Ani Okaiɔ?

Ani oná Buu-Mɔɔ srɔtoi ni ba nyɛsɛɛ nɛɛ akanemɔ he miishɛɛ? Kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:

• Mɛni ji ‘nii ni jara wa’ ni abuaa naa kɛjɛɔ jeŋmaji lɛ fɛɛ mli lɛ? (Hag. 2:7)

Nibii nɛɛ ji adesai ní yɛ emuu ní amɛyeee lɛ fɛɛ sɛɛ lɛ, amɛjɛɔ suɔmɔ mli amɛjáa Yehowa lɛ. (Abɛi 27:11) Amɛji ‘nii ni jara wa’ ni woɔ ehiɛ nyam lɛ, ni ehiɛ sɔɔ amɛtsuiŋ ni amɛjɛɔ amɛjáa lɛ kɛ ekãa ni amɛkɛsɔmɔɔ lɛ lɛ waa.—4/1, baafa 11.

• Mɛni ha Daniel tsɔ “nuu ní” Yehowa ‘sumɔɔ esane naakpa’ lɛ? (Dan. 10:11, 19)

Daniel ji mɔ ko ni bɔɔ mɔdɛŋ waa kɛ Ŋmalɛi lɛ kasemɔ. (Dan. 9:2) Eji mɔ ko ni kɛ sɔlemɔ shwɛɛɛ kwraa. (Dan. 2:17, 18) Nɔ titri ni kã etsui nɔ ji ní ewo Yehowa gbɛi lɛ hiɛ nyam. (Dan. 2:20, 28; 9:19)—4/1, baafa 12-13.

• Ani anɔkwa Kristofoi kɛ Nyɔŋmɔ gbɛ́i lɛ tsuɔ nii akɛ sɛbɛ?

Mɛi komɛi buɔ nibii komɛi loo okadii komɛi akɛ sɛbɛ ni baabu amɛhe yɛ naakpɛɛ gbɛ nɔ, shi Nyɔŋmɔ webii lɛ ebuuu Nyɔŋmɔ gbɛ́i lɛ akɛ sɛbɛ ni baabu amɛhe. Amɛyɛ hemɔkɛyeli yɛ Yehowa mli ni amɛbɔɔ mɔdɛŋ akɛ amɛbaafee esuɔmɔnaa nii, ni no tsɔɔ akɛ amɛkɛ Nyɔŋmɔ gbɛ́i lɛ efee amɛbobaahe. (Zef. 3:12, 13)—1/15, baafa 5-6.

• Mɛɛ gbɛ nɔ fɔlɔi baanyɛ aye abua amɛbii lɛ koni amɛkpɛ yiŋ ni nilee yɔɔ mli yɛ jeŋba he saji ahe?

Esa akɛ fɔlɔi aha jeŋba he mlai ni amɛhiɔ shi yɛ naa lɛ afee faŋŋ kɛha amɛbii lɛ. Esa akɛ amɛha amɛbii lɛ ale nɔ fɛɛ nɔ ni kɔɔ bɔlɛnamɔ he. Kɛfata he lɛ, esa akɛ amɛye amɛbua amɛbii lɛ ni amɛsusu nɔ ni baajɛ jeŋba he mlai ni Yehowa ewo lɛ mli ni aaaku lɛ mli kɛba lɛ he.—4/1, baafa 19-20.

• Mɛni Hewɔ Yehowa kwa Maŋtsɛ Saul lɛ?

Kulɛ esa akɛ Saul amɛ ni Nyɔŋmɔ gbalɔ lɛ abashã afɔle ko, shi maŋtsɛ lɛ gbo toi ni lɛ diɛŋtsɛ eshã afɔle lɛ. Sɛɛ mli lɛ, ebooo fãmɔ ni akɛha lɛ akɛ ekpata maŋ ko ni ji Israel henyɛlɔ lɛ hiɛ lɛ toi.—2/15, baafa 22-23.

• Te wɔɔfee tɛŋŋ wɔtsɔɔ akɛ wɔnyɛɔ efɔŋfeemɔ lɛ?

Wɔnuŋ dãa bɔ ni esaaa, wɔbaakpoo mumɔi atsɛmɔ nifeemɔi, ni wɔbaabo Yesu kɔkɔbɔɔ ni kɔɔ jeŋba he lɛ toi. Ákɛ nɔkwɛmɔnɔ lɛ, wɔbaakpoo mfonirii ni teɔ bɔlɛnamɔ akɔnɔ shi, kɛ susumɔi ni ejaaa ni ebaanyɛ eha wɔná lɛ. (Mat. 5:27, 28) Kɛfata he lɛ, wɔkɛ mɛi ni ashwie amɛ lɛ ebɔŋ.—2/15, baafa 29-32.

• Mɛɛ Biblia mli shishitoo mlai komɛi haa wɔyɔseɔ Yehowa susumɔ yɛ asɔshwɛmɔ he? (Efe. 5:17)

Nyɔŋmɔ buɔ shade ni aheɔ ayeɔ lɛ akɛ eji wɔŋjamɔ. (Yes. 65:11) Yehowa bɔ ejálɔi lɛ kɔkɔ ni amɛkwɛ amɛhe nɔ jogbaŋŋ yɛ hiɛkɔɔ he. (2 Mose 20:17; Rom. 7:7) Nyɔŋmɔ tsuji náa shika kɛtsɔ amɛ diɛŋtsɛ amɛdeŋmegbomɔ nɔ. (Efe. 4:28; 2 Tes. 3:10, 12)—4/1, baafa 22-23.

• Mɛɛ gbɛ nɔ Yeremia tamɔ tso “ní atɛo yɛ nui ahe ní lɛɔ eshishifãi amli”? (Yer. 17:7, 8)

Etee nɔ ewo yibii; ni asaŋ ehaaa hefɛoyelɔi aná enɔ hewalɛ. No najiaŋ lɛ, ekɛ ehe kpɛtɛ faa ni báa wala yi lɛ Jɛɛhe lɛ he, ni eha nɔ fɛɛ nɔ ni Nyɔŋmɔ kɛɛ lɛ lɛ kã etsui nɔ.—3/15, baafa 14.

• Mɛni Hiob wiemɔi ni yɔɔ Hiob 14:13-15 lɛ haa wɔkaseɔ yɛ Yehowa he?

Yehowa sumɔɔ mɛi ni kɛ amɛhe fɔ̃ɔ enɔ, ni amɛhaa eshɔ̃ɔ amɛ koni amɛfee mɛi ni saa ehiɛ lɛ jogbaŋŋ. (Yes. 64:8)—4/1, baafa 31.

• Mɛɛ gbɛ nɔ Samuel ‘tsu jalɛ nii’? (Heb. 11:32, 33)

Samuel ye ebua ni nibii ni sa ni amɛja yɛ Nyɔŋmɔ hiɛ lɛ fee faŋŋ. Etee nɔ ewo yibii kpakpai ejaakɛ ekɛ tsuishitoo mɛ Yehowa, ni yɛ nakai beaŋ nɔŋŋ lɛ ekɔɔɔ he eko nifɔjianii ni mɛi ni bɔle lɛ fee lɛ, etee nɔ etsu nitsumɔ ni akɛwo edɛŋ lɛ jogbaŋŋ.—4/1, baafa 27.