Mbotukonzya Kuzumanana Kusyomeka Munyika Bantu Mobatasyomeki

MBUBWENYA mbuli muya ngotuyoya, kutasyomeka kwavwula kapati. Bantu balabeja, balabba, tababbadeli zikwelete alimwi balalisumpula akaambo kabumpelenge mbobacita mumakwebo. Kupona boobu kupa kuti lusyomo lwesu lusunkwe. Ino ncinzi ncotukonzya kucita kutegwa tuzumanane kusyomeka? Atulange-lange nzila zyotatwe zipati zikonzya kutugwasya kucita boobo. Kuyoowa Jehova, kuba amanjezeezya mabotu alimwi akukkutila.

Kuyoowa Kubisizya Jehova

Musinsimi Isaya wakalemba kuti: “Jehova ngumubetesi wesu, Jehova ngusimilao wesu, Jehova ngumwami wesu.” (Is. 33:22) Kuzyiba cuuno cabweendelezi ncajisi Jehova citupa kumuyoowa, eeci ciyakutugwasya kusyomeka. Bbuku lya Tusimpi 16:6 lyaamba kuti: “Kuyoowa Jehova nkokugwisya muntu mububi.” Kuyoowa kuli boobu takwaambi kuyoowa Leza akaambo kakuti mukali, pele nkuyoowa kumubisizya Taateesu wakujulu, uutubikkila maano kapati.—1 Pe. 3:12.

Cintu cakamucitikila umwi cilatondezya ncocili cibotu kuyoowa Leza. Ba Ricardo abakaintu babo ba Fernanda bakagusya mali mubbanga asika ku $700. * Ba Fernanda bakabika mali aabo mucibbeke kakunyina kwaabala. Nobakasika kuŋanda kakuli baabelesya kale mali amwi kuula zyintu zyakali kuyandika, bakagambwa kubona kuti mweelwe wamali akacaala akali kuleka aniini kweelana amali ngobakabweza kubbanga. Bakayeeya kuti: “Kweelede kuti mukaintu uubeleka mubbanga watupa mali aindilila.” Kukusaanguna bakayeeya kuti bataajoli buyo mali aayo, nkaambo bakajisi zyintu zinji nzyobakeelede kubbadelela naa kuula. Ba Ricardo bakapandulula kuti: “Twakapaila kuli Jehova kuti atugwasye kuti twaajole mali aaya. Ikuyanda kuti tumukkomanisye kweelana ambwatwaambila kubbuku lya Tusimpi 27:11 cakatupa kwajoola mali aayo.”

Manjezyeezya Aayiisyidwe Njiisyo Zyamu Bbaibbele

Tulakonzya kutondezya kuti tulaiya Bbaibbele kuti katubala akuzyibelesya nzyotwiiya. Aboobo ‘ijwi lya Leza lili abuumi alimwi lili anguzu,’ liyakutunjila mumoyo. Eeci ciya kutukulwaizya “kuti katusyomeka muzyintu zyoonse.”—Heb. 4:12; 13:18.

Amubone cakabacitikila ba João. Bakajisi cikwelete cipati cisika ku $5000. Pele kabataninga cibbadela cikwelete bakalongela kudolopo limbi. Nokwakainda myaka iili lusele, ba João bakaiya kasimpe alimwi manjezyeezya aabo akayiisyigwa njiisyo zyamu Bbaibbele akabapa kuti bapiluke kumuntu wakabakweletesya mali kutegwa bakabbadele cikwelete cabo. Akaambo kakuti ba João balikwete alimwi balijisi bana bone mbobeelede kulanganya amali masyoonto ngobajana, ooyu muntu wakazumina kuti kabamupa amwezi.

Kukkutila

Mwaapostolo Paulo wakalemba kuti: “Kuli mpindu mpati mukubelekela Leza cakulyaaba, ikuti naa twakkutila azyintu nzyotujisi. . . . Aboobo twanoojisi cakulya azyakulivwumba, tunookkutila azyintu eezyi.” (1 Ti. 6:6-8) Ikutobela lulayo oolu lwabusongo kuya kutugwasya kuleya tukole tupa kuti tube balyato, kucita  makwebo aatazumizyidwe amulawo naa kuvwuba cakufwaambana munzila yabumpelenge. (Tus. 28:20) Kutobela lulayo lwa Paulo kuya kutugwasya kubikka Bwami bwa Leza kumbele akuba alusyomo lwakuti tuyoopegwa zyoonse nzyotuyandika.—Mt. 6:25-34.

Nokuba boobo, akaambo “[k]akweena kwabuvwubi” tatweelede kuyeeya kuti tatukonzyi kuyungwa kuti tube balyato. (Mt. 13:22) Kamuyeeya cakacitika kuli Akani. Wakalibonena ameso ciindi bana Israyeli nobakazabuka Mulonga wa Jordano camaleele. Nokuba boobo, akaambo kabulyato wakabba nsiliva angolida alimwi acisani cibotu kapati akati kazyintu zyibakasaala kumunzi wa Jeriko. Kucita boobu kwakamupa kuti afwe. (Jos. 7:1, 20-26) Nkakaambo kaako myaanda yamyaka yakatobela Jesu wakacenjezya kuti: “Amucenjele akulikasya kubulyato buli boonse.”—Lk. 12:15.

Kamusyomeka Kumilimo

Lino atulange-lange zyintu zimwi nzyotucita zikonzya kusunka lusyomo lwesu. Kusyomeka notuli kumilimo kubikkilizya ‘kutabba,’ nokuba kuti kubba kuli bamwi ncilengwa buya. (Tit. 2:9, 10) Ba Jurandir ibabeleka mumfwulumende bakali kusyomeka nobakali kulemba mali ngobakali kupegwa aakweenzya kuya kumilimo. Pele mbibakali kubeleka limwi balo bakali kulemba mali manji kwiinda ngobakali kubbadela. Bakali kucita oobo akaambo kakuti mupati wamulimo wakali kubakwabilila babelesi bakwe kucita zyintu cakutasyomeka. Imupati wamulimo ooyu wakabanyemena ba Jurandir akaambo kakusyomeka, aboobo wakaleka kubatuma kumasena aambi kuyakucita makwebo. Mukuya kwaciindi, wakalanga alimwi mbubakali kwaabelesya mali ba Jurandir, wakabalumbaizya akaambo kakuti bakali kusyomeka. Alimwi bakasumpulwa amulimo.

Ba André bakali kusambala mucintoolo, wakabalemba mulimo wakabaambila kuti zyoonse zyobasambala zyeelede kubbadelelwa ziindi zyobilo. Mukwesu ooyu wakapaila kuli Jehova kutegwa kazumanana kutobela njiisyo zyamu Bbaibbele. (Int. 145:18-20) Alimwi wakapandulula kuli basikumulemba mulimo ncaatakali kukonzya kwaatobela malailile aabo—pele tiibakamumvwida pe. Aboobo, ba André bakacileka mulimo nokuba kuti wakali kuvwolwa mali manji. Kumane, nokwakainda mwaka omwe, bakabaita alimwi akubaambila kuti bakaileka nzila iilya njobakali kubelesya. Ba André bakasumpulwa amulimo.

Mweelede Kupilusya Cikwelete

Mwaapostolo Paulo wakaambila Banakristo kuti: “Mutabi acikwelete cili coonse kumuntu  uuli woonse.” (Lom. 13:8) Ndiza inga mwayeeya kuti mutabbadeli cikwelete akaambo kakuti wakamupa ulijisi mali manji. Pele Bbaibbele licenjezya kuti: “Sizibi ulakweleta pele tapilusyi.”—Int. 37:21.

Ino mbuti kuti ‘mwasikilwa mapenzi’ aatakonzyi kumupa kuti mupilusye cikwelete? (Muk. 9:11) Ba Francisco bakakweleta mali kuli ba Alfredo asika ku $7000 kuti babbadelele ŋanda. Pele akaambo kakuti makwebo aabo tanaakali kweenda kabotu, bakaalilwa kupilusya cikwelete aciindi ceelede. Ba Francisco bakaunka kuli ba Alfredo kuya kubaambila makani aaya, ba Alfredo bakazumina kuti kababbadela asyoonto-syoonto.

Mutapi Muzeezo Uulubide

Amuyeeye cikozyanyo cibi ca Ananiya a Safira, banabukwetene bamumbungano ya Banakristo bamumwaanda wakusaanguna. Nobakausambala muunda wabo, bakaleta buyo mali masyoonto ngobakapa baapostolo akwaamba kuti ngamali alikke ngobakajana. Bakali kuyanda kulitondezya kuti mbaabi. Pele mwaapostolo Petro kasololelwa amuuya uusalala wa Leza, wakayubununa bumpelenge bwabo alimwi Jehova wakabajaya.—Mil. 5:1-11.

Kwiindana aba Ananiya a Safira batakali kusyomeka, basikulemba Bbaibbele bakali kwaamba masimpe alimwi bakali kusyomeka. Musa akaambo kakusyomeka wakalemba mbwaakanyema, calo cakapa kuti atanjili mu Nyika Yakasyomezyedwe. (My. 20:7-13) Mbubwenya buyo, Jona taku naakasisa ncaakacita katana anaakamana kubakambaukila bana Nineve. Nokuba boobo, wakazilemba zyoonse.—Jon. 1:1-3; 4:1-3.

Masimpe, kuliyumya kulayandika kutegwa mwaambe masimpe, nokuba kuti zimwi ziindi kulakonzya kumunjizya mumapenzi mbuli cakacitika kucikolo kuli Nathalia uuli amyaka iili 14. Wakaamba kuti bumwi bwiinguzi bwamusunko mbubakamujanisya bayi bwakali fwide. Nokuba kuti wakalizyi kuti eeci cilamujola munsi mulwiiyo lwakwe, Nathalia tanaakawaya-waya kwaambila bayi bakwe. Wakaamba kuti: “Bazyali bangu lyoonse bali kundiyiisya kuti, ikutegwa ndimukkomanisye Jehova ndiyandika kusyomeka. Nindakapenga mumoyo nindatakabaambila bayi.” Bayi bakakkomana kubona kuti Nathalia wakali kusyomeka.

Ikusyomeka—Mbube Bupa Kuti Jehova Kalemekwa

Giselle musimbi wamyaka iili 17 wakajana mpotomona yamali aakali kusika ku $35. Wakaambila bapati bacikolo kuti bamwaambile mukamwini mpotomona kuti aboole kwiibweza. Nikwakainda mwezi, uutobela mupati wacikolo wakabala lugwalo kuli basicikolo bakali kwiiya a Giselle kumulumbaizya kuti wakali kusyomeka alimwi bakabalumbaizya bamukwasyi wakwe kuti bakamuyiisya kabotu alimwi acikombelo cakwe ncibotu. ‘Milimo yakwe mibotu’ yakapa kuti Jehova atembaulwe.—Mt. 5:14-16.

Kuyandika kusolekesya kutegwa katusyomeka nkaambo tukkala akati kabantu “basikuliyanda bayandisya mali, basikulidunda, basikulisumpula, batasyomeki.” (2 Ti. 3:2) Nokuba boobo, ikuyoowa Jehova, kubelesya manjezyeezya ayiisidwe Bbaibbele akukkutila kulakonzya kutugwasya kuzumanana kusyomeka munyika muli bantu batasyomeki. Alimwi tulazumanana kumvwana a Jehova ‘uululeme, uuyandisya milimo yabaluleme.’—Int. 11:7.

[Bupanduluzi buyungizidwe]

[Zifwanikiso izili apeeji 7]

Ikuyoowa Jehova kutugwasya kuti katusyomeka

[Cifwanikiso icili apeeji 8]

Kulilemeka kabotu kupa kuti Jehova alumbaizyigwe