Ndlela Yo Tshama Hi Tshembekile eMisaveni Leyi Nga Tshembekiki

KU FANA ni moya lowu hi wu hefemulaka, ku nga tshembeki ku kona emisaveni hinkwayo. Vanhu va hemba, va hakerisa van’wana mali leyi tlakukeke ya ntirho lowu va va endleleke wona, va yiva, a va hakeli swikweleti naswona va tibuma hi ku endla vukungundzwana emabindzwini. Leswi hi hanyaka ni vanhu vo tano, hakanyingi hi langutana ni swiyimo leswi ringaka ku tiyimisela ka hina ko tshama hi tshembekile. Hi nga hambeta njhani hi lwisana ni mukhuva wa ku nga tshembeki? A hi kambisiseni tinhla tinharhu leti nga ta hi pfuna leswaku hi endla tano. I ku chava Yehovha, ku va ni ripfalo lerinene ni ku eneriseka.

Ku Chava Yehovha Hi Ndlela Leyi Faneleke

Muprofeta Esaya u tsale a ku: “Yehovha i Muavanyisi wa hina, Yehovha i Munyiki wa nawu wa hina, Yehovha i Hosi ya hina.” (Esa. 33:22) Ku tiva xikhundlha xa Yehovha swi hi endla hi n’wi chava, ku nga nsusumeto lowu wu hi endlaka hi tiyimisela ku lwisana ni moya wa ku nga tshembeki. Swivuriso 16:6 yi ri: “Munhu u fularhela swo biha hikwalaho ka ku chava Yehovha.” Ku chava koloko a hi kona loku endlaka munhu a khomiwa hi rhumbyana hileswi a chavaka leswaku Xikwembu xi ta n’wi xupula, kambe i ku chava loku faneleke loku hi endlaka hi nga swi lavi ku twisa Tata wa hina wa le tilweni ku vava, loyi a khathalaka swinene ha hina.—1 Pet. 3:12.

Ntokoto wun’wana wa xiviri wu kombisa vuyelo lebyinene bya ku va ni ku chava koloko loku faneleke. Ricardo ni nsati wakwe Fernanda, va teke mali leyi ringanaka 4 900 wa tirhandi ebangi. * Fernanda u hoxe mali yoleyo exipachini handle ko yi hlaya. Loko va fika ekaya endzhaku ko hakela swikweleti swin’wana, va hlamarile loko va kuma mali leyi a yi lava ku ringana ni leyi va yi tekeke ebangi ya ha ri exipachini xa Fernanda. Va gimete hi ku vula va ku, “Mutirhi wa le bangi u fanele a hi nyike mali yo tala.” Eku sunguleni va ringeke ku tshama ni mali yoleyo tanihi leswi a va ri ni swikweleti swin’wana leswi a va nga si swi hakela. Ricardo u ri: “Hi khongele eka Yehovha leswaku a hi nyika matimba yo tlherisa mali yoleyo. Ku navela ka hina ko lava ku n’wi tsakisa leswaku hi hlamula xikombelo xakwe lexi nga eka Swivuriso 27:11 ku hi susumetele ku lava ku tlherisa mali yoleyo.”

Ripfalo Leri Leteriweke Hi Bibele

Hi nga letela ripfalo ra hina hi ku dyondza Bibele ni ku tikarhatela ku tirhisa leswi hi swi dyondzeke. Kutani ‘rito ra Xikwembu leri hanyaka ri tlhela ri va ni matimba,’ ri ta fikelela mianakanyo ni timbilu ta hina. Leswi swi ta hi susumetela “ku tikhoma hi ku tshembeka eka swilo hinkwaswo.”—Hev. 4:12; 13:18.

Xiya mhaka ya João. U tshike xikweleti xakwe xi kula xi kala xi ringana mali ya 35 000 wa tirhandi. Kutani u rhurhele edorobeni rin’wana handle ko hakela xikweleti xexo. Endzhaku ka malembe ya nhungu, João u dyondze ntiyiso naswona ripfalo rakwe leri leteriweke hi Bibele ri n’wi susumetele ku ya tihlanganisa ni n’wini wa khampani leyi a a yi kolota leswaku a ta hakela xikweleti xexo. Leswi João a a khathalela nsati ni vana va mune hi muholo lowu nga nyawuriki, n’wini wa khampani u pfumerile leswaku a n’wi hakela n’hweti ni n’hweti.

Ku Eneriseka

Muapostola Pawulo u tsale a ku: “Ku tinyiketela loku ku nga ni vukwembu swin’we ni ku eneriseka i ndlela leyi pindzurisaka swinene. . . . Loko hi ri ni swakudya ni swifunengeto, hi ta eneriseka hi swilo leswi.” (1 Tim. 6:6-8) Ku tirhisa ndzayo leyi ya vutlhari swi ta hi pfuna leswaku hi papalata ku phasiwa hi makwanga ni mikhuva ya vukungundzwana yo fambisa bindzu kumbe ku nghenela swikimi swo fuwa hi xihatla leswi nga ni vukanganyisi. (Swiv. 28:20) Ku landzela ndzayo ya Pawulo swi ta tlhela swi hi pfuna ku rhangisa Mfumo wa Xikwembu  evuton’wini bya hina, hi ri ni ntshembo wa leswaku swilaveko swa hina swa xisekelo hi ta swi kuma.—Mat. 6:25-34.

Hambiswiritano, hikwalaho ka “matimba ya vuxisi bya rifuwo,” a hi fanelanga hi swi tekela ehansi leswaku makwanga ni ku navela swi nga hi hlula. (Mat. 13:22) Tsundzuka mhaka ya Akani. U vone Vaisrayele va tsemakanya Nambu wa Yordani hi singita. Hambiswiritano, leswi a hluriweke hi makwanga a nga swi kotanga ku lwisana ni ku navela ku yiva silivhere, nsuku ni nguvu yo durha swinene eka swilo leswi phangiweke emutini wa Yeriko. U file hikwalaho ko yiva. (Yox. 7:1, 20-26) A swi hi hlamarisi leswi endzhaku ka malembe yo tala, Yesu a nyikeleke xilemukiso lexi: “Tshamani mi pfule mahlo ya n’wina naswona mi tivonela eka muxaka wun’wana ni wun’wana wa ku navela”!—Luka 12:15.

Tshembeka eNtirhweni

Sweswi a hi kambisiseni swiyimo swin’wana leswi nga ringaka ku tiyimisela ka hina ko tshama hi tshembekile eka swilo hinkwaswo. Ku tshembeka entirhweni swi katsa ku “nga yivi,” hambiloko ku yiva swi tekiwa ku ri mukhuva wa kona. (Tito 2:9, 10) Jurandir loyi a a tirha ekhampanini leyi yimelaka mfumo a a tshembeka loko a rhumela swikoxo swa mali leyi a yi tirhiseke loko a famba hi ntirho. Kambe vatirhi-kulobye a va rhumela swikoxo leswi tlakukeke swa mali leyi va nga yi tirhisangiki. A va endla tano hikuva murhangeri wa ntsindza wa tikhampani teto a a pfumelela vatirhi ku endla vukungundzwana byebyo. Entiyisweni, murhangeri yoloye u holovele Jurandir hikwalaho ka leswi a tshembekeke naswona u n’wi tshikise ku famba hi ntirho. Hambiswiritano, hi ku famba ka nkarhi maphepha ya swa timali ya khampani ya vona ma kamberiwile naswona Jurandir u bumabumeriwile hikwalaho ka vutshembeki byakwe. U tlhele a tlakusiwa entirhweni.

André, loyi a a ri muxavisi wa le xitolo, u byeriwe hi muthori wakwe leswaku a hakerisa vanhu mali leyi phindhiweke kambirhi ya swilo leswi va endleriweke swona. Makwerhu loyi u khongele eka Yehovha a kombela xivindzi leswaku a kota ku namarhela milawu ya Bibele. (Ps. 145:18-20) U tlhele a ringeta ku hlamusela muthori wakwe leswaku ha yini a nga ta ka a nga n’wi yingisi, kambe ku lo fana ni kwala. Kutani André u endle xiboho xo tshika ntirho lowu lowu holelaka kahle. Hambiswiritano, endzhaku ka nkarhi lowu endlaka kwalomu ka lembe, khale ka muthori wakwe u tlhele a n’wi vitana leswaku a ta tirha, a n’wi tiyisekisa leswaku tikhasitama a ta ha hakerisiwi mali leyi engetelekeke. André u tlakusiwile a va mininjhere.

Hakela Swikweleti

Muapostola Pawulo u tsundzuxe Vakreste a ku: “Mi nga koloti munhu xanchumu.” (Rhom. 13:8) Hi nga ha ringeta ku tiyimelela leswaku hi nga  hakeli xikweleti, hi vula leswaku munhu loyi hi n’wi kolotaka u ni mali yo tala lerova a swi bohi leswaku hi n’wi hakela. Kambe Bibele ya lemukisa: “Lowo homboloka wa lomba kambe a nga tlherisi.”—Ps. 37:21.

Hi nga endla yini loko “xiendlakalo lexi nga languteriwangiki” xi endla leswaku swi hi tikela ku hakela xikweleti xa hina? (Ekl. 9:11) Francisco u lombe mali leyi ringanaka 49 000 wa tirhandi eka Alfredo leswaku a hakela mali leyi bangi yi n’wi lombeke yona ku hakela yindlu. Kambe hikwalaho ka swiphiqo swin’wana leswi a veke na swona ebindzwini rakwe, u tsandzekile ku hakela xikweleti xakwe hi siku leri vekiweke. Francisco u ye eka Alfredo leswaku va ta vulavula hi mhaka yoleyo, naswona Alfredo u pfumerile ku hakeriwa hakatsongo-tsongo.

Papalata Ku Tiendla N’wavunene

Tsundzuka xikombiso xo biha xa Ananiya na Safira, ku nga mpatswa wun’wana wa le vandlheni ra Vukreste ra lembe-xidzana ro sungula. Endzhaku ko xavisa nsimu, va yise ntsena xiphemu xa mali ya kona eka vaapostola naswona va vule leswaku a ku ri yona mali leyi va xaviseke ha yona. A va lava ku voniwa hi vanhu leswaku va hanana. Hambiswiritano, Xikwembu xi huhutele muapostola Petro hi moya wa xona lowo kwetsima leswaku a paluxa vukanganyisi bya vona naswona xi va dlayile.—Mint. 5:1-11.

Ku hambana na Ananiya na Safira lava a va nga tshembekanga, vatsari va Bibele a va tshembekile. Muxe u tsale hi ta ku hlundzuka kakwe loku endleke leswaku a nga pfumeleriwi ku nghena eTikweni leri Tshembisiweke. (Tinhl. 20:7-13) Hilaha ku fanaka, Yonasi a nga ku fihlanga ku tsana kakwe loku a ku kombiseke emahlweni ko ya chumayela Vaninivha ni le ndzhaku ka sweswo. Kambe u tsale ha kona.—Yon. 1:1-3; 4:1-3.

Hakunene xivindzi xa laveka leswaku u vulavula ntiyiso hambi loko sweswo swi ta ku tisela vuyelo lebyi nga tsakisiki, hilaha swi kombisiwaka hakona eka leswi humeleleke Nathalia wa malembe ya 14 exikolweni. U kambisise xikambelo xakwe kutani a vona leswaku yin’wana ya tinhlamulo takwe leyi mudyondzisi wakwe a yi gwabiseke, kahle-kahle a yi hoxile. Hambileswi Nathalia a a swi tiva leswaku ku byela mudyondzisi wakwe hi xihoxo xexo a swi ta endla leswaku timaraka takwe ti hunguteka xisweswo a feyila xikambelo xexo, a nga tshikanga ku n’wi byela. U te: “Minkarhi hinkwayo vatswari va mina va ndzi dyondzise leswaku ndzi fanele ndzi tshembeka leswaku ndzi tsakisa Yehovha. Ripfalo ra mina a ri ta va ri ndzi kingindzile loko a ndzi nga n’wi byelanga mudyondzisi wa mina.” Mudyondzisi yoloye u bumabumele Nathalia hikwalaho ka ku tshembeka kakwe.

Ku Tshembeka I Mfanelo Leyi Dzunisaka Yehovha

Giselle wa malembe ya 17, u kume xipachi lexi nga ni mapapila ni mali leyi ringanaka 245 wa tirhandi. U vulavurisane ni valawuri va xikolo leswaku va tlherisela xipachi xexo eka n’wini wa xona. Endzhaku ka n’hweti, mupfuni wa nhloko ya xikolo u hlayele tlilasi hinkwayo papila leri a ri bumabumela Giselle hikwalaho ka ku tshembeka kakwe ni ku bumabumela vatswari vakwe hileswi va n’wi dyondziseke mikhuva leyinene ni leswi va n’wi kuriseke hi milawu ya vukhongeri. ‘Mintirho yakwe leyinene’ yi dzunise Yehovha.—Mat. 5:14-16.

Swi lava matshalatshala lamakulu ku tshembeka tanihi leswi hi hanyaka exikarhi ka vanhu ‘lava tirhandzaka, varhandzi va mali, lava titivaka, lava titlakusaka ni lava nga tshembekiki.’ (2 Tim. 3:2) Nilokoswiritano, ku chava Yehovha hi ndlela leyi faneleke, ku va ni ripfalo leri leteriweke hi Bibele ni ku eneriseka swi nga hi pfuna leswaku hi tshama hi tshembekile emisaveni leyi nga tshembekiki. Ku tshembeka swi nga tlhela swi hi pfuna ku hlakulela vuxaka lebyikulu na Yehovha, loyi ‘a lulameke naswona a rhandzaka swiendlo swo lulama.’—Ps. 11:7.

[Nhlamuselo ya le hansi]

[Swifaniso leswi nga eka tluka 7]

Ku chava Yehovha hi ndlela leyi faneleke swi tiyisa ku tiyimisela ka hina ko tshama hi tshembekile

[Xifaniso lexi nga eka tluka 8]

Ku tshembeka ka hina ku dzunisa Yehovha