Kamoo o ka Dulago o Botega Lefaseng le le sa Botegego

GO SE botege go aperetše gohle go etša moya wo re o hemago. Batho ba bolela maaka, ba lefiša batho ditšhelete tše dintši kudu, ba a utswa, ga ba lefe dikoloto tša bona e bile ba tsenela mekgwa ya go hlalefetša ya kgwebo. Ka ge re phela tikologong e bjalo, gantši re lebeletšana le maemo ao a lekago go ikemišetša ga rena go botega. Re ka thušwa ke’ng go dula re ganetša mokgwa wa go se botege? Anke re hlahlobeng dintlha tše tharo tše bohlokwa tšeo di ka re thušago go dira bjalo. Tšona ke go boifa Jehofa, letswalo le lebotse le go kgotsofala.

Go Boifa Jehofa ka Tsela e Botse

Moporofeta Jesaya o ngwadile gore: “Jehofa ke Moahlodi wa rena, Jehofa ke Moneimolao wa rena, Jehofa ke Kgoši ya rena.” (Jes. 33:22) Go lemoga bolaodi bja Jehofa go dira gore re mmoife—se ke selo se segolo seo se re tutuetšago gore re ikemišetše go ganetša moya wa go se botege. Diema 16:6 e re: “Motho o furalela bobe ka go boifa Jehofa.” Poifo e bjalo ga se go boifa gore Modimo o tla re bolaya, eupša ke go tshwenyega ka tsela e botse gore re se nyamiše Tatago rena wa legodimong, yoo a tlogago a re rata.—1 Pet. 3:12.

Phihlelo e nngwe e bontšha gore go a hola go tshwenyega ka tsela yeo goba go ba le poifo e bjalo e botse. Ricardo le mosadi wa gagwe, Fernanda, ba ile ba ntšha tšhelete e ka bago R4 900 akhaontong ya bona ya panka. * Fernanda o ile a katela mokgobo woo wa tšhelete ka sepatšheng sa gagwe ntle le go e bala. Ge ba fihla gae ka morago ga go lefelela dikoloto, ba ile ba makatšwa ke gore ka sepatšheng sa Fernanda go be go sa na le tšhelete e lekanago le yeo ba e ntšhitšego pankeng. Ba ile ba phetha ka gore: “Motho yola a šomago pankeng o swanetše go ba a re neile tšhelete e ntši.” Mathomong ba ile ba lekega go ipolokela tšhelete yeo, ka ge ba be ba sa na le dikoloto tše dintši. Ricardo o hlalosa ka gore: “Re ile ra rapela Jehofa gore a re nee sebete sa go bušetša tšhelete yeo. Ka ge re be re kganyoga go mo thabiša ka go dumelelana le kgopelo ya gagwe yeo e lego go Diema 27:11, re ile ra tutueletšega go bušetša tšhelete yeo.”

Letswalo Leo le Tlwaeditšwego ka Beibele

Re ka ba le letswalo le lebotse ka go ithuta Beibele le ka go katanela go diriša seo re ithutago sona. Ka go dira bjalo, ‘lentšu la Modimo leo le phelago e bile e le le matla,’ le tla fihlelela menagano le dipelo tša rena. Se se tla re tutueletša go “itshwara ka go botega dilong tšohle.”—Baheb. 4:12; 13:18.

Ela hloko mohlala wa João. O be a na le sekoloto se segolo, seo se ka lekanago R35 000. Ke moka, o ile a hudugela toropong e nngwe a se a lefelela sekoloto sa gagwe. Nywaga e seswai ka morago, João o ile a ithuta therešo gomme letswalo la gagwe leo le tlwaeditšwego ka Beibele le ile la mo tutueletša gore a boele go motho yo a mo kolotago gomme a lefe sekoloto sa gagwe! Ka ge João a be a swanetše go hlokomela mosadi wa gagwe le bana ba bane ka mogolo o monyenyane wo a o hwetšago, motho yo a mo kolotago o ile a dumela gore João a mo lefe kgwedi le kgwedi go fihla e felela.

Go Kgotsofala

Moapostola Paulo o ngwadile gore: “Boineelo go Modimo bo tliša leruo le legolo ge e ba re kgotsofaletše seo re nago le sona. . . . Ge re na le dijo le diaparo re tla kgotsofala ka tšona.” (1 Tim. 6:6-8) Go tšeela godimo keletšo ye e bohlale go tla re thuša go phema go tanywa ke megabaru,  mediro e sego molaong ya kgwebo goba go tsenela mekgatlo ya go humiša batho ka pela. (Die. 28:20) Go latela keletšo ya Paulo go tla re thuša le gore re etiše pele Mmušo wa Modimo, re kgodišegile gore re tla hwetša dilo tša bohlokwa tša bophelo.—Mat. 6:25-34.

Lega go le bjalo, ka baka la “matla a forago a mahumo,” ga se ra swanela go tšeela fase kotsi ya go tanywa ke megabaru le go duma dilo tša ba bangwe. (Mat. 13:22) Nagana ka phihlelo ya Akane. O iponetše ka mahlo ge Baisiraele ba be ba tshela Noka ya Jorodane ka mohlolo. Lega go le bjalo, ka baka la go fenywa ke megabaru, ga se a ka a kgona go fenya kganyogo ya go utswa silifera, gauta le seaparo sa theko e kgolo go tšwa dilong tšeo di thopilwego motseng wa Jeriko. Tiragalo yeo e ile ya dira gore a lahlegelwe ke bophelo bja gagwe. (Josh. 7:1, 20-26) Ga go makatše ge nywagakgolo ka morago Jesu a ile a eletša ka gore: “Dulang le butše mahlo le itišitše mohuteng o mongwe le o mongwe wa megabaru”!—Luka 12:15.

Botega ge o le Mošomong

Anke ga bjale re hlahlobeng maemo a mangwe ao a ka lekago boikemišetšo bja rena bja go nyaka go botega dilong tšohle. Go botega ge o le mošomong go akaretša ‘go se utswe’—gaešita le ge ba bantši ba tlwaetše go dira bjalo. (Tito 2:9, 10) Jurandir, yo a šomelago mmušo, o be a botega ge a bega ditshenyagalelo tša maeto a mošomo. Lega go le bjalo, batho bao a šomago le bona ba be ba ngwala tšhelete e ntši go feta yeo ba e dirišitšego. Ba be ba dira bjalo ka gobane molaodi wa lefapha leo o be a emelela bašomi bao ba sa botegego. Ge e le gabotse, yena motho yoo o ile a galefela Jurandir ka ge a botega gomme a kgaotša go mo roma maetong a kgwebo. Lega go le bjalo, go se go ye kae maemo a mošomo lefapheng leo a ile a hlahlobja gomme Jurandir o ile a retwa ka baka la go botega ga gagwe. O ile a ba a hlatlošwa mošomong.

André, yo a šomago go rekiša, o ile a botšwa ke mothwadi wa gagwe gore a lefiše bareki tšhelete ka go e oketša gabedi. Ngwanabo rena o ile a rapela Jehofa gore a mo nee sebete sa go kgomarela melao ya motheo ya Beibele. (Ps. 145:18-20) O ile a ba a leka go hlalosetša mothwadi wa gagwe gore ke ka baka la eng a ka se kgone go latela tlhahlo yeo ya gagwe—eupša gwa se be le nko e tšwago lemina. Ka gona André o ile a phetha ka gore o tla rola modiro mošomong wa gagwe o lefago gabotse. Lega go le bjalo, mo e ka bago ngwaga ka morago, mothwadi yoo wa gagwe o ile a mmitša gape mošomong, a mo kgonthišetša gore bareki ga ba sa lefišwa ditšhelete tše dintši. André o ile a ba a hlatlošwa gore e be molaodi.

Lefa Dikoloto tša Gago

Moapostola Paulo o ile a eletša Bakriste ka gore: “Le se ke la kolota le ge e le mang selo.”  (Baroma 13:8) Re ka leka go nea mabaka a go se lefe dikoloto tša rena, ra phetha ka gore motho yo re mo kolotago o na le tšhelete e ntši e bile ga a e hloke. Lega go le bjalo, Beibele e lemoša ka gore: “Yo kgopo o a adima gomme a se buše.”—Ps. 37:21.

Lega go le bjalo, go thwe’ng ge e ba “nako le ditiragalo tšeo di sa letelwago” di re thibela go lefa dikoloto tša rena? (Mmo. 9:11) Francisco o ile a adima tšhelete e ka bago R49 000 go Alfredo gore a lefelele tšhelete yeo a e adimilego pankeng ge a be a aga ntlo. Eupša ka baka la mathata a kgwebo, Francisco o ile a palelwa ke go lefelela sekoloto sa gagwe ka nako yeo ba dumelelanego ka yona. O ile a dira maiteko a go ya go Alfredo gomme a mmotša bothata, ke moka Alfredo o ile a dumela gore a ka lefelelwa ganyenyaneganyenyane.

Phema go Itshenya Leina

Nagana ka mohlala o mobe wa Ananiase le Safira, banyalani ba phuthego ya Bokriste ya lekgolong la pele la nywaga. Ka morago ga go rekiša tšhemo ya bona, ba ile ba tliša feela karolwana ya tšhelete yeo go baapostola gomme ba dira eka ba tlišitše tšhelete ka moka yeo ba rekišitšego tšhemo ka yona. Ba be ba nyaka go kgahliša batho ba bangwe ka go itira eka ba na le seatla se se bulegilego. Lega go le bjalo, moapostola Petro a hlahlwa ke moya o mokgethwa wa Modimo, o ile a pepentšha bomenetša bja bona gomme Jehofa a ba bolaya.—Dit. 5:1-11.

Ka go se swane le Ananiase le Safira, bangwadi ba Beibele ba be ba bea dilo phaa e bile ba botega. Moshe o begile ka potego gore o ile a palelwa ke go itshwara gomme seo sa feleletša ka gore a se dumelelwe go tsena Nageng ya Kholofetšo. (Num. 20:7-13) Ka mo go swanago, Jona ga se a ka a uta mafokodi a gagwe ao a bilego le ona pele le ka morago ga go bolela le Baninife. Go e na le moo, o ile a ngwala ka ona.—Jona 1:1-3; 4:1-3.

Ruri go nyakega sebete gore re bolele therešo, gaešita le ge seo se ka ba le ditlamorago tše di sa kgahlišego, go etša ge seo se diragaletšego Nathalia wa nywaga e 14 sekolong se bontšha. O ile a hwetša letlakala la moleko wa sekolo woo a o ngwadilego gomme a lemoga gore dilo tše dingwe tšeo morutiši a rego di nepagetše ge e le gabotse ga se tšona. Le ge a be a tseba gore se se tla kgoma modiro wa gagwe wa sekolo, Nathalia ga se a ka a dikadika go botša morutiši wa gagwe. O itše: “Ka mehla batswadi ba ka ba be ba nthuta gore ke swanetše go botega gore ke kgahliše Jehofa. Letswalo la ka le be le tla ntlaiša ge nkabe ke sa ka ka botša morutiši wa ka.” Morutiši o ile a kgahlišwa ke potego ya Nathalia.

Potego—Seka Seo se Tumišago Jehofa

Giselle, ngwanenyana wa nywaga e 17, o ile a topa sepatšhe se se nago le ditlankana tše itšego le tšhelete e ka bago R245. O ile a dira ditokišetšo le balaodi ba sekolo gore sepatšhe seo se bušetšwe go mong wa sona. Kgwedi ka morago, mothuši wa hlogo ya sekolo o ile a balela klase ka moka lengwalo e le ge a reta Giselle ka baka la potego ya gagwe le go reta lapa labo ka tlwaetšo e botse le go godišetšwa bodumeding. ‘Mediro ya gagwe e mebotse’ e ile ya tumiša Jehofa.—Mat. 5:14-16.

Go nyakega maiteko gore re botege ge re dutše re phela gare ga batho bao e lego ‘baithati, barati ba tšhelete, ba go ikgantšha, ba ikgogomošago le ba go se botege.’ (2 Tim. 3:2) Lega go le bjalo, go boifa Jehofa ka tsela e botse, go ba le letswalo leo le tlwaeditšwego ka Beibele le go kgotsofala go tla re thuša go dula re botega lefaseng leo le sa botegego. E bile go dira gore re hlagolele segwera sa kgauswi le Jehofa, yo a ‘lokilego e bile a ratago ditiro tša go loka.’—Ps. 11:7.

[Mongwalo wa tlase]

[Diswantšho go letlakala 7]

Go boifa Jehofa ka tsela e botse go matlafatša boikemišetšo bja rena bja go nyaka go botega

[Seswantšho go letlakala 8]

Potego ya rena e tumiša Jehofa