Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Ha yini hi nga pfumelaka leswaku ntanga wa Edeni a wu ri ndhawu ya xiviri?

Bibele yi wu hlamusela tanihi ndhawu ya xiviri naswona yi hlamusela vuxokoxoko malunghana ni ndhawu ya kona. Milambu yin’wana yimbirhi leyi ku vulavuriwaka ha yona eka rungula ra kona ya ha khuluka ninamuntlha. Switori ni mintsheketo hakanyingi a swi vuli vuxokoxoko bya ndhawu leyi nga kona namuntlha. Yesu, loyi a nga Mbhoni yo tshembeka swinene, u vulavule hi Adamu na Evha tanihi vanhu va xiviri.—1/1, matluka 5-6, 9.

• Xana Xikwembu a xi swi tiva leswaku Adamu na Evha va ta dyoha?

E-e. Yehovha u va nyike vutlhari ni ntshunxeko wo tihlawulela leswaku va kota ku hlawula ku n’wi yingisa kumbe ku nga n’wi yingisi. Hambileswi Xikwembu xi kotaka ku tiva swilo ka ha ri emahlweni, vuswikoti byebyo a xi byi tirhisi kun’wana ni kun’wana.—1/1, matluka 13-15.

• Xana Vakreste va tirhisa vito ra Xikwembu tanihi xitshungulo?

Vanhu van’wana va teka nchumu kumbe mfungho wo karhi tanihi xitshungulo lexi va sirhelelaka hi singita, kambe vanhu va Xikwembu a va ri teki tano vito ra xona. Va kombisa ripfumelo eka Yehovha naswona va lava ku endla ku rhandza kakwe, xisweswo va tumbela evitweni rakwe. (Sof. 3:12, 13)—1/15, matluka 5-6.

• I vamani lava a va vuyeriwa eka lunghiselelo ro khwaja ra le Israyele?

I vanhu hinkwavo. Lunghiselelo leri a ri khutaza ku tirha hi matimba eka swisiwana leswi a swi fanele swi khwaja. Kasi van’wana a va vuyeriwa hileswi a va khutaziwa ku va ni moya wo hanana ni ku titshega hi mikateko ya Xikwembu.—2/1, tluka 15.

• Ha yini Yehovha a fularhele Hosi Sawulo?

Sawulo a a fanele a rindze muprofeta wa Xikwembu leswaku a nyikela xitlhavelo, kambe a nga yingisanga, u nyikele xitlhavelo hi yexe. Endzhaku ka nkarhi, a nga xi yingisanga xileriso xo dlaya valala.—2/15, matluka 22-23.

• Hi nga swi kombisa njhani leswaku hi venga ku kala nawu?

Hi ku ka hi nga nwi byala ku tlula mpimo, hi ku papalata mikhuva ya vungoma ni ku yingisa xilemukiso xa Yesu xa malunghana ni ku tikhoma ko biha. Hi xikombiso, hi ta papalata ku hlalela swifaniso swo navetisa rimbewu ni ku anakanyisisa hi ku navela ka rimbewu loku vangiwaka hi ku swi hlalela. (Mat. 5:27, 28) Nakambe a hi nge tihlanganisi ni vanhu lava susiweke evandlheni.—2/15, matluka 29-32.

• I yini leswi tsakisaka malunghana ni ku kumiwa ka ndhawu leyi nga ni swisaka swa tinyoxi hi vayimburi eIsrayele wa manguva lawa?

Vayimburi va kume swisaka swa tinyoxi leswi tlulaka 30 leswi endliweke hi vanhu, leswi valavisisi va ringanyetaka leswaku a ku hakuriwa vulombe byo tlula hafu ya thani eka swona lembe ni lembe. Leswi swi kombisa leswaku etikweni leri Xikwembu xi vuleke leswaku a ri ta ‘khuluka ntswamba ni vulombe’ a ku fuyiwa tinyoxi. (Eks. 3:8)—3/1, tluka 15.

• Yeremiya a a fana njhani ni murhi “lowu byariweke ekusuhi ni mati, lowu naviselaka timitsu”? (Yer. 17:7, 8)

A nga tshikanga ku tswala mihandzu; hambi ku ri ku pfumelela ku kuceteriwa hi vahlekuri. Kambe u yime a tiyile eXihlobyeni lexi nga ni mati lama nyikaka vutomi, a yingisa leswi Xikwembu xi n’wi byeleke swona.—3/15, tluka 14.

• Yesu a a vula yini loko a byela Marta leswaku i swilo switsongo leswi lavekaka, kumbe xin’we ntsena? (Luka 10:41, 42)

A a nga vuli swona leswaku Marta u rhandza swilo swo tala hileswi a n’wi lunghiseleleke swakudya swa mixaka-xaka; naswona a a nga vuli swona leswaku ntirho wakwe a wu nga pfuni nchumu. Kambe a a kandziyisa swilo leswi a a fanele a rhangisa swona. Marta a a nga wu tirhisi nkarhi wo hlawuleka lowu a wu n’wi pfulekerile leswaku ripfumelo rakwe ri tiyisiwa.—4/1, matluka 12-13.

• Hi swihi swilo leswi nga riki enawini leswi endliweke loko Yesu a tengisiwa?

Huvo a yi lavanga ku yingisa vumbhoni bya lava vulaka leswaku Yesu a a nga ri na nandzu. Ku laviwe timbhoni ta mavunwa. Nandzu wu tengiwe nivusiku naswona wu sunguriwe wu tlhela wu hela hi siku rin’we.—4/1, tluka 20.