Kite ra Koe te Akapapuanga i ta te Atua Aratakianga?

KARE te ngati Iseraela e to Aiphiti i kite ana i tetai mea mei te reira rai. Te Akaruke Anga te ngati Iseraela i Aiphiti, te noo ua ra tetai pou tumurangi ki rungao ia ratou. I te po, kua riro te reira ei pou ai. E mea umere tikai! Inara noea mai te reira? Eaa tona akakoroanga? E eaa ta tatou ka apii mai mei tetai 3,500 mataiti i muri mai, mei to Iseraela manako no runga i ‘te pou ai e te tumurangi’?​—Exo. 14:24.

Te akakite maira te Tuatua a te Atua i te tumu e te akakoroanga o te pou, te tuatuaanga e: “Kua na mua oki a Iehova ia ratou i te aere, i te ao ra, kua na roto i te pou tumurangi, ei arataki ia ratou na te arataa, e i te po ra, kua na roto i te pou ai, ei turama no ratou; me aere i te ao e i te po katoa.” (Exo. 13:21, 22) Kua taangaanga te Atua ko Iehova i te pou ai e te tumurangi ei arataki i tona iti tangata mei Aiphiti mai, e na roto i te metepara. Kia rauka i te aru i te reira, ka anoanoia ratou kia papa no te aere. Te vaitata anga te nuku o Aiphiti i te ta atu i te iti tangata o te Atua, kua neke te pou tumurangi ki rotopu i te nga pupu, te paruru anga i te ngati Iseraela. (Exo. 14:19, 20) Noatu kare te pou tumurangi i akaari mai i te mataara tika, te mataara anake ua no to Iseraela kia tae ki te Enua Taputouia, kia aru i tana aratakianga.

E akapapuanga te pou tumurangi ki te iti tangata o te Atua e tei rotopu a Iehova ia ratou. Kua akatutu mai te reira ia Iehova, e i tetai au taime kua tuatua mai aia na roto i te reira. (Nume. 14:14; Sala. 99:7) Pera katoa, kua akataka mai te tumurangi e kua iki a Iehova ia Mose ei arataki i te pa enua. (Exo. 33:9) Mei te reira katoa, kua akapapu mai te mama openga mai anga tei rekotiia no te tumurangi, e na Iehova i iki ia Iosua ei mono ia Mose. (Deu. 31:14, 15) E tika, kia puapingaia to ratou Akaruke Anga, kia marama te ngati Iseraela i te akapapuanga o ta te Atua aratakianga e te aru anga i te reira.

Ngaropoina ia Ratou te Akapapuanga

Te kite mua anga te ngati Iseraela i taua pou ra, papu kua umere tikai ratou. Te mea mii ra, kare taua temeio ta ratou i kite i akakeu ana i te ngati Iseraela kia irinaki papu ia Iehova. Maata te taime kua ekoko ratou i te aratakianga a te Atua. Te arumaki anga te nuku Aiphiti ia ratou, kare ratou i irinaki ana i to Iehova mana akaora. Mari ra, kua akaapa atu ratou i te tavini o te Atua ko Mose, no tei arataki ia ratou ki te mate. (Exo. 14:10-12) Muri ake to ratou akaoraia anga mei te Tai Muramura, kua urutoe ratou ia Mose, Aarona, e Iehova te tamanako anga e kare e kai e te vai. (Exo. 15:22-24; 16:1-3; 17:1-3, 7) Tetai au epetoma i muri mai, kua maro ratou ia Aarona kia maani i tetai punua puakatoro auro. Akamanako ana! Tetai tuanga i to ratou puakapa, kua kite te ngati Iseraela i te pou ai e te tumurangi​—te akapapuanga umere tikai o Tei arataki mai ia ratou mei Aiphiti—​e kare i mamao mei reira, kua akamata ratou i te akamori i tetai itoro, te tuatua anga e: “Teia toou atua, e Iseraela, ko tei arataki mai ia koe mei te enua maira mei Aiphiti.” “E maata rava akera oki ta ratou au akakokoanga”!​—Exo. 32:4; Nehe. 9:18.

Kua akaari mai te au angaanga meameaau a to Iseraela i te tu manako kore tikai no ta Iehova aratakianga. Kare ko ta ratou e kite ra te  manamanata, mari ra to ratou maramaanga i ta Iehova aratakianga. Kua kite ratou i te pou, inara kua ngaropoina ia ratou tona aiteanga. Noatu ‘kua akaongoongo atu ta ratou au angaanga i Tei Tapu i Iseraela nei,’ kua arataki aroa ua rai a Iehova ia ratou na roto i te pou e tae ua atu to Iseraela ki te Enua Taputouia.​—Sala. 78:40-42, 52-54; Nehe. 9:19.

Akapapuanga i ta te Atua Aratakianga i Teia Tuatau

Te arataki nei rai a Iehova i tona iti tangata i teia tuatau. Mei tana rai kare i tuku i te ngati Iseraela kia kimi i to ratou uaorai mataara, kare aia e tuku ia tatou kia kimi i te mataara ki te ao ou tei taputouia mai. Ko Iesu Karaiti te Arataki ikiia no te putuputuanga. (Mata. 23:10; Ephe. 5:23) Kua oronga aia i te mana ki tetai pupu tavini akono meitaki, e au Kerititiano akarongo mou tei akatainuia ki te vaerua. E na taua pupu tavini ra e iki ana i te au akaaere o te putuputuanga Kerititiano.​—Mata. 24:45-47; Tito 1:5-9.

Akapeea tatou e kite ei i te akatakaanga o te pupu tavini akono meitaki? Akara e akapeea a Iesu te akatakaanga ia ratou: “Koai te akaaere pikikaa kore e te pakari, i ta te pu e tuku i rungao i tona katoa au tavini, ei tua i ta ratou tuanga kai i te ora mou ra? E ao to te reira tavini, to tei rokoia mai e tona pu, te pera ra”!​—Luka 12:42, 43.

No reira, e “pikikaa kore” te pupu akaaere, e kare rava e pikikaa ana me kore e akaruke ana ia Iehova, Iesu, te au tuatua mou Pipiria, me kore te iti tangata o te Atua. No te “pakari,” te arataki meitaki ra te pupu akaaere i te angaanga puapinga rava atu o te tutu anga i te “evangelia o te basileia nei” e te akariroanga “i to te pa enua katoa ei pipi.” (Mata. 24:14; 28:19, 20) Te oronga ra te pupu akaaere i te kai vaerua puapinga e te meitaki tikai “i te ora mou.” Te kiteia ra to Iehova tu mareka te akameitakianga aia i tona iti tangata kia maata mai, kia aratakiia e te au ikianga puapinga, kia marama meitaki mai i te au tuatua mou Pipiria, kia paruruia kia kore e takoreia e to ratou au enemi, e kia rauka te manako e te ngakau au.​—Isa. 54:17; Phili. 4:7.

Ariu ki ta te Atua Aratakianga

Akapeea tatou me akaari e e puapinga ta te Atua aratakianga kia tatou? Kua akakite te apotetoro ko Paulo e: “E akarongo i to kotou au arataki, e kauraro atu kotou.” (Ebe. 13:17) Tetai taime kare i te mea mama i te rave i te reira. Ei akatutuanga: Akamanako ana e e ngati Iseraela koe i to Mose tuatau. Akamanako ana e kua roa koe te aaere anga no tetai tuatau, e kua tapu te pou tumurangi. Eaa te roa te noo ua anga ki reira? E tai ra? E tai epetoma? Tetai au marama? Kua manako koe, ‘E puapinga ainei te akapae i toku au apinga ki vao?’ Te akamataanga, ka akapae koe te au mea ka anoano tikai koe. Tetai au ra i muri mai, kare koe e reka ana i te kimi na roto i toou au apinga, kua akapae koe i te katoatoa ki vao. I na, koi oti ua akera koe i te akapae taau au apinga, kite atu koe i te pou e neke ra—e kua akapapa akaou koe i te au apinga ki roto i te pute! Kare te reira i te mea mama e te mea meitaki i te rave. Noatu rai, ‘kua aere te tamariki a Iseraela i reira rai.’​—Nume. 9:17-22.

Eaa ta tatou ka rave me orongaia mai te aratakianga a te Atua? Ka taangaanga ainei tatou i te reira, ‘i reira rai’? Me ka rave ua atu rai tatou i ta tatou i matau i te rave? Matau ainei tatou i te au aratakianga ou no te apii anga Pipiria i te kainga, tutu anga ki te au tangata reo ke, piri putuputu anga ki te akamorianga a te ngutuare, turuturu anga i te au Kumiti Are Maki, e te akamako anga ia tatou i te au uruoaanga? Ka akaari katoa tatou e e puapinga te aratakianga a te Atua na te ariki anga i te akoanga. Me rave i te au ikianga puapinga tikai, kare tatou e irinaki i to tatou uaorai pakari, mari ra ka akara kia Iehova e tana akaaerenga  no te aratakianga. Mei tetai tamaiti e kimi ra i te paruruanga a tona metua me tupu mai tetai uriia kino, ka kimi tatou i te paruruanga ki roto i te akaaerenga a Iehova me tupu te au manamanata kia tatou mei tetai uriia rai.

E tika, kare te aronga e arataki ra i te akaaerenga a te Atua i te enua nei i te aronga apa kore—e kare katoa a Mose. Noatu rai, kua akapapu mai rai te pou tumurangi i ta te Atua ikianga e tana marekaanga. Akara katoa, kare na to Iseraela i iki e eaa te taime tano no te neke anga. Mari ra, kua rave te iti tangata ‘i te akauenga a Iehova kia Mose.’ (Nume. 9:23) No reira na roto i te aratakianga a te Atua, kua oronga a Mose i te ikuikuanga kia neke.

Teia tuatau, te oronga mai nei te pupu akaaere a Iehova i te ikuikuanga taka meitaki no te au tauianga. Akapeea te pupu akaaere me rave i te reira? Na roto i te au atikara o Te Punanga Tiaki e Ta Tatou Angaanga Patireia, au puka ou, e te au akoanga i ko i te au akaputuputuanga e te au uruoaanga. E oronga katoaia ana te au ikuikuanga ki te au putuputuanga na roto i te au akaaere tutaka, au reta e te au terenianga no te au taeake e au apainga ta ratou i te putuputuanga.

Te kite meitaki ra ainei koe i te akapapuanga o ta te Atua aratakianga? E taangaanga ana a Iehova i tana akaaerenga ei arataki ia tatou tona iti tangata, na roto i “te metepara” i roto i teia au ra openga o te ao kino o Satani. Tei tupu mai, te rekareka nei tatou i te tu taokotai, aroa, e te tinamou.

Te tae anga to Iseraela ki te Enua Taputouia, kua akakite a Iosua e: “Kua kite oki kotou ravarai i roto i to kotou ngakau, e i roto i to kotou katoa au vaerua, e kare rava tetai o te au mea meitaki ta to kotou Atua ta Iehova i tuatua mai ia kotou i poka; kua ope rava i te tupu ia kotou.” (Iosu. 23:14) Mei te reira rai, ka tae te iti tangata o te Atua o teia tuatau ki te ao ou tei taputouia mai. Inara, e tae ei tatou ki reira, kia aru akaaka tatou i ta te Atua aratakianga. No reira, kia kite ua rai tatou pouroa i te akapapuanga o ta Iehova aratakianga!

[Au Tutu i te kapi 5]

Aratakiia nei tatou i teia tuatau e te akaaerenga a Iehova

Au apinga ou i te uruoaanga

Apii teokaratiki

Terenianga uipaanga no te tavinianga