Kwõj Ke Kile Men ko im Rej Kam̦ool bwe Anij Ej Tõl Kõj?

KE RI Israel ro rar diwõjl̦o̦k jãn Ijipt, juon kõdo̦ ear pãd im̦aer aolep raan. Ri Israel ro ekoba ri Ijipt ro rejañin kar lo men in ilo mour ko aer. Im ñe ej boñ, kõdo̦ eo ear oktak im kijeek. Ej juon men el̦ap an kar kabwilõñlõñ! Ak men in ear itok jãn ia? Etke ear pãd im̦aanin ri Israel ro? Im ta eo kõj ilo rainin jemaroñ katak jãn wãween an kar ri Israel ro watõk kõdo̦ in?—Ex. 14:24.

Baibõl̦ eo ej kwal̦o̦k ñan kõj ia eo kõdo̦ in ej itok jãne im ej ñan ta. Ej ba: “Jeova ear ilo̦k im̦aerl̦o̦k ilo raan ilo juon jurõn kõdo̦, bwe En tõl l̦o̦k er ilo ial̦, im ilo boñ ilo juon jurõn kijeek, bwe en ka meraml̦o̦k er, bwe ren maroñ etal ilo raan, kab ilo boñ.” (Ex. 13:21, 22) Jeova Anij ear kajerbal kijeek eo im kõdo̦ eo ñan tõl armej ro doon jãn Ijipt im ilo ãne jem̦aden. Armej ro rar aikuj pojak bwe ren maroñ l̦oore. Ke ri tarin̦ae ro an Ijipt rar iten nitbwili ri Israel ro, kõdo̦ eo ear em̦m̦akũt il̦okan ri Israel ro im baare er ñan kõjparok er jãn ri Ijipt ro. (Ex. 14:19, 20) Meñe kõdo̦ eo ear jab kwal̦o̦k ial̦ eo em̦õkajtata, ak ri Israel ro rar aikuj l̦oore wõt bwe ren maroñ pãd ilo Enen Kallim̦ur eo.

An kõdo̦ eo pãd im̦aanin ri Israel ro ej kalikkar ñan er bwe Jeova ej pãd ippãer. Kõdo̦ eo ear jutak kõn Jeova im jet iien Jeova ear kõnono jãn kõdo̦ in. (Bõn. 14:14; Sam 99:7) Bareinwõt, kõdo̦ in ear kalikkar bwe Moses ej eo im Jeova ear jitõñ e ñan tõl ri Israel ro. (Ex. 33:9) Tokãlik, kõdo̦ in ear bareinwõt kalikkar im kam̦ool bwe Jeova ear jitõñ Joshua ñan bõk jikin Moses. (Dt. 31:14, 15) Bwe ri Israel ro ren maroñ tõpare Enen Kallim̦ur eo, men in ear wawa iion aer kile men eo ear kam̦ool bwe Anij ej tõl er im aer l̦oore tõl eo an.

Rar Kõjekdo̦o̦n Men eo me Ear Kam̦ool bwe Anij Ej Tõl Er

Ri Israel ro remaroñ kar lukkuun bwilõñ ke rar lo kõdo̦ eo ilo iien eo jinointata. Bõtab, ekabũrom̦õjm̦õj bwe meñe rar lo kõdo̦ eo aolep raan, ak rar jab lukkuun l̦õmn̦ak kake im kaorõke, kõn men in ear jab to aer lõke Jeova. Elõñ iien rar kwal̦o̦k aer jab lõke bwe Jeova ej tõl er. Ke ri Ijipt ro rar lukworkwor er, rar jab lõke bwe Jeova emaroñ lo̦mo̦o̦ren er. Ak rar naruon Moses im ba bwe ear tõl er jãn Ijipt bwe ren mej. (Ex. 14:10-12) Jeova ear jipañ ri Israel ro ñan kijone Lom̦al̦o eo Ekilmir, bõtab jejjo iien tokãlik rar ellotane Moses, Aron, im Jeova kõn aer l̦õmn̦ak bwe ear ejjel̦o̦k kijeir m̦õñã im lim̦eir dãn. (Ex. 15:22-24; 16:1-3; 17:1-3, 7) Jet wiik ko tokãlik, rar iuun Aron bwe en kõm̦m̦an juon koon in kau. Baj l̦õmn̦ak m̦õk kõn men in! Meñe ri Israel ro rar lo kõdo̦ eo im kijeek eo me ej menin kam̦ool bwe Jeova ear tõl er jãn Ijipt, ak rar wõnm̦aanl̦o̦k wõt im jino kabuñ ñan ekjab in. Rar ba: “O ri Israel, eñin ej anij eo ad, eo ear kadriojlok kij jen Egypt!” Rein rar jab kautiej Jeova ilo aer kar kõm̦m̦ani men kein.—Ex. 32:4, UBS; Nih. 9:18.

An ri Israel ro kõm̦m̦ani men ko rej jum̦ae Jeova ear kalikkar aer jab aikuji an tõl er. Rar kõm̦m̦ani men kein kõnke rar jab kaorõk wãween an Jeova tõl er im rar likjab in l̦oore tõl eo an. Rar mel̦o̦kl̦o̦k bwe kõdo̦ eo ear kõkkar kõn tõl eo an Jeova. El̦ap an kar ri Israel ro kabũrom̦õj “Eo e kwõjarjar an Israel,” Jeova.  Jekdo̦o̦n ak Jeova ear kwal̦o̦k wõt tũriam̦o im tõl er ikijen an kajerbal kõdo̦ eo m̦ae iien rar tõpare Enen Kallim̦ur eo.—Sam 78:40-42, 52-54; Nih. 9:19.

Jeova Ej Tõl Armej ro An Rainin

Ñan rainin Jeova ej wõnm̦aanl̦o̦k wõt im tõl armej ro doon. Ejamin bõjrak jãn an kõm̦m̦ane men in. Ear jab kõtmãne bwe ri Israel ro ren make pukot kilen aer tõpare Enen Kallim̦ur eo. Im ãindein rainin, ejjab kajjitõk ippãd bwe jen make pukot wãween eo ñan ad maroñ pãd ilo jukjuk im pãd eo ekããl. Kar jitõñ Jijej Kũraij bwe en Ri Tõl eo an congregation eo. (Matu 23:10, UBS; Ep. 5:23) Jijej ear kõmaroñ juon kumi in ri karejar me em̦õj kabit er bwe ren lale congregation ko ijin iion lal̦. Im ñan jipañ lale congregation ko ipel̦aakin lal̦ in, kumi in ej jitõñ jet em̦m̦aan ro ilo congregation ko.—Matu 24:45-47; Tai. 1:5-9.

Ewi wãween jemaroñ kile kumi in ri karejar eo etiljek im mãlõtlõt? Jen lale wãween an kar Jijej kõmel̦el̦e kõn kumi in. Ej ba: “Innãm wõn ri kõmñe eo e tiljek im mãlõtlõt, eo irooj eo an enaaj kairooj e ioon ro ri karijeran, bwe en lel̦o̦k kijeir ñan er iien e jejjet? E m̦õn̦õn̦õ ri karijeran eo, ñe irooj eo an ej itok enaaj lo an kõm̦m̦an ãindein.”—Luk 12:42, 43.

Kõnke kumi in “etiljek,” ejamin el̦l̦o̦k jãn Jeova im Jijej. Ejamin kaarmejjete katak ko rem̦ool ilo Baibõl̦ eo, ak ro doon Anij. Im bareinwõt kõnke ‘emãlõtlõt,’ ej kajerbal lol̦o̦kjen̦ ilo an tõl jerbal ko raorõktata, ej jerbal in kwal̦o̦k kõn “gospel in an aelõñ in lañ” im ‘kõm̦m̦an ri aelõñ ko otemjej bwe ren ri kal̦oran’ Jijej. (Matu 24:14; 28:19, 20) “Ilo iien eo ejejjet,” kumi in ri kõmñe eo ej leto letak katak ko rem̦ool jãn Baibõl̦ me rem̦m̦an im rej kakajoor kõj. Jeova ej buñbũruon ippãn kumi in ri karejar eo tiljek im mãlõtlõt, im ej kajeraam̦m̦an er. Jej kile men in ilo wãween an jipañ er ñan kõm̦m̦ani pepe ko raorõk im kal̦apl̦o̦k aer mel̦el̦e kõn katak ko rem̦ool ilo Baibõl̦. Im ri kõjdat ro rejjab maroñ ko̦kkure aolepeir. Jeova ej kaenõm̦m̦an bũrueer im ej koorl̦o̦k oran armej ro doon.—Ais. 54:17; Pil. 4:7.

L̦oor Tõl eo an Anij

Ewi wãween jemaroñ kwal̦o̦k bwe jej kaorõk tõl eo an Anij im l̦oore? Rijjelõk Paul ear ba: “Kom̦win pokake im kõttãik kom̦ ñan ro rej tõl kom̦.” (Hi. 13:17) Ejjab aolep iien epidodo ñan kõm̦m̦ane men in. Ñan waanjoñak, pijaik am̦ etetal ippãn ri Israel ro ilo raan ko an Moses im kiiõ ebõjrak kõdo̦ eo. Im kwõj l̦õmn̦ak ippam̦ make, ‘Ewi toõn an naaj pãd ijin? Juon raan? Juon wiik? Ak jejjo allõñ? Ewõr ke tokjãn ñe inaaj kadiwõj aolep men ko m̦weiõ im ko̦kko̦n̦kon̦i?’ Bõlen ilo jinoin kwõj kadiwõj wõt men ko kwõj aikuji. Bõtab ãlikin jet raan, kõn am̦ m̦õk in ãlõk bar men ko jet m̦weiõm̦, kwõj jino im kadiwõj aolepeir im ko̦kko̦n̦kon̦i. Ak ilo iien eo wõt me ej kap m̦õj am kadiwõj aolep men ko m̦weiõm̦ im kakoni, kõdo̦ eo ej jino em̦m̦akũt im kiiõ kwõj aikuj bar bõk aolep men ko m̦weiõm̦ im ãti! Meñe men in ejjab pidodo ak ri Israel ro rar aikuj m̦õkaj im em̦m̦akũt bwe ren l̦oore tõl eo an Jeova.—Bõn. 9:17-22.

Innem, ñe Jeova ej tõl kõj, jej ke m̦õkaj im l̦oore tõl eo an? Ak jej wõnm̦aanl̦o̦k wõt im kõm̦m̦ani men ko me jej imminene in kõm̦m̦ani? Jej ke jerbali naan in tõl ko an raan kein? Ñan waanjoñak, jej ke l̦oor naan in tõl ko kõn kilen katak Baibõl̦ ippãn armej ro, kwal̦o̦k naan ñan ro eoktak kajin ko aer, im keini ad katak ippãn baam̦le eo ad? Jej ke jerbal ilo bõrokuk ippãn kumi eo n̦aetan Hospital Liaison Committees, eo ej jipañ taktõ ro ñan jerbal ippãn Ri Kõnnaan ro an Jeova renañinmej ñe apañ ko kõn bõtõktõk rej wal̦o̦k? Bareinwõt, jej ke l̦oori naan in tõl ko ñan iien kweilo̦k ko rel̦ap? Bar juon wãween jej kwal̦o̦k ad kaorõk tõl eo an Anij ej ikijen ad eo̦roñ naan in kakapilõk ko elder ro rej litok ñan kõj. Ñe jej aikuj kõm̦m̦an pepe ko rel̦ap,  jen jab atartar iion jel̦ãl̦o̦kjen̦ eo ad make, ak jen reilok ñan Jeova im doulul eo an ñan tõl kõj. Im ñe jej jelm̦ae apañ ko, jen koonl̦o̦k doulul eo an Jeova, ãinwõt ñe juon ajri ej ettõrl̦o̦k ñan ippãn jemen im jinen bwe ren kõjparok e ñe ej jorur.

Em̦ool bwe ro rej tõl doulul eo an Jeova ijin iion lal̦ rejjab weeppãn. Bõtab jej aikuj keememej bwe Moses bareinwõt ear jab weeppãn. Jekdo̦o̦n ak kõdo̦ eo ear kam̦ool bwe Jeova ear jitõñ e ñan jerbal eo an im bwe ej buñbũruon kake e. Jen bareinwõt keememej bwe ri Israel ro rar jab make peek ñããt eo rar aikuj em̦m̦akũt. Ak rar aikuj em̦m̦akũt wõt ‘ekkar ñan nan in jiroñ ko Jeova ear jiroñ Moses kaki.’ (Bõn. 9:23, UBS) Kõn men in, Anij ear kwal̦o̦k ñããt eo ri Israel ro ren em̦m̦akũt ikijen eo ear kããlõte, Moses.

Rainin, Jeova ej kalikkar ñããt eo ñan em̦m̦akũt ak tõl kõj ikijen kumi in ri kõmñe eo etiljek im mãlõtlõt. Ewi wãween an kumi in kõm̦m̦ane men in? Ikijen katak ko ilo Imõniaroñroñ eo im Ad Jerbal ñan Aelõñ Eo, bok ko rekããl, im katak ko ilo kweilo̦k ko rel̦ap. Ej bareinwõt lel̦o̦k naan in tõl ko ñan congregation ko ikijen overseer ro rej itoitak, lõta ko, ak jikuul ko ñan ro jeid im jatid m̦aan me rej jipañ lale congregation ko.

Kwõj ke kaorõk menin kam̦ool kein me rej kalikkar bwe Anij ej tõl kõj? Rainin, Jeova ej kajerbal doulul eo an ñan tõl armej ro doon ilo raan kein ãliktata an jukjuk im pãd in enana an Setan. Tokjãn men in, ewõr m̦õn̦õn̦õ im yokwe ibwiljid, im jej jokwane.

Ke ri Israel ro rar tõpare Enen Kallim̦ur eo, Joshua ear ba: “Kom otemjej jelã ilo buruõmi im ilo aami bwe [Jeova] ami Anij ear lewõj ñõn kom men ko otemjej remmõn ear kallimur kaki. Men ko otemjej ekar kallimur kaki emwij air kirmol.” (Jos. 23:14, UBS) Ãindein, ro doon Anij rainin renaaj pãd ilo jukjuk im pãd eo ekããl kar kallim̦ur kake. Bõtab, ad maroñ pãd ilo iien in ej wawa iion ad m̦õn̦õn̦õ in kõttãik kõj ñan l̦oore tõl eo an Anij. Kõn men in, jen aolep wõnm̦aanl̦o̦k wõt im kile menin kam̦ool ko im rej kalikkar bwe Jeova ej tõl kõj!

[Pija ilo peij 5]

Jeova ej tõl kõj ikijen doulul eo an rainin

Bok ko rekããl

Jikuul̦ ko an doulul eo

Kweilo̦k in kwal̦o̦k naan