidu jma galán. Maʼ bizíʼdidu cadi guicápedu tema lu xiixa ni racaláʼdxidu, gutiidiláʼdxidu stóndadu, ne laaca maʼ bizíʼdidu gudiʼdu xquíxepeʼ, ne pa guchee tobi de laadu la? rutiidiláʼdxidu stonda».
12 Sti guendaxheelaʼ gudixhe ique guiene chaahuiʼ xi zanda guni para cadi guniná sti binni, ne nga nga stobi de ca guenda ni rudii espíritu santu. Xiñee gudixhe íquecabe gúʼndacabe de laani yaʼ. Laacabe bidiicabe cuenta cayápacabe guendanagana lu xquendaxheelacabe purtiʼ qué gápacabe guenda ca. Hombre ca guníʼ xi guiráʼ guleendú: «Bizíʼdidu cadi galán diʼ guiníʼ íquedu mal de ni cayuni sti binni, sínuque gúninu stipa pur gúʼyadu ca cosa galán ni rúnidu. Ne cada tobi de laadu bizulú bizaalaʼdxiʼ xi caquiiñedu. Naa bidieeʼ cuenta caquiiñeʼ gudieeʼ lugar guiníʼ xheelaʼ xi cá ique ne cadi guidxiicheʼ pa qué chúʼladxeʼ xiixa ni gábibe naa, zacá nga zusihuinneʼ qué runenayaʼ laabe. Caquiiñeʼ gusaana de gudxiibaʼ laca naa. Chaahuiʼ chaahuiʼ maʼ gunda bichaʼdu modo laadu ne maʼ cadi cuyúbisidu ximodo gucaalúsaadu. Nabé gucané ngue laadu para chuʼdu jma nayecheʼ». Xi zanda guininu de lii ne binnilídxiluʼ yaʼ. Ñee zacané ca guenda ni rudii espíritu santu ca laatu pa gúʼndatu jma de laacani la?
Cadi guiréʼchunu de neza stiʼ Dios ora nuunu nezalú binni ne ora nuunu stúbinu
13. Xidé ndiʼ naquiiñeʼ chuʼnu cuidadu laanu ndaaniʼ guidxilayú riʼ.
13 Ca xpinni Cristu naquiiñeʼ chinándacaʼ ni rusiidiʼ espíritu santu guiráʼ ora, dede né ora guirutiʼ tu cayuuyaʼ laacaʼ. Ndaaniʼ guidxilayú riʼ, nuu stale cosa dxabaʼ ni riuulaʼdxiʼ binni guʼyaʼ, ne pa qué chuʼnu cuidadu la? zándaca gueeda guxhélecani laanu de Dios. Xi zanda gúninu para cadi guiábanu lu trampa stiʼ Binidxabaʼ yaʼ. Chinándanu conseju ni cudii Biblia: «Lacuee irá ni nadxaba de ndaani ladxidóʼ to, ne lausaana irá ni cadi jneza. Laucaalaʼdxi chi nanda tu stiidxa Dios ni ma ucuá xcu ndaani ladxidóʼ to, purti nga nga ni zanda ulá laatu» (Sant. 1:21). Ti cosa ni zacané laanu chuʼnu nayá nezalú Jiobá nga, fe ni nápanu laabe. Guidúʼyanu ximodo racané guenda ni rudii espíritu riʼ laanu.
14. Xiñee ruchee binni ora qué gapa fe.
14 Pa dxandíʼ nápanu fe Jiobá la? zadúʼyanu laabe casi ti binni ni dxandíʼ nabani. Pa qué guidúʼyanu laabe zacá la? jma nagueenda zucheʼnu. Guiníʼ íquenu ni bizaaca dxi bibani Ezequiel. Dios gudxi ni riguixhená riʼ xi guiráʼ cosa dxabaʼ cayuni caadxi de ca binni xquídxibe nagaʼchiʼ, ne gúdxibe laa sicaríʼ: «Xiiñiʼ hombre, ñee maʼ biiyuʼ xi cayuni ca hombre ni maʼ huaniisi ra nacahui, cada tobi de laacaʼ ndaaniʼ ca cuartu sticaʼ ra nápacaʼ guiráʼ ni runi adorarcaʼ. Purtiʼ caníʼcabe: “Cadi cayuuyaʼ diʼ Jiobá laanu. Jiobá maʼ qué guinni diʼ lu guidxilayú riʼ”» (Eze. 8:12). Ñee rudiʼnu cuenta paraa bizulú guendanagana ca la? Laacabe guníʼ íquecabe qué rudii diʼ Dios cuenta pa cayúnicabe cosa malu. Qué ñuuyacabe laabe casi ti binni ni dxandíʼ nabani.
15. Ximodo rapa fe stinu laanu.
15 ¡José qué ñaca diʼ zacá! Neca zitu nuube de binnilídxibe, qué ninabe ñaatanebe xheelaʼ Potifar, xpixuaanabe. Ne guniʼbe xiñee qué ñúnibe ni né ca diidxaʼ riʼ: «Qué zanda diʼ guneʼ guendaquéiquiiñeʼ riʼ ne gucheeniáʼ Dios pur laani» (Gén. 39:7-9). Racá ridúʼyanu biiyaʼ José Jiobá casi ti Dios ni dxandíʼ nabani. Pa laaca ridúʼyanu Dios casi tuuxa ni nabani la? qué zúninu cosa ni qué riuuláʼdxibe ora maʼ nuunu stúbinu, casi guidúʼyanu cosa dxabaʼ lu televisión. Zaguixhe íquenu gúninu ni biʼndaʼ salmista riʼ ora guníʼ: «Ndaaniʼ lidxeʼ zuneʼ ni jneza casi na ladxiduáʼ. Qué zaguixhediáʼ ni qué zaquiiñeʼ nezaluáʼ» (Sal. 101:2, 3).
Zápanu ladxidoʼno pa gánnanu gucueezanu laca laanu
16, 17. 1) Ximodo na Proverbios biaba ti hombre ni napa ti ladxidóʼ ni qué riene lu pecadu. 2) Casi cadúʼyanu lu yaza 26 ca, xi guendanagana zanda guniná laanu yanna, biaʼ tiica iza nápanu.
16 Últimu guenda ni racané espíritu santu laanu gápanu nga, gánnanu gucueezanu laca laanu. Pa nánnanu gucueezanu laca laanu la? zacané ni laanu gucáʼnanu ca cosa ni qué riuulaʼdxiʼ Dios ne zápanu ladxidoʼno (Pro. 4:23). Lu Proverbios 7:6-23 ruzeeteʼ de ti hombrehuiiniʼ ni napa ti ladxidóʼ ni qué riene, ne biábabe lu trampa stiʼ ti gunaa ni rizá zacasi. Gudxite gunaa que íquebe né ca diidxaʼ naxhi stiʼ lu calle gaxha de ralidxi. Xi bicaa hombrehuiiniʼ ca chitiidiʼ neza ralidxi gunaa ca yaʼ. Zándaca purtiʼ nuusibe gúʼyabe xi zazaaca ora tiidibe raqué. Peru qué nudiibe cuenta bicaa gunaa que laabe gúnibe ti cosa malu ni zuniná xquendanabánibe.
17 Xi naquiiñeʼ ñúnibe para cadi nucheebe yaʼ. Ninándabe ni na conseju riʼ: «Cadi [...] chuʼluʼ lu ca neza stibe» (Pro. 7:25). Xi rizíʼdinu de ni bizaaca hombrehuiiniʼ riʼ yaʼ. Pa racaláʼdxinu guluíʼ espíritu santu laanu xi gúninu la? naquiiñeʼ gúninu stipa pur cadi chuʼnu gaxha de xiixa ni zándaca gucaa laanu gucheʼnu. Tutiica zanda guni casi biʼniʼ hombrehuiiniʼ ni napa ti ladxidóʼ ni qué riene. Tobi de ca modo rié binni lu ti neza huaxiéʼ galán nga ora maʼ cutiixhi canal stiʼ televisión guiráʼ ora ne ora maʼ ziyuu lu gadxé gadxé yaza stiʼ Internet. Nécapeʼ cadi cuyubi binni ni la? zándaca málasi guiree xiixa foto stiʼ tuuxa binni xieeladi ne nga gucaa laa gapa viciu de guʼyaʼ idxa guidxa o cosa dxabaʼ. Pa tuuxa gapa viciu ca zanda guni biidiʼ ni xquendabiaaniʼ ne zuxheleʼ ni laa de Dios, ne dede zándaca guuti ni laa (biindaʼ Romanos 8:5-8).
18. Xi caquiiñeʼ guni ti xpinni Cristu para gapa ladxidóʼ, ne xiñee riquiiñeʼ ganna binni gucueeza laca laa.
18 Pa málasi guidúʼyanu xiixa cosa ni uquiinde laanu gúninu cosa dxabaʼ, nagueendaca naquiiñeʼ guireʼnu de raqué, naquiiñeʼ gusihuínninu zanda gucueezanu laca laanu ora guidxaagalunu ti guendanagana zacá. Ni jma jneza gúninu nga guidúʼyanu dede ante ximodo cadi guidxaagalunu ni (Pro. 22:3). Ora riguíxhenu xi gúninu para chuʼnu cuidadu laanu ne guni respetarnu cani, rusihuínninu nánnanu gucueezanu laca laanu. Nuu tu laa ruzuhuaa computadora stiʼ ti lugar ra zanda guʼyaʼ binnilidxi laa ora maʼ cayuni dxiiñaʼ luni ne galán ora gúnicabe zacá. Nuu tu laa riguixhe ique iquiiñeʼ Internet o guʼyaʼ televisión ora nuu sti binni né laa. Ne nuu tu laa maʼ gudixhe ique cadi liica iquiiñeʼ Internet ca (Mateo 5:27-30). Cada tobi de laanu naquiiñeʼ quixhe xi guni para gapa laca laa ne gapa binnilidxi, ti ganda chuʼ ladxidoʼno nayá ora guni adorarnu Jiobá ne cadi «chuʼ ni uchiiña xquenda biaani[nu]» ne «guni cre [nu] de idubi ladxidóʼ [no]» (1 Tim. 1:5).
19. Xi ribeendunu ora gudiʼnu lugar gabi espíritu santu laanu xi gúninu.
19 Casi maʼ bidúʼyanu ca, ribeendunu stale cosa galán ora nápanu ca guenda rudii espíritu santu. Pa gácanu binni nadóʼ ne gácanu binni ni qué ridxiichi nagueenda qué zadindenenu ca binni ridagulisaa. Pa qué guninanu binnilídxinu ne gácanu nachaʼhuiʼ ne laacaʼ la? zabáninu nayecheʼ ndaaniʼ lídxinu. Ora nápanu fe ne rucueezanu laca laanu zacané nga laanu ganda chuʼnu gaxha de Jiobá ne gácanu binni nayá nezalube. Peru cadi ngasi nga laani, Gálatas 6:8 ruzeeteʼ ca diidxaʼ riʼ: «Tu uyubi ni na Espíritu Santu la? zudii Espíritu Santu laa enda nabani ni qué zaluxe». Pur rini ni bixhii Cristu, zaquiiñeʼ Jiobá stipa stiʼ para gudii laanu guendanabani ni qué zaluxe. Peru laabe zaguube ndaayaʼ cani gudii si lugar gabi espíritu laacaʼ xi naquiiñeʼ gúnicaʼ.
Guietenaláʼdxinu ni maʼ bizíʼdinu
• Ora nácanu binni nadóʼ, ximodo racaneni laanu para cadi guidxiichinu ne cadi chuʼdindenenu ca xpinni Cristu.
• Xi zacané ti xpinni Cristu para cadi guniná binnilidxi ne gaca nachaʼhuiʼ ne laacabe yaʼ.
• Xiñee rápanu ladxidoʼno ora nápanu fe ne ora nánnanu gucueezanu laca laanu.
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 24]
Xi naquiiñeʼ gúninu para cadi tindediidxanu né tuuxa
[Ca dibuju/foto ni zeeda lu yaza 25]
Ribeendú ca familia ca ni galán ora gúʼndacaʼ de ca guenda ni rudii espíritu santu
[Ca dibuju/foto ni zeeda lu yaza 26]
Xiñee qué ziábanu lu guendanagana pa nápanu fe ne nánnanu gucueezanu laca laanu
