ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻe lava ai ke tau tui ko e ngoue ʻo ʻĪtení ko ha feituʻu moʻoni?

ʻOku fakahaaʻi ia ʻe he Tohi Tapú ʻoku moʻoni, ʻo ʻomai ʻa e ngaahi fakamatala pau fekauʻaki mo hono tuʻuʻangá. Ko e vaitafe ʻe ua naʻe lave ki ai ʻi he fakamatalá ʻoku kei tafe ia he ʻahó ni. ʻOku ʻikai peheni ʻa e fakamatala ʻi he ngaahi talatupuʻá pe ko e ngaahi fanangá. Ko Sīsū ʻa e Fakamoʻoni alafalalaʻanga tahá, naʻá ne lea ʻo kau kia ʻĀtama mo ʻIvi ko e ongo meʻa moʻoni.—4/1, peesi 5-6, 9.

• Naʻe ʻafioʻi ʻe he ʻOtuá ʻe faiangahala ʻa ʻĀtama mo ʻIvi?

ʻIkai. Naʻe ʻoange kia kinaua ʻe Sihova ʻa e ʻatamai poto mo e tauʻatāina ke fili, ʻo ʻai ai ke na malava ʻo fili ke talangofua pe ʻikai. Neongo ʻene maʻu e malava ke tomuʻa ʻiló, ʻoku filifili lelei ʻe he ʻOtuá hono ngāueʻaki ʻa e malava ko iá.—4/1, peesi 13-15.

• Ko e hā ʻa e faʻahinga fale naʻe nofo nai ai ʻa ʻĒpalahamé?

Ki muʻa ke nofo ʻi he ngaahi tēnití, ko ʻĒpalahame mo hono uaifí naʻá na nofo ʻi he kolo Kalitia tuʻumālie ko ʻUa. ʻI he taimi naʻe keli hake ai ʻa ʻUa ʻi ʻIulaki ʻi onopōní, naʻa nau ʻilo ai ha ngaahi fale naʻe langaʻaki ʻa e pilikí, fakataha mo e ngaahi lotoʻā ʻi loto naʻe faliki maka, mo e fakatafenga vai ke tukuange ai ki tuʻa ʻa e vai kuo ʻosi ngāueʻakí. ʻI he ngaahi fale lalahi angé, ko e ngaahi loki talitalí naʻe ʻi ai pē honau ngaahi fale kaukau mo e falemālōlō. Ko e ngaahi fale ʻe niʻihi naʻe fungavaka ua. Naʻe ʻiloʻi ko e ngaahi fale eni ʻo e kakai ʻi he kalasi lotolotó.—4/1, peesi 19.

• ʻOku ngāueʻaki ʻe he kau Kalisitiane moʻoní ʻa e huafa ʻo e ʻOtuá ko ha meʻa ʻomi-monū?

ʻOku vakai ʻa e kakai ʻe niʻihi ki ha meʻa pe ko ha fakaʻilonga ko ha meʻa ʻomi-monū, ko ha meʻa ʻoku tui ʻa ia ʻokú ne maluʻi fakafaimana kinautolu, ka ʻoku ʻikai pehē vakai ʻa e kakai ʻa e ʻOtuá ki hono huafá. ʻOku nau tui kia Sihova pea feinga ke fai ki hono finangaló, ʻo hūfanga ai ki hono huafá. (Sef. 3:12, 13, NW)—1/15, peesi 5-6.

• Ko e hā naʻe siʻaki ai ʻe Sihova ʻa Tuʻi Saulá?

Naʻe fiemaʻu ke tatali ʻa Saula ki he palōfita ʻa e ʻOtuá ke ne fai ha feilaulau, ka naʻe talangataʻa ʻa e tuʻí, ʻo ne fai ʻe ia tonu ʻa e feilaulaú. Ki mui ai, naʻe ʻikai te ne talangofua ki he fekau ke ne fakaʻauha ʻosi ʻa e kakai ko e filí.—2/15, peesi 22-23.

• ʻE lava fēfē ke tau fakahaaʻi ʻoku tau fehiʻa ʻi he maumau-laó?

Te tau ngāuetotonuʻaki ʻa e ʻolokaholó, fakaʻehiʻehi mei he ngaahi tōʻonga fakafaimaná, pea tokanga ki he fakatokanga ʻa Sīsū fekauʻaki mo e ʻulungaanga taʻetāú. Ko e fakatātaá, te tau fakaʻehiʻehi mei he ʻata fakalieliá mo e ngaahi fakaʻānaua ʻe tupu nai aí. (Mt. 5:27, 28) Pehē foki, heʻikai ke tau feohi mo e faʻahinga ʻoku tuʻusí.—2/15, peesi 29-32.

• Naʻe anga-fēfē hangē ʻa Selemaia ko ha fuʻu ʻakau “ʻoku to ki ha vai, pea ʻoku ne tuku atu hono ngaahi aka”? (Sel. 17:7, 8)

Naʻe ʻikai ʻaupito tuku ʻene fakatupu fuá; pea naʻe ʻikai te ne fakaʻatā ke tākiekina ia ʻe he kau manukí. ʻI hono kehé, naʻá ne pipiki ki he Matavai ʻo e vai fakatolonga moʻuí, ʻo tokanga ki he meʻa naʻe tala ange ʻe he ʻOtuá kiate iá.—3/15, peesi 14.