Na Sala Meda Dina Kina ena Vuravura e Takalevu Kina na Veidabui

E TAKALEVU nikua na veidabui me vaka ga na cagi eda ceguva. E levu era dau lasu, lavaka vakalevu na ka, butako, era sega ni sauma na nodra dinau, ra qai dau kacivaka eso na iwalewale ni caka bisinisi e nanumi tu ni vinaka. Ni va qori na ivakarau ni bula, ena vakatovolei kina vakalevu na noda sasaga meda daudina. Eda na saga tiko ga vakacava meda daudina? Meda veivosakitaka mada qo e tolu na sala ena uqeti keda meda daudina. Qori na noda rerevaki Jiova, na lewaeloma vinaka, kei na noda lomavakacegu ena ka eda taukena.

Rerevaki Jiova

E vola na parofita o Aisea: ‘O Jiova sa noda turaganilewa, o Jiova sa noda vunilawa, o Jiova sa noda tui.’(Aisea 33:22) Eda na rerevaka na Kalou ke da kila na nona itutu ni veiliutaki—qori sara ga ena uqeti keda meda vorata na yalo ni veidabui. E tukuna na Vosa Vakaibalebale 16:6: “Na rerevaki Jiova ga sa ra dro tani kina na tamata mai na ca.” Qo e sega ni rere vakalialia, na noda rerevaka na nona vakatauitotogi na Kalou, ia na noda kauaitaka ga vakabibi meda kua ni vakararawataka na Tamada vakalomalagi ni dau kauaitaki keda vakalevu.—1 Pita 3:12.

E vakaraitaki ena dua na ka e yaco dina na yaga ni kauai se rere va qori. Erau gole ena baqe o Ricardo kei watina o Fernanda me rau lai kauta mai na ilavo e tautauvata ni vitunadrau na ilavo ni Merika. * A biuta kece o Fernanda na ivivi noti ena nona baosi, a sega mada ga ni wilika. Ni rau yaco e vale ni oti na nodrau sausaumi, erau kurabuitaka ni ilavo e se vo tiko ena baosi nei Fernanda e via tautauvata ga kei na ilavo erau kauta mai na baqe. Erau nanuma: “A rairai sivia tale na ka e solia mai na marama e cakacaka ena baqe.” A rawa sara ga ni rau vakayagataka na ilavo ni se levu tu na bili me saumi. E tukuna o Ricardo: “Keirau kerei Jiova me vakaukauataki keirau me keirau vakasuka na ilavo. Na neirau via vakamarautaki Jiova me vaka e vakamasuta ena Vosa Vakaibalebale 27:11, e vakavuna me keirau vakasuka na ilavo.”

Lewaeloma e Vakavulici ena iVolatabu

Eda rawa ni vakavulica na noda lewaeloma nida vulica na iVolatabu da qai saga meda bulataka na ka eda vulica. ‘Na vosa ni Kalou e bula qai kaukaua,’ ena tara na noda vakasama kei na lomada. Qo ena uqeti keda meda “dina ena ka kece.”—Iper. 4:12; 13:18.

Raica mada na ivakaraitaki i João. A levu na nona dinau, e via tautauvata kei na lima na udolu na ilavo ni Merika. A sega ni sauma na nona dinau qai toki ena dua tale na taoni. A qai vulica na ka dina o João ni oti e walu na yabaki, e uqeti koya na nona lewaeloma e vakavulici ena iVolatabu me vakauitukutuku vua na turaga a dinau tu kina me sauma na nona dinau! Ni lailai na kena isau o João qai tiko na watina kei na va na gone me qarava, a vakadonuya na turaga oya me sausaumi e veivula.

Lomavakacegu

A vola na yapositolo o Paula: “E levu dina na ka ena rawati ena noda qarava na Kalou, ia ena rawati ga ke salavata noda qarava na Kalou kei na noda lomavakacegu ena ka e tu vei keda. . . . Ke sa tiko na ka meda kania, na isulu meda  tokara, kei na vanua meda tiko kina, meda lomavakacegu.” (1 Tim. 6:6-8) Nida muria na ivakasala vuku qori, eda na sega ni rawai ena kocokoco, caka bisinisi e sega ni vakadonui vakalawa se iwalewale ni rawa ilavo totolo. (Vkai. 28:20) Nida muria na ivakasala i Paula eda na vakaliuca tiko ga na Matanitu ni Kalou da qai nuidei ni na vakarautaki na ka meda bula kina e veisiga.—Maciu 6:25-34.

Ni dau ‘veibacani na iyau’ meda kua gona ni nanuma nida na sega ni rawai ena kocokoco. (Maciu 13:22) Vakasamataka tale mada na ka e cakava o Ekani. A raica na nodra takosova vakacakamana na Isireli na Uciwai na Joritani. Ia ni rawai ena kocokoco, a sega ni vorata na gagadre me butakoca eso na siliva, koula kei na isulu saulevu era itokinivalu mai Jeriko. Na ka e cakava qori e vakavuna na nona mate. (Josua 7:1, 20-26) Sa rauta me veivakasalataki o Jisu ni oti e vica na senitiuri: “Ni yadra tiko, ni qarauni kemuni mai na ivakarau ni yalokocokoco kece”!—Luke 12:15.

Daudina ena Vanua ni Cakacaka

Meda raica mada eso na ituvaki e rawa ni vakatovolei kina na noda sasaga meda daudina ena ka kece. Na noda daudina ena vanua ni cakacaka e okati kina na noda ‘sega ni butako’—ke mani takalevu mada ga ena vanua ni cakacaka. (Taito 2:9, 10) E cakacaka ena dua na tabana vakamatanitu o Jurandir, a vola vakadodonu na levu ni ilavo e vakayagataka ena nona veilakoyaki. Ia na ilavo era kerea na nona itokani vakacakacaka me saumi lesu vei ira e sivia sara na ilavo era vakayagataka dina. A rawa nira cakava qori ni dau vunitaka na nodra veidabui na iliuliu ni cakacaka. A cudruvi Jurandir na iliuliu ni cakacaka ni daudina qai sega ni vakatara me gole ena ilakolako vakabisinisi. Ni toso na gauna, e qai dikevi na itukutuku vakailavo ena vanua ni cakacaka nei Jurandir qai vakavinavinakataki ena nona daudina, a tosoi cake tale ga na nona itutu.

E dau volivolitaki o André, a tukuna na nona boso me vakaruataka na ka e lavaki mera sauma na lewenivanua. A kerei Jiova na tacida qo me vakayaloqaqataki koya me muria na ivakavuvuli vakaivolatabu. (Same 145:18-20) A saga me vakamacalataka vua na nona boso na vuna ena sega ni cakava kina na ka e tukuna, ia e dreve na nona sasaga. A mani nanuma o André me biuta na cakacaka isau vinaka oya. Ia ni oti e dua na yabaki, a qiriti koya na nona boso qai vakadeitaka vua ni sa sega ni lavaki vakasivia na ka mera sauma na lewenivanua, a qai tosoi cake na nona itutu me manidia.

Sauma na Dinau

A vakasalataki ira na lotu vaKarisito o Paula: “Me kua ni vo tiko e dua na dinau moni  sauma.” (Roma 13:8) Eda na rairai soli ulubale meda kua ni sauma na noda dinau nida nanuma nira sa rawati ira tu o ira eda dinau kina, era sega ni vinakata na noda ilavo. Ia e veivakasalataki na iVolatabu: “Sa daukerekere na tamata ca, ka sa sega ni sauma tale.”—Same 37:21.

Ia vakacava ke da sega ni sauma na noda dinau ni yaco na ‘ka tawanamaki’? (Dauv. 9:11) A kerea vei Alfredo o Francisco na ilavo e tautauvata kei na vitu na udolu na ilavo ni Merika me sauma kina na nona mokiti. A sega ni toso vinaka na bisinisi nei Fransisco, a sega ni sauma rawa kina ena kena gauna na ilavo a dinautaka vei Alfredo. A vakaliuliu o Fransisco me veivosakitaka kei Alfredo na nona leqa qai vakadonuya o Alfredo me sausaumi vakalalai.

Kua ni Lasu

Nanuma na nodrau ivakaraitaki ca o Ananaiasa kei Safaira, e dua na veiwatini ena ivavakoso vaKarisito ena imatai ni senitiuri. Erau volitaka e dua na tikiniqele, erau kauta e dua ga na iwase ni ilavo vei ratou na yapositolo rau qai tukuna ni rau solia kece na ilavo. E vakarairai ga na nodrau lomasoli, erau vinakata ga me rau qoroi. Ena veiuqeti ni yalo tabu ni Kalou, a vakatakila na yapositolo o Pita na nodrau veidabui qai vakamatei rau o Jiova.—Caka. 5:1-11.

Erau veidabui o Ananaiasa kei Safaira, ia era dauvolavola vakadodonu ra qai daudina o ira na dauvola iVolatabu. A vola vakadodonu o Mosese na nona cudru ena dua na gauna qai vakavuna qori me sega ni butuka kina na Vanua Yalataki. (Tiko 20:7-13) O Jona tale ga a sega ni vunitaka na nona malumalumu a vakavotui ni bera ni gole i Ninive, ni oti tale ga na nona vunau e kea. Ia a vola na nona malumalumu.—Jona 1:1-3; 4:1-3.

E macala ga ni vinakati na yaloqaqa meda tukuna na ka dina, ke mani vakilai mada ga kina na rarawa, me vaka ga e laurai ena nona ivakaraitaki o Nathalia e dua na gonevuli e yabaki 14. Ni raica lesu tiko na nona pepa ni veitarogi, a raica sara ni tikitaka donu o qasenivuli e dua na isaunitaro cala. A kila ni na lailai kina na kena maka, a sega ni tu suka o Nathalia me lai raici qasenivuli. E tukuna: “Erau dau vakavulici au na noqu itubutubu meu daudina meu vakamarautaki Jiova kina. Keu sega ni tukuna vei qasenivuli, ena ca na noqu lewaeloma.” A vakavinavinakataka o qasenivuli na nona dina o Nathalia.

Daudina—iTovo e Rokovi Kina o Jiova

E dua na goneyalewa yabaki 17 o Giselle, a kunea e dua na baosi, e tu e loma eso na ivola lalai kei na ilavo e tautauvata ni 35 na dola na ilavo ni Merika. A raici ratou na vakailesilesi ni koronivuli me qarai e dua na sala me vakasukai kina na baosi vua na kena itaukei. Ni oti e dua na vula, a wilika vei ira na kalasi na ivukevuke ni qasenivuli i liu e dua na ivola e vakacaucautaki kina na nona dina o Giselle, e vakavinavinakataki tale ga kina na nona vuvale ena nona vakavulici vinaka kei na veituberi vakalotu e caka vua. Na nona “ivakarau vinaka” a vakalagilagi kina o Jiova.—Maciu 5:14-16.

E ka ni sasaga meda daudina nida bula maliwai ira era ‘lomani ira ga, era dau lomana na ilavo, tukutukuni ira, qaciqacia, ra qai sega ni yalodina.’ (2 Tim. 3:2) Na noda rerevaki Jiova, na noda lewaeloma e vakavulici ena iVolatabu kei na noda lomavakacegu ena uqeti keda meda daudina ena vuravura e takalevu kina na veidabui. Sa na qai vinaka ga na noda veiwekani kei Jiova, ni ‘yalododonu o koya qai vinakata na ivalavala dodonu.’—Same 11:7.

[iVakamacala e ra]

[iYaloyalo ena tabana e 7]

Na noda rerevaki Jiova ena vakaukauataki keda meda daudina

[iYaloyalo ena tabana e 8]

E vakalagilagi o Jiova nida daudina