Walja bendicionanak katuqawayta

Arthur Bonno sat jilatan arsutaparjama

KHÄ 1951 maranxa, Edith sat esposajampix kimsa uru jachʼa tantachäwinkasipkayätwa, ukat misionerjam sarañataki mä tantachäwiw utjani sasaw yatiyapxi.

“¿Uka tantachäwir sarañäni?” sasaw wali kusisit Edith esposajar sista.

“Arthur jiwasax janiw misionerjam sarksnati” sasaw situ.

“Edith sarañäni, aliqakiw istʼaniwayañäni” sasaw sarakta.

Ukhamaw uka tantachäwir sarapxta, tukuyarux Escuela de Galaad satäkis ukar sarañatakiw pä solicitud churaniwayapxitu.

“¡Uka solicitudar phuqantañäni!”, sasaw esposajar sista.

“Arthur, ¿familiasasti?”sasaw situ.

Mara chikatanitxa, chiqapuniw Escuela de Galaad satäkis ukar sarapxta, ukat Sudamérica tuqinkir Ecuador markaruw khitapxitu.

Amuypachätawa, nayax qhanwa kuntï lurañ munkta uk arsusirïta ukat qʼaphakiw kuns lurirïta, ukampis esposajax wali llampʼu chuymanïnwa. Jupax Pennsylvania (Estados Unidos) markankir Elizabeth sat jiskʼa markanwa jilsutayna, janiw may kutis yaqha markanakar sarirïkänti, ukatwa jupatakix familiapat jayarstʼañax chʼamakïnxa. Ukhampachasa, yaqha markan Diosan arunakap yatiyir sarañäni satax jankʼakiw jan pächasis sarxarurakïna. Ukhamaw 1954 maran Ecuador markarux puripxta, ukanwa jichhürkamas Diosar yupaychasipkta. Misionerjam irnaqtʼasax kuna bendicionanaksa katuqawayapxta ukanak mä qhawqha awistʼapxäma.

Wali sumapunïnwa

Qullunak taypinkir Quito sat markaruw sarapxta. Guayaquil markat trenata ukat camionat sarasax pä urutwa puripxta (jichhürunxa kimsa tunka minutonakatakwa avionax ukar puri). Quito markanx pusi maranakaw Diosarux wali kusisit yupaychawayapxta. Ukat 1958 maranxa wali kusiskañänwa; tamanak tumptʼiritwa uttʼayapxitu.

 Uka tiemponx pä circuitonakakiw utjäna, ukatwa tamanakar visitkasax kawkintï Jehová Diosan Qhanañchirinakapax jan utjkäna uka jiskʼa markanakan walja semananak yatiyapxirïtxa. Alojamientox janiw utjirïkiti, mä utakwa katupxirïta, ukax jan ventanani ukat chʼusakïriwa, mä catrekiw utjiri. Ukatwa viajisax mä cajon apasipxirïta, ukaruw anafre, mä phukhu, platonaka, mä bañadorita, sábana, mosquitero ukat pirqan utjki uka pʼiyanak tapantañatakix pasat periodiconakampi apasipxirïta, ukhamat jachʼa achakunakan jan mantanipxañapataki, uka cajonarurakiw isimp kun apasipxirïta.

Alojasipxirïkta uka utanakax wali chʼamaka ukat pʼiya pʼiyäkchïnsa, wali sum uka manqhan parltʼasipxirïta; anafret mä jukʼa phaytʼasisax catrer quntʼasisaw manqtʼasipxirïta, ukat kunaymanit parltʼasipxirïta. Esposajax ukhaw kunjamsa jilat kullakanakarux uñjañaxa uk arstʼiri, nayax chuym ustʼayirjamaw awisax ratuk kuns arsurïta. Ukham arxayatapatwa, tamanak visitkasax mayninakar jukʼamp munasiñamp uñjxirïta. Ukat jan amuytʼasis mä jilatat jan ukax mä kullakat jan wal parlxayirïkta ukhasti esposajax janiw ukham parlañ munirïkiti. Chiqas jila partex kuntï Yatiyañataki sat revistat yatiqapkta ukat yatiykasax kuna experiencianakas utjapxitu ukanakatwa parltʼasipkirïta. ¡Walja experiencianakaw utjapxitäna!

Carlos sat chacharuw thaqhapxta

Ecuador markan inti jalant tuqinkir Jipijapa markanwa mä chachax Diosan arunakapat yatxatañ muni sasaw yatiyapxitu. Ukampis janiw kawkin jakatapsa yatipkayätti, ukhampachaw mä alwax thaqhir mistuwayapxta. Uka arumax walpun jallux purintatayna, ukatwa thakix wali niqʼiraränxa, jiskʼa qutanakas ukjarakïnxa. Nayax nayraqatwa saraskayäta, ukat akatjamatwa Edith esposajax “¡Arthur!” sasin artʼanitu. Uñtta ukhasti, qunqurkam ñiqʼir sayantatwa uñjta, nätakix wali larusiñjamäkchïnsa, esposajar jachir uñjasaw jan larxirïkti.

Uka chʼiyar ñiqʼit waysta, sapatonakapasti ñiqʼi manqharuw achuntxäna, ukatwa uñchʼukisipkitäna uka jiskʼa imillampir lluqallampirux “apsupxätax qullqi churapxäma” sista. Jupanakax jankʼakiw apsunipxi. Esposajax jariqasiñwa munäna. Uka wawanakan mamapax utapatwa uñchʼukisinkatayna, ukat jutapxam sasaw jawsanipxitu. Jupaw esposajar jariqasiñ yanaptʼi, wawanakax zapatonak jariqapxaraki. Ukat sarxañatakix Carlos Mejía sat chacharuw thaqhasipkta sasaw uka warmir sista, jupax muspharataw uñkatitu, ukat esposojäwa sasaw situ. Mä qhawqha tiempotxa, familpacharuw Bibliat yatichapxta ukat taqinirakiw bautisasipxi. Qhipa maranakatxa, chacha warmi ukat pä wawanakapampiw precursor especialjamax Diosar luqtawayapxi.

Jaya viajenaka ukat munasiñampi katuqtʼata

Tamanak tumptʼir sarañax chʼamakïnwa. Tamanakar puriñatakix microta, camionata, canoata ukat avionetat sarapxirïta. Mä kutixa, tamanak tumptʼir jilatanakar uñjiri John McLenachan jilatampi ukat Dorothy sat esposapampiw Colombia marka jakʼan chawllanak katupki uka jiskʼa maranakar yatiyir sarapxta. Ukat motorani mä canoat sarapxta, walja tiburonanak utjkäna uka chiqnämwa pasawayapxta. Canoa apnaqir chachax sumsa apnaqañ yatkchïnxa, canoa ukchʼa tiburón animalar uñjasax sustjasïnwa. Ukatwa lamar quta thiynämak sarañ amtawayi.

Jan waltʼäwinakas utjkchïnxa, tamanak tumptʼir sarañax kusiskañänwa. Suma chuymamp katuqtʼasir jilat kullakanakaruw uñtʼaniwayapxta. Jupanakax urun may kutikis manqʼasipxirïkchixa, nanakarux manqʼasipxapunim  sasaw kims kuti manqʼayapxirïtu, ukat pampansa ikipxañapäkchïnxa catrerupuniw ikiyapxirïtu. Ukatwa Edith esposajax akham siri: “Jakañatakix jukʼa yänakaki munasitapwa aka jilat kullakanakat yatiqawayta” sasa.

“Janiw kunarus janiw sañ munapkti”

Khä 1960 maranx yaqha kusisiñaw utjarakïna, Ecuador markankir Betel utan irnaqañatakiw invitapxitu, ukasti Guayaquil markankiwa. Nayax oficinanwa yanaptʼayäta, esposajasti uka jakʼankir mä tamampiw yatiyaskäna. Nayax janiw oficinan trabajañatakix wakichtʼatäkayätti, ukampis kunjamtï Biblian siskixa Diosaw “munañapa lurapxaña[satakix]” wakichtʼistu (Heb. 13:21, MT). Pä maratxa, Brooklyn (Nueva York) markankir Betelan Escuela de Galaad satäkis ukan yatiqir sarañatakiw invitapxitu. Uka tiemponxa, warminakax kawki chiqantï Diosat yatiyasipki ukanwa escuela tukuyañapkamax suyapxañapäna. Esposajarux Brooklyn pachpatwa tunka phaxsinak sapaki qhiparasmati janicha uk sum amuytʼasim sasin mä carta apayanipxatayna.

Edith esposajax akham sasaw mä carta kuttʼayäna: “Ukarjam phuqañax chʼamakïniwa, ukampis Jehová Diosaw kuna jan waltʼäwir atipañsa yanaptʼapxitani. [...] Janiw kunarus janiw sañ munapkti, ukham yatiqasaw lurañanakajampi sum phuqañatakis jukʼamp wakichtʼatapjäxa” sasa. Brooklyn markankkayäta ukhax sapa semanaw esposajax mä carta apayanirïtu.

Diosar taqi chuym luqtir jilat kullakanakaruw uñtʼawayapxta

Ukat 1966 maranxa, usuntatax laykuw Quito markar kuttʼapxta, ukanwa misionerjamax wasitat luqtapxayäta. ¡Ukankir jilat kullakanakax taqi chuymaw Diosar yupaychapxäna!

Mä kullakarux chachapaw sapa kuti nuwirïna. Mä urux suxta alwa horasaruw wasitamp nuwjatap yatiyapxitu, ukat tʼijukamakiw sarta. Purta ukhasti walpun muspharta, kullakax qʼala chʼuxñsuta ukat pʼusuntata ukhamaw ikiñankaskatayna. Pichañ lawa pʼakjañkamaw esposopax jawqjatayna. Ukürux mayamp kuttʼasaw chachapar jikxatta, ukat ukham luratamax janipuniw walïkiti sistwa, jupasti kunayman arunakampiw wal disculpa mayisiraki.

Khä 1970 maranak qalltanxa, waliptxayätwa, ukat wasitampiw tamanak tumptʼirjam irnaqxayäta. Ibarra markankir tamanakar visitiriw sarañajäna, uka markarux nayra 1950 maranak niya tukuyaruw visitayäta. Ukanxa Jehová Diosan Qhanañchirinakapax paninikïnwa, mä misionerompi ukat uka pachpankir mä jilatampi. Ukatwa mayampi kuttʼañxa wal munapxayäta, ukhamat jilat kullakanakar uñtʼañataki.

Kunapachatï tantachäwir sarapkta ukhax Rodrigo Vaca sat mä jilataruw tantachäwin arstʼañax waktʼäna, ukat tantachasirinakan  arstʼanipxañapatak jisktʼkäna ukhaxa, arstʼañ munapki uka jilat kullakanakax ampar luqtañat sipansa “naya” “naya” sasaw artʼapxäna. Esposajampix amukiw uñkatasipxirïta, “¿kunataraki ukhamäpacha?” sasaw lupʼirïta. Ukat jilatax juykhütapwa yatxapxayäta, tamankirinakarux arupatakwa sapa maynir uñtʼäna. ¡Ukhamaw jupax uwijanakapar sum uñtʼäna! Ukasti Jesusax suma awatirit Juan 10:3, 4, 14 qillqatan parlkäna ukwa amtasipxta, ukansti awatirix uwijanakapar sum uñtʼi ukat uwijanakapas sum jupar uñtʼapxaraki siwa. Uka jilatax jichhakamaw irpir chuymanjama ukat precursor especialjamax Diosatak irnaqtʼaski. * Ibarra markanx suxta tamanakaw jichhax utjxi, ukanakatxa mayax quichua, ukat mayax amparampi parlirinakaraki.

Jehová Diosan khuyapayasiñapatxa walpun yuspärta

Jehová Diosax wali khuyaptʼayasirïtapwa 1974 maran uñjawayapxarakikta, uka maraw Betelan irnaqañatakix wasitat jawsapxitu. Ukanxa wasitatwa oficinan yanapayäta, ukat qhipatxa sucursalan pʼiqtʼir jilatanakat maynirïñatakiw uttʼayapxitu. Edith esposajästi cocinankänwa, qhipat oficinankxarakïnwa, jichax correonakwa katuqi ukat apayaraki.

Ukhat jichhakamax Escuela de Galaad satäkis ukat jutirinakarux waljaniruw katuqawayapxta. Jupanakax suma amuytʼasiri ukat wali kʼuchiki irnaqtʼasax wal tamanakar chʼamañchtʼawayapxi. Ukat niya kimsa tunka markanakat Ecuador markar purinir jilat kullakanakar uñjañax walpun chʼamañchtʼapxitu. Jupanakan ukham chʼamachasipxatapax wali muspharkañawa. Jaya chiqanakar sarañatakix autonak alapxi, machaq tamanak uttʼayapxi, Tantachasiñ Utanak lurañ yanaptʼapxi ukhamawa. Taqpach kullakanakatxa, walja solteranakaw utji. Jupanakax wali qʼapha ukat kʼuchi kullakanakäpxiwa.

Kunjamtï amuyktaxa, cristianjam Diosar yupaychkasax walja bendicionanak katuqawayta. Taqi ukanakatxa Jehová Diosan amigopäñaw jukʼamp sumaxa. Ukat Diosax mä suma “yanaptʼiri” churarakitu, ukatwa walpun yuspärtxa (Gén. 2:18). 69 maranak casaratäjatax lupʼisaxa, kuntï Proverbios 18:22 qillqatan siski ukwa amtasta, ukansti akham siwa: “[Suma] esposa jikxatañax suma aski jikxatañawa” sasa. ¡Edith esposajampi jakañax wali sumapuniwa! Jupax kunaymanitwa yanaptʼawayitu. Ukhamarakiw mamaparus wali munasiñampi uñjawayi. Ecuador markar jutxapxayäta ukhatpachwa sapa semänan mä carta apayiri, mamapax 97 maraniw 1990 maran jiwawayxi.

Nayax 90 maranïxtwa, Editax 89 maranïxarakiwa. Jichhakamax niya paqallq tunkaniruw Jehová Diosan markapar mantañ yanaptʼawayapxta. Akat 60 maranak nayra Escuela de Galaad satäkis ukar sarañatak sulicitud churapkayäta uk amtasisax wal kusisipxta. Kuntï uka maran amtawayapkta ukaw walja bendicionanak katuqañatakix yanaptʼawayapxitu.

[Qhanañchäwi]

[29 janan fotopa]

Nueva York markankir Yankee estadionana, Escuela de Galaad satäkis ukar nanak chik sarir misioneronakampi (1958)

[31 janan fotopa]

Tamanak tumptʼkasinwa mä familiar visitapxta (1959)

[32 janan fotopa]

Ecuador markankakir Sucursalana (2002)