Kiraya kuma 1. Dugukolo yɛrɛyɛrɛw

“Dugukolo yɛrɛyɛrɛbaw na kɛ yɔrɔ dɔw la.”—LUKA 21:11.

● Winnie o min si bɛ kalo 16 la, u y’o sama ka bɔ so binnenw jukɔrɔ Ayiti jamana la. Teleso ekipu dɔ ye a ŋunankan mɛn k’a to so binnenw jukɔrɔ. Ale kisira ka bɔ o dugukolo yɛrɛyɛrɛ la nka a bangebaaw tora a la.

KO KƐLENW BƐ MUN JIRA? San 2010, zanwuye kalo la, magnitude 7 dugukolo yɛrɛyɛrɛ kɛlen Ayiti jamana la, mɔgɔ minnu ni tora a la, o cayara ni mɔgɔ 300 000 ni kɔ ye. Mɔgɔ 1 300 000 fana bɔnɛna u ka so la. Hali ni a ko juguyara kosɛbɛ, nin dugukolo yɛrɛyɛrɛ ɲɔgɔn caman delila ka kɛ yɔrɔ wɛrɛw la. K’a ta Awirili kalo 2009 la ka t’a bila Awirili kalo 2010 la, dugukolo yɛrɛyɛrɛ minnu kɛra diɲɛ kɔnɔ, olu dɔgɔyalenba kɛra 18 ye.

SƆSƆLI KUMA JUMƐN BƐ FƆ O KO LA? Dugukolo yɛrɛyɛrɛw man ca bi ka tɛmɛn fɔḷɔ kan, nka ikomi an bɛ kunnafoniw sɔrɔ nɔgɔya la sisan masinimafɛnw fɛ ka tɛmɛn fɔlɔ kan, o b’a to an bɛ bɔ u caman kalama.

YALA O SƆSƆLI KUMA IN BƐNNEN DON WA? E ka i hakilijagabɔ nin na: Dugukolo yɛrɛyɛrɛ hakɛ min bɛ kɛ laban donw na, Bibulu tɛ a sinsin o kan. Nka Bibulu b’a fɔ ko “dugukolo yɛrɛyɛrɛbaw” na kɛ “yɔrɔ caman na”. O b’a jira ko u bɛ kɛ kow ye an bɛna minnu ye k’a jɛya an ka nin waati kɛrɛnkɛrɛnnen in na.—Marka 13:8; Luka 21:11.

I HAKILINA YE MUN YE? Yala an ɲɛ bɛ dugukolo yɛrɛyɛrɛbaw la iko Bibulu y’a fɔ cogo min na wa?

A bɛ se ka kɛ ko dugukolo yɛrɛyɛrɛw dɔrɔn tɛ taamashyɛn ye min b’a jira ko an bɛ laban donw na. Nka u bɛ kiraya kumaw cɛla minnu bɛ ka waleya sisan. An ka kiraya kuma dɔ wɛrɛ lajɛ.

[Sɛbɛnni min bɛ ntiiri fila kɔnɔ]

“An [minnu bɛ ɲininiw kɛ dugukolo ko la], an b’u wele ko dugukolo yɛrɛyɛrɛbaw. Mɔgɔ tɔw b’u wele ko kasarabaw.”—KEN HUDNUT, ƝININIW BƐ KƐ YƆRƆ MIN NA KA ƝƐSIN DUGUKOLO MA ETATS-UNIS.

[Foto tigiw]

© William Daniels/Panos Pictures