¿Agradecekushanchischu Jehová Diosta pusawasqanchismanta?

JEHOVÁ DIOS Egiptomanta llaqtanta horqomushaqtinmi llapa israelitakuna Egipto runakunapas mana hayk’aq rikusqankuta rikurqanku. Israelitakunaq ñawpaqenpin sayaq phuyu rikhurirqan tutataq sayaq ninaman tukurqan. ¿Maymantan chay phuyu rikhurimurqan? ¿Imapaqmi chaypi kasharqan? ¿Imaynatan israelitakuna qhepaman chay ‘sayaq ninata phuyutawan’ qhawarirqanku? Chay sucedesqanmanta 3.500 wataña pasarqon chaypas, ¿imatan chaymanta yachasunman? (Éxo. 14:24.)

Biblian willawanchis maymanta chay phuyu rikhurimusqanta, imapaq chaypi kasqantapas. Éxodo 13:21,22 texton nin: “Señor Diostaq ñanninta pusananpaq ñawpaqenkuta sayaq phuyupi p’unchay rirqan, tutataq paykunata k’anchaspa sayaq ninapi rirqan, chhaynapin tutantin p’unchaynintin purirqanku”, nispa. Chay phuyuwanmi Jehová Dios israelitakunata pusarqan Egipto llaqtamanta lloqsimuqtinku ch’inneq aqo pampapi kashaqtinkupas, chayraykun paykunaqa makilla kashananku karqan qatikunankupaq. Egipto soldadokuna phawaykuqtinkupas chay phuyuwanmi paykunata pakaykurqan (Éxo. 14:19, 20). Manaña llapa runakunaq purisqan ñannintachu pusarqan chaypas, Diospa Prometesqan Hallp’aman chayanankupaqqa qatikunankun karqan.

Chay sayaq phuyupas ninapas paykunawan Dios kashasqantan rikuchirqan. Chay ukhumantan mayninqa paykunata rimapayaq (Núm. 14:14; Sal. 99:7). Chay phuyun rikuchirqan Moisesta israelitakunata pusananpaq Jehová Dios akllasqanta (Éxo. 33:9). Chay phuyu chinkapunanpaqña kashaqtinpas rikuchirqanmi Moisespa rantinpi Josué churasqa kasqanta (Deu. 31:14, 15). Allin kanankupaqqa chay phuyuwanmi pusachikunanku karqan.

Imapaq kasqantan qonqapurqanku

Chayllaraq chay phuyuta rikushaspankuqa anchatachá admirakurqanku. Ichaqa manan Jehová Diospi hap’ipakurqankuchu, chaymi askha kutipi Diosta mana kasukurqankuchu chay phuyu ñawpankupi kashaqtinpas. Chaytan rikukurqan Egiptomanta llosimushaqtinku, soldadokunata qhepankupi rikukuspan manapas Dios qespichiyta atinmanchu hinata yuyaykurqanku. Hinaspan Moisesta tumparqanku chay sasachakuypi rikukusqankumanta (Éxo. 14:10-12). Puka Qochata pasasqanku qhepamanmi mikhunamanta unumanta llakikuspa Moisés, Aarón, Dios contra ima rimapakurqanku (Éxo. 15:22-24; 16:1-3; 17:1-3, 7). Chaykuna qhepamanmi Aaronta nirqanku qori torillota ruwananpaq. Qespichiqninku Dios paykunawan kashaqtinpas idolota ruwarukuspan “¡Israel, kaymi diosniykiqa, Egipto suyumanta pusamuqniyki!” nispa yupaycharqanku (Éxo. 32:4; Neh. 9:18).

Israelitakunaqa mana kasukusqankupin rikuchirqanku Jehová Diospa yanapay qosqanta wikch’uykusqankuta. Paykunaqa ñawsa hinan mana repararqankuchu Jehová Dios imayna pusasqanta. Sayaq phuyuta  rikushaspapas qonqapurqankun chaywan Jehová Dios pusasqanta. Mana kasukusqankuwanmi ‘Israelpa Ch’uya Diosninta phiñachirqanku’. Chaywanpas Diosqa khuyapayaspan paykunata pusarqan Prometesqa Hallp’aman chayanankukama (Sal. 78:40-42, 52-54; Neh. 9:19).

Agradecekusun pusawananchispaq qowasqanchismanta

Kunanpas Diosqa pusashanmi llaqtanta. Imaynan ñawpa tiempopi israelitakunata pusarqan Prometesqan Hallp’aman chayanankukama, chhaynatan yanapawashanchis mosoq pachaman chayananchispaq. Chaypaqmi Jesusta churan llaqtanta umallinanpaq (Mat. 23:10; Efe. 5:23). Paytaqmi hunt’aq kamachita churan kay Hallp’api llaqtanta pusananpaq. Paykunataq umallikunata churanku iñiq t’aqata michinankupaq (Mat. 24:45-47; Tito 1:5-9).

¿Imaynapin yachasunman pusawananchispaq hunt’aq kamachi churasqa kasqankuta? Jesusmi nirqan: “¿Pitaq allin yuyayniyoq hunt’aq mayordomoqa? Paytan patronqa wasinpi kaqkunata kamachinanpaq churan, tiempollanpi kamachinkunaman mikhunatapas qonanpaq. Kusisamiyoqmi chay mayordomoqa kanqa patronnin hamuspa chay hina ruwashaqta tarinman chayqa”, nispa (Luc. 12:42, 43).

Hanaq pachapaq akllasqa cristianokunaqa hunt’aq runakunan kanku. Paykunaqa Bibliaq nisqanman hinan imatapas ruwanku. Allin yuyayniyoqmi kanku, chaymi allin yuyaywan ‘qhapaqsuyumanta allin willakuykunata’ aparishanku llapa suyu runakuna ‘[Jesuspa] yachachisqan kanankupaq’ (Mat. 24:14; 28:19, 20). Hinaspapas Jesusta kasukuspan ‘tiempollanpi kamachinkunaman mikhunata’ qoshanku. Paykunaqa Jehová Diospa saminchasqanmi kashanku chaymi Diospa llaqtanqa astawan yapakushan. Diosqa astawanmi llaqtanman yachayta qoshan chaymi Bibliapi yachachikuykunata allinta entiendeshanku, allintataqmi ima ruwanankutapas decidishanku. Llaqtantan awqankunamanta hark’aykun, yanapantaqmi thakpi kawsanankupaq (Isa. 54:17; Fili. 4:7).

Diosta agradecekusun pusawasqanchismanta

¿Imata ruwaspan rikuchisunman pusawasqanchismanta agradecido kasqanchista? Pablon, nirqan: “Umalliykichiskunata uyariychis, paykunata kasuychis”, nispa (Heb. 13:17). Chayta ruwayqa sasapaschá kanman. Kaypi yuyaykusun. Qansi Moisespa tiempopi israelita kanki. Askha p’unchayñan sayaq phuyuq qhepanta purishankichis. Ichaqa qonqayllan sayarqon. Yaqapaschá tapukunki: “¿Hayk’a tiempotaq kaypi sayanqa? ¿Huk p’unchay? ¿Huk semana? ¿Icha aswan unaychu?” nispa. Iskayyashankichá q’epiykita paskanaykipaq. Chaymi imaykitapas mana sasata q’epichanaykipaq necesitasqallaykita horqonki. Ichaqa askha p’unchayña sasata imaykitapas horqopakusqaykiraykun llapanta paskarparinki. Chayllamanmi sayaq phuyu puririn. “¡Imachá kayqa!”, nispachá yapamanta llapa kaqniykikunata q’epichanki. Ichaqa munay mana munay llapallaykichismi ‘astakuyta’ qallarinkichis (Núm. 9:17-22).

¿Imatan ñoqanchispas ruwanchis Diospa llaqtanpi ima kamachikuypas kaqtin? ¿Kaqpachachu kasukunchis icha ñawpaqpi hinallachu imatapas ruwanchis? ¿Kasukushanchischu Bibliamanta yachachinapaq, huk llaqtayoq runakunaman predicanapaq, familiapi estudianapaq, Comités de Enlace con los Hospitales nisqata yanapakunapaq, hatun huñunakuykunapaq chayllaraq lloqsimuq kamachikuykunata? Hinaspapas tukuy chaskisqanchismanta agradecekusqanchista rikuchinapaqqa uyarikunan yuyaychawasqanchista. Chaymi imatapas  decidinanchis kaqtinqa Jehová Diospa yanapayninta maskhananchis. Sinchita pararimuqtin taytanman phawariq wawa hinan ñoqanchispas kay pachapi ima sasachakuypas kaqtinqa Diospa llaqtanman phawarinanchis.

Ichaqa Diospa llaqtanpi umallikunaqa pantaq runakunan kanku. Moisespas pantaq runan karqan, chaywanpas paykunawan sayaq phuyu kashasqanmi rikuchirqan Diospa allin qhawarisqan kasqanta. Hinaspapas israelitakunaqa “Diospa Moiseswan kamachisqanman” hinallan hatariqkupas karpakuqkupas, manan pipas munasqanman hinaqa puririqchu (Núm. 9:23). Arí, Moisesmi israelitakunata ninman karqan hayk’aq hatarinankutapas.

Kunanpas hunt’aq mayordomon willawanchis hayk’aq hatarinanchis otaq imapas ruwananchis kasqanta. Chaytan willawanchis Qhawaq revistapi, Diosmanta Willasunchis hojapi, chayllaraq lloqsimuq qelqakunapi otaq hatun huñunakuykuna kaqtin discursokunapi, watukuq umallikuna apamusqan cartakunapi. Kallantaqmi umallikunapaq yanapakuq qharikunapaq escuelakunapas.

¿Imaynatan Jehová Dios kunan pusawashanchis? Payqa llaqtanwanmi ch’inneq aqo pampantapas purishasunman hina millay runakuna ukhupi pusawashanchis. Chaymi huk hinalla munanakuspa llaqtanpi pakaykusqa kashanchis.

Diospa Prometesqan Hallp’aman chayasqanku qhepamanmi israelitakunata Josué nirqan: ‘Qankunaqa tukuy alma, tukuy sonqo Señor Diospa sumaq nisqasuykichista llapanta hunt’asqantan reqsinkichis’, nispa (Jos. 23:14). Kay tiempopi Diospa llaqtanpas chayanqapunin Diospa prometesqan mosoq pachaman. Chaypaqmi ichaqa sapankanchis Jehová Diospa churasqan runakunawan huch’uyyaykukuspa pusachikunanchis. Llapallanchis Jehová Diosta agradecekusun pusawananchispaq tukuy qowasqanchismanta.

[5 paginapi fotokuna]

Jehová Diosqa llaqtanwanmi pusawashanchis

Hatun huñunakuypi chayllaraq lloqsimuq qelqa

Astawan yachanapaq escuelakuna

Predicanapaq huñunakuypi yachachikuykuna