Mathata ao a Lebišago Kholofelong

“Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona.”—2 TIMOTHEO 3:1.

NA O ile wa kwa ka—goba wa bona—e nngwe ya ditiragalo tše di latelago tše sa kgahlišego?

● Bolwetši bjo kotsi bo bolaya batho ba bantši.

● Tlala e bolaya batho ba makgolo.

● Tšhišinyego ya lefase e bolaya batho ba dikete gomme e tlogela ba bangwe ba bantši ba hloka magae.

Matlakaleng a latelago, o tla hlahloba ditherešo tše di šišinyago kgopolo mabapi le ditiragalo tše di swanago le tše. O tla lemoga le gore Beibele e boletše e sa le pele ka ditiragalo tše bjalo, ya re di tla direga lebakeng leo le bitšwago ‘mehla ya bofelo.’ *

Lega go le bjalo, morero wa dihlogo tše ga se go go kgodiša gore re phela lefaseng le le tletšego mathata. Mathata a o ka ba o lebeletšana le ona. Go e na le moo, di hlametšwe go go nea kholofelo. Di tla bontšha gore go phethagala ga diporofeto tše tše tshelelago go bolela gore ‘mehla ya bofelo’ e kgauswi le go fela. Lelokelelo le la dihlogo gape le tla hlahloba dikganetšo tše tlwaelegilego tša bohlatse bjo gomme la nea mabaka a kwagalago a go dumela gore go na le se sekaone seo se letšego ka pele.

[Mongwalo wa tlase]