¿Khiti tuqis Jehová Diosax irpaskistu uk amuyasisktanti?

DIOSAN markapax Egiptot mistunxän ukhaxa, qinayaw jupanakamp chikax saräna ukat arumanakax uka qinayax ninaruw tuküna. Janipuniw israelitanakasa ni egipcionakas ukham uñjapxirïkänti. Ukampis ¿khitis ukanak uñstayäna ukat kunatakïnsa? Ukhat jichhakamax 3.500 maranakäxiwa, ukampis Israelitanakax “nina” ukhamarak ‘qinaya’ uñjapxatapatxa, ¿kunsa yatiqsna? (Éxo. 14:24.)

Khitisa ukat kunatakis uka milagro luräna ukxa, akham sasaw Bibliax qhanañchi: “[Jehová] Tatitusti jupanakan nayraqatapwa saräna, uruxa mä qinayjamaw saräna thaki uñachtʼayañataki, arumasti mä ninarakiw qhantʼäna. Ukhamatwa jupanakax sarapxäna uruy aruma” sasa (Éxo. 13:21, 22). Ukhamasti, israelitanakax Egiptot mistupkäna ukhaxa, nina ukat qinaya tuqiw Diosax jupanakar irpäna. Qinayamp chikaw chʼusa pampnäm kawkikamas sarapxañapäna, ukat Faraonax ejercitopampi israelitanakar jiwayañatak wakichasisipkän ukhaxa, israelitanakar jan jakʼachasipxañapatakix qinayampiw Diosax chʼamaktʼayäna, ukhamatwa markapar jarkʼaqäna (Éxo. 14:19, 20). Uka qinayax janiw chiqak Suma Uraqir irpkänti, ukampis uka qinayamp irpayasisakiw Israelitanakax ukar puripxasapäna.

Uka qinayaxa, Jehová Diosax israelitanakamp chikäskatapwa uñachtʼayäna. Uka tuqirakiw Diosax jupanakar parlxayäna (Núm. 14:14; Sal. 99:7). Israel marka pʼiqtʼañapatak Moisesar ajllitapxa uka tuqirakiw Jehová Diosax uñachtʼayarakïna (Éxo. 33:9). Kunjamtï qinayat parlki uka qhipa jiskʼa tʼaqan qhanañchaskixa, qinay tuqirakiw Moisés lanti Josué chachar Israel markan pʼiqtʼiripjam uttʼayasitapax qhanañchasïna (Deu. 31:14, 15). Israelitanakax Egiptot mistxasaxa, khiti tuqis Diosax jupanakar irpaskäna uk amuyapxañapäna ukat ukampiw irpayasipxañapäna, ukhamat taqi kunans sum sarantapxañapataki.

Qinayax kunatakïnsa uk armtʼasipxäna

Qinay uñjasax walpunwa israelitanakax qalltan muspharapxpachäna. Ukampis uka milagro sapür uñjkasas janikiw Diosar atinisipkänti. Walj kutiw Dios tuqix arusipxäna. Sañäni, egipcionakax jupanakar arktanipkäna ukhax janiw Diosar qhispiyiriparjam uñjapkänti, antisaw Moisés profetapar kunatsa akan jiwapxañajatak irpsunipxista sasin juchañchapxäna (Éxo. 14:10-12). Wila lamar quta paskatasasti, manqʼas umas tukusiniwa sasaw Moisesatakisa, Aaronatakisa ukat Jehová Diosatakis arusipxäna (Éxo. 15:22-24; 16:1-3; 17:1-3, 7). Ukat walja urunak pasatatxa, mä waka qallu qurit lurarapipxita sasaw Aaronar waytʼapxäna. Uñjksnas ukham amuytʼañäni. Carpanakap jakʼanxa, ninas qinayas sum uñjasiskäna, ukaw qhispiyir Jehová Diosax jupanakampïskatap uñachtʼayäna. Ukampis maysa tuqinxa, jan jakañäni idoloruw akham sas yupaychasipkäna: “¡Israel, akawa Egiptota irpsunktam uka Diosamaxa!” sasa. Diosar jan respetasaw uka “jan walinaka lura[pxäna]” (Éxo. 32:4; Neh. 9:18).

Jan istʼasis lurasaxa janis Diosampix irpayasiñ munapkaspa ukham uñachtʼayapxäna. Kunjamsa Diosax jupanakar irpaskäna ukat kunatsa Jupar arkapxañapäna ukxa  janiw amuyapkänti. Qinay sum uñjasipkäna, ukampis janikiw yäqapkänti. Ukham lurasax “Israelan Qullanaparuw llakisiyapxäna”. Ukhampachas Diosax jupanakat khuyaptʼayasïnwa, ukatwa qinay tuqix Suma Uraqir puriñkam irpaskakïnxa (Sal. 78:40-42, 52-54; Neh. 9:19).

¿Khiti tuqis Diosax irpaskistu uk amuyasisktanti?

Jichhüruns Diosax markapar irpaskakiwa. Kawkïr thakinjams sarapxani ukxa janiw israelitanakan amtapxañapxa Diosax munkänti. Jiwasarux janirakiw paraisor mantañasatakix sapaki jaytkistuti, jan ukasti, Jesusaruw tamap pʼiqtʼañapatakix ajlliwayi (Mat. 23:10; Efe. 5:23). Jesucristosti, Amuyasiri Chiqapa Uywataruw tamap pʼiqtʼañapatakix uttʼayaraki. Jupanakax jichha tiempon jakapki uka ajllit cristianonakawa. Ukat jupanakarakiw tamanak uñjapxañapatakix irpir chuymaninakar uttʼayapxi (Mat. 24:45-47, MT; Tito 1:5-9).

¿Amuyasiri Chiqapa Uywatana, jan ukax mayordomon utjaskapunitap kunjamatsa yatsna? Jesucristo pachpaw akham säna: “¿Khitirak suma phuqhiri amuytʼan mayordomosti, khitirutï utanipax utapankirinakar horasapar manqʼayañatak jaytisti? Kusisiñaniw kawkïr uywatarutix utanix purinisax taqi lurañanakap phuqhaskir jikxatki uka uywataxa” sasa (Luc. 12:42, 43).

Nayraqatxa, uka ajllit cristianonakax chiqapawa. Mä arunxa, Diosatsa, Jesucristotsa, Bibliatsa ukat Diosan markapatsa janiw jithiqtawayapkiti. Ukatsti amuyasirirakiwa, kunattix ‘Diosan reinopat suma yatiyäwinaka’ yatiyasiñapatakisa ukat akapachankir jaqinakar Jesusan arkiripar tukuyañatakis sum amuytʼasisaw pʼiqtʼasipki (Mat. 24:14; 28:19, 20, NM). Ukat taqi chuym phuqasarakiw Dios tuqit yatichäwinak manqʼäkaspas ukham “horasapar” churistu. Chiqas Jehová Diosaw Amuyasiri Chiqapa Uywatarux yanaptʼi, ukatwa tamapax jiltaskixa. Ukat markaparux suma amtanakar puripxañapatakisa ukhamarak Biblian chiqa yatichäwinakap jukʼamp qhan amuyapxañapatasis yatiñkankañ churaraki. Uñisirinakapat jarkʼaqarakiwa ukat sum jikxatasipxañapatakis yanaptʼarakiwa (Isa. 54:17; Fili. 4:7).

Yanaptʼasir Diosar yuspärañäni

¿Jehová Diosarux kunjamsa yanaptʼapat yuspärsna? Apóstol Pablox akham siwa: “lstʼapxam irpirinakamaruxa, jaysapxarakim jupanakaruxa” sasa (Heb. 13:17). Chiqas uka arunakarjam phuqañax chʼamakïspawa. Moisesax jakkäna uka tiemponkir mä israelitäkasmas ukham amuytʼañäni. Walja urunakaw qinayan irpatax wasar pampnäm saraskasma. Ukat akatjamat uka qinayax saytʼxarakispa. Uk uñjasax akham sasaw amuytʼasisma: “¿Qhawqha urunakaraki akan qhiparpachanisti? ¿Mä uru? ¿mä semana? Jan ukax ¿walja phaxsinakänicha?” sasa. Ukat qʼipinakaj jararati janicha sasaw jisktʼasirakisma. Apsusikïcha sasaw yaqhiq yänakam qʼipimat apsusirakisma. Ukampis walja urunak pasxarakispa, sapürus qʼipinakakti thaqhaskästi sasaw taqpacha yänakam apsusxarakisma. Ukat apsuñ tukuyxasma ukharak qinayax wasitat sartawayxaspa, ukhax wasitat apthapisiñaw wakisirakispa. ¿Janixay ukax walïkaspatixa? Ukampis mun jan muna apthapisisin markamp chika ‘sarxaruñamaw’ wakisispa (Núm. 9:17-22).

¿Jehová Diosax akham luräta siskistu ukhax kunjamsa katuqasisktanxa? ¿Jankʼakiti ukarjam lurtanxa, jan ukax nayra tiempon yatkayätan ukarjamakich luraskaktanxa? Sañäni: Bibliat yatichañataki, yaqha markat jutirinakar yatiyañataki, Comités de Enlace con los Hospitales satäkis ukar yanaptʼañataki ukat jachʼa tantachäwinakan sum sarnaqañ tuqita, taqi ukanakat jichhak iwxtʼapkistu ukarjamati lurasktanxa. Maysa tuqitsti, iwxanakapar istʼasarakiw Diosar yuspäratas uñachtʼaytanxa. Wakiskir amtar puriñatakis  janiw amuyusarux atinisktanti, jan ukasti Jehová Diosampi ukat markapampiw yanaptʼayastanxa. Kunjamtï mä wawax wal thaytʼanipan tatapan ukar tʼijtkixa, ukhamarakiw jan waltʼäwinak utjki ukhax taman yanaptʼap thaqtanxa.

Diosan markapar pʼiqtʼapki uka cristianonakax pantjasirïpxarakiwa. Moisesas pantjasirirakïnwa, ukampis ninampi qinayampi ukankatapaw Moisesax Jehová Diosan ajllitätapa ukat askirjam uñjatap uñachtʼayäna. Ukhamarus kunjamtï Diosax “Moisesaru arskatayna ukhamarjama[w]” israelitanakax sartapxäna, janiw khitis amtaparjamax sarnaqkänti (Núm. 9:23). Ukhamasti, Diosan arsutaparjamax Moisesaw kunapachas markax sartani uk yatiyäna.

Jichhürunakanxa, suma phuqiri mayordomox sapa kutis sartañäni siskistaspa ukhamawa. Yatiyañataki ukat Diosan Apnaqäwipat yatiyañataki, ukhamarak Bibliat apstʼat machaq qillqatanakampi ukat jachʼa tantachäwinak tuqiw irpaskistu. Janiw ukakïkiti, tamanak tumptʼir jilatanak tuqi, cartanak tuqi ukat escuelanak wakichasaw yatichapxarakistu.

Aka qhipa urunakanxa, ¿khiti tuqis Jehová Diosax irpaskistu uk amuyasisktanti? Diosax markap tuqiw aka ñanqha pachan irpaskistu, ukhamatwa jan walinakat jarkʼaqata, maynit maynikam munasisa ukat mayachtʼatas jakastanxa.

Israelitanakax Suma Uraqir mantxapxäna ukhaxa, Josué chachax akham sänwa: “Muntwa jumanakan amtasiñanakama taqi chuymanakamampi, ukhamaraki taqi jakañanakamampiraki. Diosasti taqi suma arunakapwa jumanakampi phuqhi, kunjämtï jupax arsüna ukhama. Janiw kuna arunakapas jan phuqhasisax pasawaykiti” sasa (Jos. 23:14). Jichha tiemponkir Diosan markapax machaq suma uraqirux mantarakiniwa. Ukampis altʼat chuymampi Jehová Diosamp irpayasiñäni ukhakiw wiñay jakañ katuqsna. Ukhamax khiti tuqis Jehová Diosax irpaskistu uk sum amuyasipxañäni.

[5 janan fotonakapa]

Jichhürunakanxa Jehová Diosan markapaw irpaskistu

Bibliat apstʼata machaq qillqatanaka

Diosan arunakap yatiyañataki escuelanaka

Yatiyir mistuñatak tantachäwinaka