Aníkena ñane rembiapo vai ko múndope ojejapoháicha

UMI hembiapo vaíva ningo ku yvytúicha oĩ opárupi. Haʼekuéra ijapu, oporokovra rasápa, imonda, ndopagái ideveha ha oñemombaʼeguasu oporombotavykuaa haguére. Upévare jaʼekuaa koʼág̃a rupi oĩha hetaiterei mbaʼe ikatúva ojapouka ñandéve ivaíva. Mbaʼéichapa ikatu ñambohovái koʼã mbaʼe? Jahecháta mbohapy mbaʼe ñanepytyvõtava: jakyhyje Jehovágui, ñahekomboʼe ñane konsiénsia ha javyʼa jarekomívare.

Mbaʼérepa jakyhyjevaʼerã Jehovágui?

Proféta Isaías heʼivaʼekue: ‘Jehová hína ñande Hués, Jehová hína ñande Léi Meʼẽha, Jehová hína ñande Rréi’ (Isa. 33:22, NM). Jahechakuaáramo Jehová haʼeha pe mburuvicha tuichavéva, jakyhyjéta ñambopochýrõ g̃uarã chupe ha upéva ñanepytyvõta ani hag̃ua ñane rembiapo vai ko múndo añáme ojejapoháicha. Ndareíri la Biblia heʼi umi tapicha ‘okyhyjéva Jehovágui omboykeha mbaʼe vai’ (Pro. 16:6, ÑÑB). Upéva ndeʼiséi jakyhyjevaʼerãha Ñandejára ñande kastigárõ g̃uarã, síno ndajapytavaiséi henondépe jaikuaágui Haʼe ojepyʼapyha ñanderehe (1 Ped. 3:12).

Jahechamína mbaʼépa ojapovaʼekue Ricardo ha hembireko Fernanda okyhyje rupi Ñandejáragui. * Haʼekuéra oguenohẽ báncogui 700 dólar, ha Fernanda omoinge ikartérape okontaʼỹre. Upéi oho opaga hikuái ideveha, ha og̃uahẽvo hógape ohechakuaa oguerekoha gueteri 700 dólar rupi. Upémarõ heʼi: “Oiméne pe kahéra hetave omeʼẽraʼe ñandéve”. Ñepyrurã haʼekuéra ohejase pe pláta opagapa hag̃ua ideveha, péro ndojapói upéicha. Ricardo omombeʼu: “Rojerure Jehovápe oremombarete hag̃ua ha romeʼẽ jey pe pláta hembýva. Ore ningo rojapose Ñandejára oipotáva ha péicha rokumpli Proverbios 27: 11 heʼíva, upévare roho romeʼẽ jey pe pláta”.

Jaiporúkena la Biblia ñahekomboʼe hag̃ua ñane konsiénsia

Jaipotáramo ñane konsiénsia ombaʼapo porã, tekotevẽ jastudia la Biblia ha ñañehaʼã jajapo upépe heʼíva. Jaikuaa ningo ‘Ñandejára Ñeʼẽ oikove ha ipuʼakaha’, upévare jajeroviakuaa ñanepytyvõtaha ñapensa hag̃ua iporãvare ha og̃uahẽtaha ñane korasõme. Ha péicha ‘jajapóta hekopete opa mbaʼe’ (Heb. 4:12; 13:18).

La Biblia oipytyvõ avei João-pe ojapo hag̃ua opa mbaʼe hekopete. Haʼe ovákuri ótro hendápe ha opyta odeve 5.000 dólar. Upéi ocho áño haguépe ostudia la Biblia ha oñepyrũ ohekomboʼe ikonsiénsia, upéicha rupi oho oheka upe odevévape opaga hag̃ua chupe. Péro haʼe saʼi ogana ha omantenevaʼerã hembireko ha cuatro ifamíliape, upévare pe karai oheja João opaga chupe saʼi saʼípe.

Mbaʼérepa javyʼavaʼerã jarekomívare?

Apóstol Pablo heʼi: ‘Tuichaite mbaʼe ningo jaservi Ñandejárape ñande pyʼaite guive ha javyʼa jarekomívare. [...]. Upévare, jaguerekóramo ñane rembiʼurã ha ñande aorã, javyʼavaʼerã koʼã mbaʼe reheve’ (1 Tim. 6:6-8, ÑÑB). Ñamombaʼéramo ko konsého nañandetaryryimoʼãi ha ndajaikemoʼãi umi negósio  heʼi guaʼúvape sapyʼaitépe ñande pláta hetataha (Pro. 28:20). Ko konsého ñanepytyvõta avei ñamotenonde hag̃ua Ñandejára Rréino, jaikuaágui ñande Ru yvagapegua omeʼẽtaha ñandéve ñane remikotevẽ (Mat. 6:25-34).

Ñanemanduʼavaʼerã tuichaiterei jajavytaha ‘jaikóramo pláta rapykuéri’ (Mat. 13:22, NM). Ani jajeroviaiterei ñandejehe ha ñaimoʼã ndoikomoʼãiha ñanderehe mbaʼeve jaikóramo pláta rapykuéri! Ñapensamína mbaʼépa oikovaʼekue Acán rehe. Haʼe ohecháma mbaʼéichapa Jehová ombohasa umi isrraelítape pe rrío Jordán rupi, upéicharamo jepe itaryrýi ha omonda pláta, óro ha peteĩ ao porã táva Jericógui. Ha ojapo haguére upe mbaʼe vaiete omano (Jos. 7:1, 20-26). Ajeve voi Jesús heʼivaʼekue upe rire: ‘Peñatende porãke ha ani pendetaryrýi mbaʼevére’ (Luc. 12:15, NM).

Ñande reko marangatúkena ñande travahohápe

Jahechamína mbaʼéicha javépa ikatu ijetuʼu ñandéve ñande reko marangatu hag̃ua opa mbaʼépe. Jaikuaaháicha ñande kristiáno ‘nañamondamoʼãi’ ñande travahohápe, péro ko múndope hetaiterei oĩ ojapóva upéicha (Tit. 2:9, 10). Ñapensamína Jurandir ohasavaʼekuére. Haʼe ombaʼapo goviérnope g̃uarã, ha oñemondo jave chupe ambue hendápe ombaʼapo hag̃ua ndaijapúi omombeʼúvo mboýpa ogastáraʼe iviáhepe. Ikompañerokuéra katu heʼi ogasta hetaveha ha ipatrón voi omoʼã chupekuéra. Upévare ipatrón ipochy Jurandir rehe ha nomondovéi chupe mamove. Péro upéi ojerrevisa itravahokuéra ha ojefelisita Jurandírpe naimondái haguére ha oñemeʼẽ chupe peteĩ puésto ijyvatevéva.

Jahechamína koʼág̃a André rembiasakue. Haʼe ningo vendedór, ha peteĩ jey ipatrón heʼi chupe okovra joʼa hag̃ua iklientekuérape. Upémarõ André oñemboʼe Jehovápe oipotágui omombarete chupe ojapo hag̃ua la Biblia heʼíva (Sal. 145:18-20). Upéi oñehaʼã omombeʼu ipatrónpe mbaʼérepa ndaikatumoʼãi ojapo ojeruréva chupe. Péro ipatrón ndoikuaaséi mbaʼeve ha upévare André ohejámante itraváho, ogana porãramo jepe. Un áño haguépe ipatronkue ohenói ha heʼi chupe ndokovrajoʼaveimaha hikuái imarchantekuérape. Ha amo ipahápe omeʼẽ chupe peteĩ puésto ijyvatevéva.

Japagákena ñande deveha

Apóstol Pablo heʼivaʼekue kristianokuérape: ‘Ani pedeve mbaʼeve avavépe’ (Rom.  13:8, NM). Oiméramo ndajapagaséi ñande deveha ñaimoʼãgui upe oiporukavaʼekue ñandéve ipláta hetaha ha noikotevẽiha voi, ñanemanduʼavaʼerã la Biblia heʼiha: ‘Hembiapo vai umi ombaʼeporúva hapichágui ha nomeʼẽvéiva chupe imbaʼe’ (Sal. 37:21).

Péro mbaʼépa jajapóta oñepresentáramo ñandéve peteĩ situasión ‘ñahaʼarõʼỹva’ ha ndaikatúi japaga ñande deveha? (Ecl. 9:11.) Upéicha ningo oikovaʼekue Francíscore. Haʼe oiporu Alfrédogui 7.000 dólar, péro nosẽporãi chupe inegósio ha ndaikatúi opaga pe tiémpo heʼivaʼekuépe. Upémarõ oho omombeʼu Alfrédope isituasión, ha haʼe oheja opaga chupe saʼi saʼípe.

Ani jajehechaukase

Yma síglo primérope Ananías ha Safira ojapovaʼekue peteĩ mbaʼe ivaietereíva, ndajajaposéiva arakaʼeve. Haʼekuéra ovende ijyvy ha heʼi guaʼu omeʼẽmbaite hague umi apóstolpe hepykue. Upéicha ojapo ojechaukaségui ha oipotágui umi hénte heʼi hesekuéra ipojeraitereiha. Péro upéi ojepilla hikuái, pe espíritu sánto oikuaauka rupi Pédrope, ha Jehová ojuka chupekuéra upepete (Hech. 5:1-11).

Umi ohaivaʼekue la Biblia katu ndojoguaiete Ananías ha Safírape, haʼekuéra omombeʼupaite opa mbaʼe ojapóva. Pór ehémplo, Moisés omombeʼu tuicha ojavy hague ha upévare Jehová ndohejái hague chupe oike pe yvy oñeprometevaʼekuépe (Núm. 20:7-13). Upéicha avei Jonás noñomíri umi mbaʼe vai ojapovaʼekue oho mboyve opredika Nínivepe ni ou rire upégui, síno omombeʼupaite (Jon. 1:1-3; 4:1-3).

Ñandepyʼaguasuvaʼerã akóinte ñamombeʼu hag̃ua pe añetegua, koʼýte ñandeperhudikátaramo. Upéicha oikovaʼekue Nathalia rehe, orekóva 14 áño. Ohechávo pe examen imboʼehára okorrehivaʼekue, ohechakuaa ojavy hague péro okorrehiha chupe oĩ porãramoguáicha. Nathalia omombeʼu imboʼehárape, oikuaáramo jepe inotaʼivetaha. Haʼe heʼi: “Che sy ha che ru chemboʼe chemichĩ guive ndovaleiha chejapu aime porãséramo Jehovándi. Ha namombeʼúirire añeñandu vaieterei vaʼerãmoʼã”. Imboʼehára oguerohoryeterei chupe ndaijapúi haguére.

Ñande reko marangatúramo ñamombaʼeguasu Jehovápe

Peteĩ mitãkuña orekóva 17 áño, hérava Giselle, ojuhu peteĩ villetéra oguerekóva 35 dólar ha dokumentokuéra. Upémarõ ogueraha direksiónpe ikatu hag̃uáicha oñemeʼẽ jey ijárape. Un mes haguépe pe visedirektór olee peteĩ kárta ofelisitahápe Giséllepe heko marangatu ha oñehekomboʼe porã haguére chupe hogapýpe ha irrelihiónpe. Péicha ‘umi mbaʼe porã ojapóva rupive’, omombaʼeguasu Jehovápe (Mat. 5:14-16).

Ijetuʼu ningo ñande reko marangatu hag̃ua oĩgui hetaiterei ‘ipláta rayhúva, ijejapo, oñemombaʼeguasu’ ha ‘ndohayhúiva pe iporãva’ (2 Tim. 3:2-4). Péro oiméramo jakyhyje Ñandejáragui, ñahekomboʼe ñane konsiénsia la Biblia rupive ha javyʼa jarekomívare, ndahasymoʼãi ñande reko marangatu hag̃ua ko múndo añáme. Avei ñañemoag̃uivéta Jehováre, jaikuaágui Haʼe ‘hekojoja ha ohayhuha umi hekojojávape’ (Sal. 11:7).

[Nóta]

[Nóta oĩva taʼanga ndive páhina 7]

Jakyhyjéramo Jehovágui ñañehaʼãta ñande reko marangatu

[Nóta oĩva taʼanga ndive páhina 8]

Ñande reko marangatúramo ñamombaʼeguasu Jehovápe