Naa Ni A Zwi Humbula?

Naa no takalela u vhala thero dza zwenezwino dza Tshiingamo? Vhonani arali ni tshi nga fhindula mbudziso dzi tevhelaho:

• Ndi ngani ri tshi nga tenda uri tsimu ya Edeni yo vha i hone zwa vhukuma?

Bivhili i amba uri yo vha i hone zwa vhukuma, nahone i ṋea zwidodombedzwa zwa fhethu he ya vha i hone. Milambo mivhili ine ha ambiwa nga hayo kha mafhungo enea i kha ḓi vha hone na ṋamusi. Dzingano a dzi anzeli u ṋea zwidodombedzwa zwa fhethu hune ha kha ḓi vha hone na ṋamusi. Yesu ane a vha Ṱhanzi ine ra nga i fulufhela vhukuma o amba uri Adamu na Eva vho vha vhe vhathu vha vhukuma.—1/1-E, masiaṱari 5-6, 9.

• Naa Mudzimu o vha a tshi zwi ḓivha uri Adamu na Eva vha ḓo ita tshivhi?

Hai. Yehova o vha ṋea vhuṱali na mbofholowo ya u ḓikhethela, zwe zwa vha zwi tshi ḓo ita uri vha kone u thetshelesa kana u sa thetshelesa. Naho Mudzimu a tshi kona u ḓivha zwithu zwi sa athu itea, ha shumisi vhukoni honoho tshifhinga tshoṱhe.—1/1-E, masiaṱari 13-15.

• Naa Vhakriste vha ngoho vha shumisa dzina ḽa Mudzimu sa zwitungulo?

Vhaṅwe vhathu vha kungela zwithu zwi ngaho thambo kana mikumba u itela u tsireledzwa zwa tou nga zwithu zwenezwo zwi na maanḓa a madambi a u tsireledza, fhedzi vhathu vha Mudzimu a vha dzhii dzina ḽa Mudzimu sa zwitungulo. Vha na lutendo kha Yehova nahone vha ṱoḓa u ita zwine a zwi funa, nga zwenezwo vha khuda nga dzina ḽawe. (Tsef. 3:12, 13)—1/15, masiaṱari 5-6.

• Mukhuvha wa u ṱala ṱhalane wo vhuyedza vhafhio ngei Isiraele?

Wo vhuyedza vhathu vhoṱhe. Wo vha u tshi ṱuṱuwedza vhashai vhe vha vha vha tshi fanela u ṱala ṱhalane uri vha vhe vhashumi vha biko. Vhaṅwe vho vhuyelwa nga u ṱuṱuwedzwa uri vha vhe na mafunda na uri vha ḓitike nga phaṱhutshedzo dza Mudzimu.—2/1-E, siaṱari 15.

• Ndi ngani Yehova o landula Khosi Saulo?

Saulo o vha fanela u lindela muporofita wa Mudzimu uri a ṋekedze tshiṱhavhelo, fhedzi ho ngo thetshelesa nahone o ṋekedza tshiṱhavhelo nga ene muṋe. Nga murahu, ho ngo thetshelesa ndaela ya u lozwa lushaka lwa maswina.—2/15, masiaṱari 22-23.

• Ri nga sumbedza hani uri ri vhenga zwi tshinyaho mulayo?

Nga u sa shumisa luvhi zwikambi, u iledza u shumisa mimuya mivhi, na u thetshelesa tsevho ya Yesu malugana na vhuḓifari vhu songo kunaho. Sa tsumbo, ri ḓo iledza u sedza zwifanyiso zwi karusaho maḓipfele a zwa vhudzekani na miloro ine ra nga vha nayo mihumbuloni yashu. (Mat. 5:27, 28) Zwiṅwe hafhu ri nga si vhumbe vhushaka na vhathu vho bviswaho tshivhidzoni.—2/15, masiaṱari 29-32.

• Ndi mini zwi swayeaho nga ha zwe zwa tumbulwa nga vhaḓivhi vha zwo fukulwaho mavuni musi vha tshi wana mabako a ṋotshi ngei Isiraele ḽa musalauno?

Vhaḓivhi vha zwo fukulwaho mavuni vho wana mabako a ṋotshi a fhiraho 30, nahone vhaḓivhi vhenevho vha anganyela uri o vha a tshi bveledza mutoli u fhiraho khiḽogireme dza 500 nga ṅwaha. Zwenezwo zwi sumbedza uri ho vha hu tshi fuiwa ṋotshi shangoni ḽe Mudzimu a amba uri ḽi ḓo “ela mukhaha na ṋotshi.” (Ek. 3:8)—3/1-E, siaṱari 15.

• Yeremia o vha a tshi fana hani na “muri wo simiwaho hu re na maḓi, u isaho midzi mulamboni”? (Yer. 17:7, 8)

Ho ngo vhuya a litsha u aṋwa mitshelo; nahone ha ngo tenda vhagoḓi vha tshi mu ṱuṱuwedza. Nṱhani hazwo, o nambatela Mudzimu ane a vha Tshisima tsha maḓi a vhutshilo, nahone a thetshelesa zwe a mu vhudza zwone.—3/15, siaṱari 14.

• Yesu o vha a tshi khou amba mini musi a tshi vhudza Marita uri tshililelwa nga tshi vhe tshithihi? (Luka 10:41, 42)

O vha a sa khou amba uri u funesa zwithu zwi vhonalaho nge a vha a tshi khou lugiselela zwiḽiwa; nahone o vha a sa khou amba uri mushumo we a vha a tshi khou ita a si wa ndeme. Nṱhani hazwo, o vha a tshi khou sumbedza zwithu zwine zwa fanela u ḓa u thoma vhutshiloni. Marita o vha a sa khou shumisa zwavhuḓi tshibuli tsha u khwaṱhisa lutendo lwawe.—4/1-E, masiaṱari 12-13.

• Ndi hufhio huṅwe u sa tevhedza mulayo he ha vha hone musi Yesu e tsengoni?

Khothe a yo ngo thetshelesa vhuṱanzi vhu sumbedzaho uri ha na mulandu. Ho shumiswa ṱhanzi dza mazwifhi. O sengiswa vhusiku. O sengiswa na u haṱulwa nga ḓuvha ḽithihi.—4/1-E, siaṱari 20.