Komana Mwamonaña Wunsahu waWunlomboli waNzambi?

CHILI aIsarela hela aEjipitu kanda amoneñahu dehi chuma chamuchidiwuku. Hampinji Yafumineñawu aIsarela muEjipitu chishimi chevu chemeneña heluña dimu kwakwihi nawena nawa chatwalekeluhu kwikala nawu. Nawufuku chekalileña chishimi chakesi. Ichi hichuma chekomwesha! Hanu dinu ichi chishimi chafumini kudihi? Chazatileña mudimwinyi? Chumanyi chitukudizila kudi aIsarela chamweneñawu ‘chishimi chakesi nichevu’ hela chakwila munahiti dehi yaaka 3,500?—Kwid. 14:24.

Izu daNzambi dashimuna mudimu nikwafumini chishimi, nawu: “Yehova watwamininuku kumbidi yawu muchishimi chevu namwaana, kulonda kuyilombola njila, muchishimi chakesi nawufuku, kulonda kuyitoñekela, kulonda atweshi kwenda hela namwaana hela nawufuku.” (Kwid. 13:21, 22) Yehova Nzambi wazatishili chishimi chakesi nichevu kulonda yayilomboli antu jindi kufuma muEjipitu nimuchinkalampata. Ateleleli kwikala adiloñesha kwenda kulonda alondeleña chishimi. Chelili amashidika awaEjipitu adiña nakuyilondela akeñeña kulukuka antu jaNzambi, chishimi chemeni hakachi kamazanvu ayedi, chakiñili aIsarela. (Kwid. 14:19, 20) Hela chakwila chishimi hichayilombweli munjila yamuketuku, aIsarela ateleli kulondela chikupu wunlomboli wachishimi hakwila ashiki Mwituña daChikaninu.

Antu jaNzambi akuhweleleli chikupu nawu Yehova wadiña mukachi kawu muloña wachishimi chamweneñawu. Chemeneneñaku Yehova nawa mpinji yikwawu wahosheleleña muchishimi. (Kutach. 14:14; Mas. 99:7) Ivu damwekesheleña cheñi nawu Mosi amutondeli kudi Yehova kulonda yalomboli munza. (Kwid. 33:9) Chochimu, nsañu yasonekawu hampinji yamwekeni ivu kapampa kakukumishaku yashimuna nawu Yehova wamutondeli Yoshuwa kwikala nswana yaMosi. (Kuhit. 31:14, 15) Eñañi, hakwila nawu aIsarela Ediki chachiwahi muEjipitu chashindameneni hakwiluka wunlomboli waNzambi, nikulondela wunlomboli windi.

Adiwili Wunsahu

A Isarela chamwenuwu chishimi katachi ahayamini nankashi. Chawushona, ichi chihayamisha chamweneñawu mpinji yejima hichayihizumwishili aIsarela chikupu chakwila amukuhweleli Yehova mpinji yejimaku. Adikañileña nawunlomboli waNzambi kapampa kakavulu. Hampinji yayilondeleluwu kudi amashidika awaEjipitu aIsarela hiyakuhweleleli nawu Yehova wukweti ñovu jakuyipulwishaku. Ilaña, amwinkeli Mosi kambuña Nzambi muloña nawu nakuyilombola kulonda yayijahishi. (Kwid. 14:10-12) Chelili anayipulwishi dehi haKaluñalwiji Kachinana, amutobeleli Mosi, Aroni, niYehova muloña atoñojokeli nawu adana yakudya nimenji. (Kwid. 15:22-24; 16:1-3; 17:1-3, 7) Chimwahitili nyilungu kufuma hamwekeni chumichi, amukakejeli Aroni nawu ayilili mwana kañombi. Toñojokenu chumichi! Kukabadi kamu kachilombu chawu, aIsarela amweneña chishimi chakesi nichevu, wunsahu waweni wamwekesheleña nawu kudi Muntu wayilombweli kufuma muEjipitu, nawa hiyashikili kwakulehuku, dichi atachikili kudifukula kudi mukishi nakuhosha nawu: “Diwu akishi enu, enu aIsarela, diwu ayifumishili mwituña daEjipitu.” Chalala ‘amuvulokeli Nzambi mwamweni’!—Kwid. 32:4; Nehe. 9:18.

Kudikaña kwadinkañiluwu aIsarela kwamwekesheli hatooka to-o nawu adiwili wunlomboli  waYehova. Hiyadiña nakukala hayuma yamweneñawu namesuku, ilaña akañenyi kwiluka Yehova chayilombweleñayi nikulondela wunlomboli windi. Amweneña chishimi, ilaña avulameneni nawu chemeneneñaku wunlomboli waYehova. Hela chakwila yililu yawu ‘yamutiyishili kutama Wambala waIsarela Wajila,’ Yehova naluwi lwindi watwalekeluhu kuyilombola kuhitila muchishimi sampu nichashikiluwu aIsarela Mwituña daChikaninu.—Mas. 78:40-42, 52-54; Nehe. 9:19.

Monenuña Wunsahu waWunlomboli waNzambi Makonu

Nimakonu, Yehova hayishiya antu jindi nindi asusuteña chakadi wanlomboluku. Neyi chochabuliliyi kuyishiya aIsarela nindi adikeñeli njila aweni, anetu makonu hiyatushiya nkawetu nawu tuwani njila yaya mwituña dadiha dachikaninuku. Yesu Kristu diyi Nlomboli enkawu mudimu wakulombola chipompelu. (Mat. 23:10; Efwes. 5:23) Wenka izaza danduñu wakashinshi datuñewa nawakwaKristu awayishewa ñovu jikwawu. Idi izaza danduñu nidena datondaña ankoñi muchipompelu chawakwaKristu.—Mat. 24:45-47; Tit. 1:5-9.

Tunateli kwiluka ñahi izaza danduñu washinshika, hela dakalama? Talenu Yesu yomweni chadilumbulwiliyi: “Kalama washinshika wukweti maana yowinyi, akushilawu kudi mwanta windi mudimu wakutala mukala windi, enkaña añamba jindi yakudya yawu hayinkelañawu? Nduñu akawanawu kudi nkaka yindi wudi nakwila mwenimu nakooleki.”—Luka 12:42, 43.

Dichi izaza dakalama ‘dashinshika,’ hidafukejaña hela kumushiya Yehova, Yesu, nsañu yalala yamuBayibolu hela antu jaNzambuku. Muloña wakwila idi izaza dakalama dikweti ‘maana,’ datoñojokaña chachiwahi hakulombola mudimu wasweja kulema wakushimwina ‘nsañu yawanta yayiwahi’ nimudimu wakwilisha ‘atumbanji munyunza yejima.’ (Mat. 24:14; 28:19, 20) Izaza dakalama daloñeshaña yakudya yakuspiritu yayiwahi nawa yaheteshaña ‘hampinji yatelela.’ Wunsahu wakwila nawu antu jaYehova akweti wuselewa windi nawa wayikiswilaña, wunakumwekena hakuvulilaku kwawakwakudifukula alala, kuyilombola hakufuukulahu yuma yalema, kutiyishisha chiwahi nsañu yalala yamuBayibolu, kuyikiña kulonda abuli kuyijilumuna kudi ayilumbu jawu nikuwundisha nyichima niyitoñojoka yawu.—Isa. 54:17; Fwi. 4:7.

Ovwahilenuña Wunlomboli waNzambi

Tunateli kumwekesha ñahi netu twalemesha wunlomboli waNzambi? Kapostolu Pawulu wahosheli nindi: “Ovwahilenu anlomboli jenu nakuyitiyilila.” (Heb. 13:17) Kwovwahila nikutiyilila hikwapela mpinji yejimaku. Chakutalilahu: Toñojokenu neyi mudi hakachi kawaIsarela amumafuku aMosi. Fwikijenu neyi munendi hadi mpinji yeneni, dichi chishimi hichikwimana. Chikwimana mafuku añahi? Ifuku dimu, mulungu wumu, tahindi tukweji twatuvulu? Himukutoñojoka nenu, ‘Komana natela kuloñolola yiteli yami yejima?’ Munateli kusambila kuloñolola yiteli yimunakukeña kuzatisha. Ilaña chimwahita mafuku antesha, mukutiya kutama kukeñakeña muyuma yenu, mukutachika nikuloñolola yuma yejima. Ilaña chimukukumisha hohu kuloñolola, nenu mutali chishimi hichikunyamuka nikunyamuka nawa mwatela kutachika cheñi kuloñejeka. Ichi hichuma chakala nankashi. Hela chochu, aIsarela ‘anyamukileña hiyakwenda hohenohu.’—Kuch. 9:17-22.

Chumanyi chitwelaña neyi tutambwila wunlomboli waNzambi? Komana twanyakalaña kuwuzatisha ‘hohenohu’? Tahindi twatwalekañahu kuzata neyi chitwenjilila kwila dikalu? Komana tuneluki wunlomboli wakatataka, chidi neyi wahosha hakulombola atudizi aBayibolu hetala, kushimwina antu ahoshaña idimi dacheñi, kwikala nakudifukula kwachisaka kwampinji yejima, kuzatila hamu naJikometi Jatiyañanaña naYipatela, nikudihemba chiwahi hakupompa kwankambi? Twamwekeshaña cheñi netu twalemesha wunlomboli waYehova kuhitila mukutiyilila kufumba. Neyi tunakukeña kufuukulahu chuma chalema, twamukuhwelelaña Yehova nikuloñesha  kwindi kulonda kutulomboli, kubadika kukuhwelela maanetu. Neyi chochakeñaña mwana kumukiña kudi anvwali jindi neyi kudi nvula yeneni, twakeñaña kutukiña mukuloñesha kwaYehova, neyi kukala kwamunu mukaayi kudi neyi nvula yeneni kutumwekena.

Kafwampi antu alombolaña mukuloñesha kwaNzambi kwahanu hamaseki hiyawaninaku, neyi chochadiña Mosi. Hela chochu, chishimi chamwekesheleña hatoka to-o nawu Mosi amutondeli kudi Nzambi nawa wadiña nawuselewa windi. Ilukenu cheñi nenu kwosi kaIsarela wudi wejima watoñweleña mpinji yakutachika kwenda. Ilaña, antu adiña nakwovwahila ‘mwomwalejeleñawu Mosi kudi Yehova.’ (Kuch. 9:23) Dichi Nzambi wahanineña wunlomboli kuhitila mudi Mosi, hadaha wayilejeleña nindi anyamuki.

Makonu, izaza dakalama kaYehova dashimunaña chiwahi neyi mpinji yakwenda yinashiki. Indi kalama welaña ñahi mwenimu? Wazatishaña yibaaba yamuKaposhi Kakutalila niMudimu Wetu waWanta, nyikanda yayiha, nijimpanji jahanañawu hakupompa kwanyanya nikwankambi. Yipompelu yatambwilaña cheñi nshimbi kuhitila mudi ankoñi endaña, munyikanda hela jishikola jatañañawu amana kwetu aeluda niankoñi akuzatila amuchipompelu.

Komana mwamonaña chiwahi wunsahu wawunlomboli waNzambi? Yehova wazatishaña kuloñesha kwindi, kulonda yalomboli antu jindi ‘muchinkalampata’ chananu mafuku akukuminina akaayi kaSatana katama. Chuma chafumañamu twekala anuñañana, akeñañana, nawa akiñewa.

Hampinji yashikiluwu aIsarela Mwituña daChikaninu, Yoshuwa wahosheli nindi: “Enu muneluki nanyichima yenu yejima, nawumi wenu wejima, nenu hikunakañanyi chuma chachiwahi nichimu chayiteneniyi Yehova Nzambi yenuku, yejima munayimoni.” (Yosh. 23:14) Chochimu, antu jaNzambi makonu akeñila mwituña dadiha dachikaninu. Hela chochu, hakwila nawu twakekali mwituña dadiha hamuntu hamuntu, chashindamena chikupu hakwikala adizoza nikutiyilila wunlomboli waNzambi. Dichi dinu, wejima wetu tutwalekuhu kumona wunsahu wawunlomboli waYehova.

[Nyevulu yidi hefu 5]

Kuloñesha kwaYehova kwatulombolaña makonu

Nyikanda yedishañawu hakupompa kwankambi

Kudiza shikola yaTeokalatiki

Atudizishaña hakubulakana kwakuya mwiha