Profesiya 1. Lunig

“Egga noka i masikan ira nga lunig.”​—LUCAS 21:11.

● Nepaliag i tanga-ragun gaddua-anios nga si Winnie turi ta natavvunan yayya ta nakkaradabba nga bata-batu ta Haiti. Tadday gare nga reporter ta TV i nakaginna ta makafi nga pattangina. Ari yayya nga natay ta lunig ngem natay i maganana.

ANNI I IPASINGAN NA REPORT IRA? Turi ta nallunig tu magnitude 7.0 ta Haiti ta Enero 2010, maturu tu 300,000 i natay. Fuera paga tatun, 1.3 million i nawanan tu paddianan. Ari laman tu ta Haiti nga egga i nesimmu nga masiki-sikan nga lunig. Maturu tu 18 nga masiki-sikan nga lunig i nesimmu ta interu mundo namegafu ta Abril 2009 adde ta Abril 2010.

ANNI I OPINION NA KARUAN? Ari nga nakkaru i lunig. Mas ammu tam laman danatun kumpara ta totolay gari megafu ta moderno ngana i teknolohia tam.

KURUG KARI YATUN? Nonopammu yaw: Ari nga tukuyan na Biblia i karu na lunig ta pangurianan ira nga aggaw. Ngem kagian natun nga “ta madduma-ruma nga lugar,” egga i mesimmu nga “masikan ira nga lunig.” Pakurugan natun nga mattolay ittam ngana ta pangurianan ira nga aggaw.​—Marcos 13:8; Lucas 21:11.

ANNI I MAKAGIM? Mesissimmu kari ngana i masikan ira nga lunig kagitta na neprofesiya ta Biblia?

Ari nga makalanno nga ebidensia i lunig ira tapenu makagi tam nga mattolay ittam ngana ta pangurianan ira nga aggaw. Ngem tadday laman yatun ta profesiya ira nga matuttuppal ngana. Innattam i mekadua.

[Blurb ta pahina 4]

“Masikan ira nga lunig i pagagal mi [nga geophysicist] tatun ira. Ngem para ta ngamin, trahedia yatun.”​—KEN HUDNUT, U.S. GEOLOGICAL SURVEY.

[Picture Credit Line ta pahina 4]

© William Daniels/Panos Pictures