Nemanduʼápa koʼã mbaʼére?

Katuete revyʼáneraʼe releévo umi Ñemañaha ramoite osẽvaʼekue. Ehechami nemanduʼápa koʼã mbaʼére:

• Mbaʼérepa jaʼekuaa añetehápe oĩ hague pe hardín de Edén?

La Biblia omombeʼu porã moõitépa opytavaʼekue pe hardín, ha koʼag̃aite peve oĩ gueteri umi mokõi rrío oñeʼẽha Génesis. Oñemombeʼu jave káso térã kuénto ningo noñemombeʼúi koʼãichagua informasión. Jesús pe ‘testígo jeroviapy’ imanduʼavaʼekue Adán ha Eva rehe (1/4, páhina 5, 6 ha 9).

• Moõpa oĩ pe paraíso oñeʼẽha la Biblia?

Ñandejára heʼi Adán ha Évape: “Peñembohetáke pemyenyhẽ meve ko yvy ha pemoĩ pende poguýpe” (Gen. 1:28, ÑÑB). Jahechakuaa upéicharõ ñande Apohare ymaite guive oipotaha yvyporakuéra oñembohetave ha oiko peteĩ paraísope ko yvy ape ári (1/1, páhina 18).

• Oiporúpa kristianokuéra kurundu térã amulétoramo Ñandejára réra?

Nahániri. Ñandejára réra ndahaʼéi peteĩ amuléto, upévare ani ñaimoʼã ojehai haguére ñande rógape térã ñande kosakuérare ndoikomoʼãiha ñanderehe ivaíva. Ñande ñañemoĩse Jehová poguýpe haʼe ñanemoʼã hag̃ua, péro upéva ndeʼiséi jaikotaha ñamoĩ héra ápe ha pépe (Sof. 3:12, 13) (15/1, páhina 5 ha 6).

• Oipyʼapýpa umi ánhelpe ñande jajapóva?

Jesús omombeʼuvaʼekue umi ánhel ojepyʼapyha ñanderehe. Haʼe heʼi: ‘Ñandejára anhelkuéra ovyʼa peteĩ hembiapo vaíva ojevýrõ’ (Lucas 15:10,NM). Heʼi avei haʼekuéra ñanepytyvõvaʼerãha ñaime porã hag̃ua Jehová ndive (1/1 páhina 9).

• Mbaʼérepa Jehová omboyke rréi Saúlpe?

Rréi Saúl ohaʼarõ rangue Ñandejára profétape ombaʼekuaveʼẽ hag̃ua, ojapóntema ijehegui rei, upéicha ohechauka naiñeʼẽrenduiha. Peteĩ jey, Jehová heʼi chupe ohundiete hag̃ua peteĩ tetã, péro haʼe ndojapói upéva (15/2, páhina 22 ha 23).

• Mbaʼéichapa ikatu jahechauka nañandejaʼeiha umi mbaʼe vaíre?

Ñañatendevaʼerã ani jaʼu rasa vevída, jajehekýi espiritísmogui, ha ñanderekopotĩvaʼerã Jesús heʼi haguéicha. Pór ehémplo, ñamboykete pornografía ani hag̃ua umi mbaʼe jahecháva omongyʼa ñandepyʼapy (Mat. 5:27, 28). Ndajajeheʼaivaʼerã avei umi oñemosẽvaʼekue rehe kongregasióngui (15/2, páhina 29-32).

• Ojeʼe testígo de Jehová ndosegiseiha mbaʼeveichagua tratamiénto, añete piko upéva?

Nahániri. Testigos de Jehová ndojapói umi tratamiénto ojoavýva la Biblia heʼíva ndive. Oĩ ningo hetaiterei tratamiénto ikatúva ojejapo. Upévare oñepohãnóta jave, haʼekueraite odesidi mbaʼépa ojapóta. Osegítaramo peteĩ tratamiénto oikuaa raẽ upe ojapótava. Upéichamante oikuaáta oĩ porãpa upe tratamiénto ha ndojapomoʼãipa peteĩ mbaʼe ombopochýtava Ñandejárape (Gálatas 6:5; Hebreos 5:14) (1/4 páhina 12).

• Mbaʼérepa ikatu jaʼe Jeremías haʼeteha peteĩ ‘yvyramáta oñeñotỹva ysyry rembeʼýpe ha oñembohapóva ysyry gotyo’? (Jer. 17:7, 8.)

Jeremías akóinte ojapovaʼekue Jehová oguerohorýva, ha omboguapy rangue ijehe umi hénte aña heʼíva, ojepytaso mbarete Jehová ykére omombaʼetereígui opa mbaʼe Haʼe heʼíva (15/3, páhina 14).

• Mbaʼépepa ñanepytyvõta jaikuaa porãramo mbaʼéichapa ombaʼapo Jehová organisasión ko yvy arigua?

Ñanepytyvõta mbohapy hendáicha: Ñamombaʼevéta ñane ermanokuéra ombaʼapo kyreʼỹvape ñanderehehápe (1 Tes. 5:12, 13). Ñanemomýita akóinte ñaneñeʼẽrendu hag̃ua (Hech. 16:4, 5). Ha jajeroviavéta umi ñanemoakãvare, jaikuaágui haʼekuéra ojapoha opa mbaʼe Ñandejára Ñeʼẽme heʼiháicha (Heb. 13:7) (15/3 páhina 19).

• Mbaʼéichapa ikatu ñaipytyvõ umi sy ha túva haʼeñóvape?

Umi omongakuaáva haʼeño ifamília ningo ombohovái heta mbaʼe ijetuʼúva ha ñañehaʼãramo jahechakuaa umi mbaʼe ohasáva, ikatúta ñaipytyvõ porãve chupekuéra. Upéva ikatu jajapo ñaipytyvõramo ohupyty hag̃ua hemikotevẽ, ñahendu, ñamokyreʼỹ ha ñainvitávo chupekuéra ñande rógape (1/1, páhina 30 ha 31).