Dọdai 1. Aigba Sisọsisọ Lẹ

“Aigba sisọsisọ daho lẹ na tin.”​—LUKU 21:11.

● Winnie he tindo owhe 16, yin dindọn tọ́n gbẹ̀te sọn gbakija ohọ̀ he họ́ lẹ tọn mẹ to Haïti. Azọ́nwatọ Televiziọn tọn he yì nujijọ lọ tẹnmẹ nado na linlin etọn lẹ sè hunwinwẹn viyọnnu he to vivẹ́ sè lọ tọn. E lùn aigba sisọsisọ lọ tọ́n, amọ́ mẹjitọ etọn lẹ kú

ETẸWẸ KUNNUDENU LẸ DOHIA? Whenue aigba sisọsisọ huhlọnnọ de gbànú to Haïti to janvier 2010, hugan gbẹtọ 300 000 wẹ e hù. Nudi gbẹtọ livi 1 daa wẹ masọ tindo ohọ̀ to ota ba to nukunwhiwhe dopo mẹ. Dile etlẹ yindọ aigba sisọsisọ he jọ to Haïti sẹhundaga taun, nugbajẹmẹji mọnkọ lẹ ma hán to fide. E whè gbau, aigba sisọsisọ sinsinyẹn 18 wẹ jọ to awà voovo aihọn tọn lẹ ji sọn avril 2009 jẹ avril 2010.

LINLẸN TẸWẸ GBAYIPE? Aigba sisọsisọ lẹ ma nọ sù sọmọ ba; azọ́n nuyọnẹn wintinwintin tọn lẹ nọ gọalọna mí nado nọ yawu doayi nugbajẹmẹji enẹlẹ go todin hugan hohowhenu.

BE NUGBO WẸ ENẸ YA? Lẹnnupọndo nugbo ehe ji: Biblu ma basi zẹẹmẹ aigba sisọsisọ nẹmu he na jọ to azán godo tọn lẹ mẹ tọn. Amọ́, e dọ dọ “aigba sisọsisọ daho lẹ” na tin “sọn fide jẹ fide,” sọmọ bọ enẹ na yin ohia ayidego tọn lẹ to whenuho mẹ na ojlẹ vonọtaun ehe.—Malku 13:8; Luku 21:11.

ETẸWẸ A LẸN? Be a to ayido aigba sisọsisọ daho lẹ go pẹpẹ dile Biblu ko dọ jẹnukọn do ya?

Nugbo wẹ dọ mí ma gán pọ́n do aigba sisọsisọ lẹ kẹdẹ go, bo wá tadona kọ̀n dọ azán godo tọn lẹ mẹ wẹ mí te. Etomọṣo, yé yin dopo to dọdai he gbẹ́ to hẹndi mọ lẹ mẹ. Gbọ mí ni lẹnnupọndo devo ji.

[Nudọnamẹ tangan lẹ]

“Mílẹ [mẹhe nọ dindonanu gando aigba go lẹ] nọ ylọ ninọmẹ ehelẹ dọ aigba sisọsisọ daho lẹ. Mẹhe pò lẹpo nọ ylọ yé dọ nujijọ dobu lẹ.”​—KEN HUDNUT, AZỌ́NWHÉ HE NỌ DINDONANU GANDO AIGBA GO DE TO ÉTATS-UNIS.

[Asisa Yẹdide lẹ Tọn]

© William Daniels/Panos Pictures