Jaku Benabi 1. Tanah Berenyang

“Tanah berenyang deka balat nyadi.”—LUKE 21:11.

● Winnie, ke beumur 16 bulan, ditinggang runtuhan pengudah tanah berenyang ke nyadi ba Haiti. Pasukan pemerita TV ke benung gawa tedingaka sabak iya. Winnie selamat, tang apai indai iya ditabanka penusah nya.

NAMA FAKTA IYA? Tanah berenyang ke nyadi ba Haiti kena Januari 2010, enggau magnitude 7.0 udah nabanka lebih ari 300,000 iku nyawa. Kelimpah ari nya, dalam urung 1.3 juta iku orang, lenyau endur diau dalam sekejap mata. Tanah berenyang tu udah ngujungka pengerusak ti balat. Tang kelimpah ari bencana tu, abis nadai 18 kali tanah berenyang ti besai, udah nyadi entara April 2019 enggau April 2010.

NAMA RUNDING SEKEDA ORANG? Penyampau tanah berenyang ke nyadi enda majak niki. Teknologi ngenyenangka mensia nemu sereta madahka kes tu enggau jampat sebedau iya nyadi.

KATI RUNDING TU BETUL? Peratika utai tu: Bup Kudus nadai madahka penyampau tanah berenyang ke nyadi deka majak niki. Tang Bup Kudus nerangka, “tanah berenyang deka balat nyadi,” ba “mayuh bengkah endur.” Penusah tu siti ari tanda hari ti penudi.—Mark 13:8; Luke 21:11.

NAMA RUNDING NUAN? Kati nuan setuju, tanah berenyang benung balat nyadi baka ke dipadahka ba Bup Kudus?

Tang, ukai tanah berenyang aja ke nunjukka kitai benung idup ba hari ti penudi. Aram kitai meda bukti ke bukai.

[Blurb]

“Orang madah, tanah berenyang amat ngenakutka. Tang ba kami [pakar geofizik], ngumbai nya tanah berenyang ti balat.”​—KEN HUDNUT, JABATAN KAJIAN GEOLOGI AMERIKA SERIKAT.

[Gambar]

© William Daniels/​Panos Pictures