Be Inyalo Paro?

Be gik ma isesomo e gocho mosekalo mag Ohinga mar Jarito osemori? Ka en kamano, ne ane kabe inyalo dwoko penjo maluwogi:

• “Gik moher” michoko kowuok e ogendini duto gin ang’o? (Hag. 2:7, New World Translation)

Magi gin jogo ma lame nikech gihere, kata obedo ni gin joma orem. (Nge. 27:11) Gin “gik moher” makelone pak, kendo omor ahinya kod chuny mar chiwruok ma ginyiso koda kinda ma gitiyonego.—4/1, ite mar 11.

• Ang’o momiyo e nyim Jehova, Daniel ne en ”ng’at moher ahinya”? (Dan. 10:11, 19)

Daniel ne en jal mapuonjre Ndiko gi kinda. (Dan. 9:2) Ne en ng’at mohero lemo. (Dan. 2:17, 18) Nokawo mapek pako nying Jehova. (Dan. 2:20, 28; 9:19)—4/1, ite mag 12-13.

• Be Jokristo madier kawo nying Nyasaye kaka bilo?

Jomoko kawo gimoro kata ranyisi mar gimoro kaka bilo marito ngimagi, kata kamano oganda Nyasaye ok kaw nying Nyasaye e yo ma kamano. Giketo yie kuom Jehova kendo timo dwarone, e yo ma kamano, giketo nying Nyasaye obednegi kar buok. (Zef. 3:⁠12, 13, NW)​—1/15, ite mag 5-6.

• Jonyuol nyalo timo ang’o mondo gikony nyithindgi ong’ad paro mariek mag luwo chike mabeyo?

Dwarore ni jonyuol onyis nyithindgi ayanga chike ma gin giwegi giluwo. Ber mondo gipuonj nyithindgi adiera duto e wi wach nindruok. Dwarore bende ni gikonygi ng’eyo rach ma ketho chike Jehovah kelo.​​—⁠4/1, ite mag 19-20.

• Ang’o momiyo Jehova ne otamore Ruoth Saulo?

Saulo ne onego orit janabi mar Nyasaye ema mondo ochiw misango, kata kamano, ruoth ne oketho chik Nyasaye mochiwo misango en owuon. Bang’e, ne ok oluwo kaka ne ochike ni oketh oganda ma jo wasigu.​—2/15, ite mag 22-​23.

• Wanyalo nyiso nade ni wasin gi richo?

Ok wabi tiyo marach gi kong’o, wabiro tamore timbe juok, kendo luwo siem mar Yesu e wi wach terruok. Kuom ranyisi, wabiro tamore ng’iyo piche mag ponografi gi paro mag gombo maricho monyalo kelo. (Math. 5:⁠27, 28) Bende, ok wabi bedo gi tudruok gi jogo mogol oko mar kanyakla.​—2/15, ite mag 29-​32.

• Moko kuom puonj mag Muma makonyowa ng’eyo kaka Jehova kawo wach tuke mag loyo mich kuom hawi, gin mage? (Efe. 5:17)

E wang’ Nyasaye, geno kuom hawi en lamo nyiseche manono. (Isa. 65:11) Jehova siemo joma lame ni kik gigomb gik jomoko. (Wuok 20:17; Rumi 7:7) Jotich Nyasaye yudo pesa kuom tiyo tich makare. (Efe. 4:28; 2 Thes. 3:10, 12)—4/1, ite mag 22-23.

• Jeremia nobedo nade kaka “yath mopidh machiegni gi pi, mamiyo tiendene okar dir aora”? (Yer. 17:⁠7, 8)

Ne ok oweyo nyago olembe mabeyo; bende ne ok oweyo joricho ma ne jare mondo onyos chunye. Kar mano, ne omakore gi Soko mar pi machiwo ngima, kendo ne orwako e chunye weche duto ma Nyasaye ne onyise.​—3/15, ite mar 14.

• Kaluwore gi weche Ayub, en puonj mane mwanyalo yudo kuom Jehova e Ayub 14:​13-15?

Jehova ohero e yo makende joma keto ngimagi e Iwete, kendo weyo mondo ochuegi kolosogi gibed jo mabeyo e wang’e. (Isa. 64:8)—4/1, ite mar 31.

• Janabi Samuel ‘norito ji gi bura makare’ e yo mane? (Hib. 11:32, 33)

Samuel nokonyo ahinya e miyo ji otim gik mabeyo kendo makare e wang’ Nyasaye. Gimomiyo nobedo ng’at masiko kakonyo en ni nohore mos korito Jehovah, kodhi nyime gi tije kata kane nitie gik manyoso chunye.—4/1, ite mar 27.