TCUH KAˍ PAˍ TAWˇ HKAWˇ 1. MIˬ HIˆ VE

LEˍ VE

TCUH KAˍ PAˍ TAWˇ HKAWˇ 1. MIˬ HIˆ VE

‘Miˬ gʼaˇ hteꞈ hiˆ ve, chehˇ kuiˬ teˇ kaˬ peuˬ teˇ kaˬ gaˬ la tuˬ yoˬ.’—LUˉKAꞈ 21:11.

● Heˬtiˬ mvuhˇ miˬ lo yehˬ paˆ taˍ ve hk’aw yaˇ ehˉ aˬ laˬ hk’e 1 hk’awꞈ hpaˆ ve Vi˗ninˇ meh ve htaꞈ yuˬ tawˆ piˇ ve yoˬ. Liꞈ sha tanˇ tawˇ yaw paˍ teˇ g’aˇ oˇ ve teˇ tawn lo miˬ hiˆ ve awˬ lawn htaꞈ k’oˆ chehˇ htaˇ, yaˇ ehˉ oˇ ve kuˬ ve awˬ hkawˇ htaꞈ g’a kaˇ ve yoˬ. Yaˇ ehˉ chi ve teˇ g’aˇ lehˬ miˬ hiˆ ve htaꞈ g’a ponˬ ve yoˬ. Yaꞈ hk’aˇ, yawˇ ve awˬ pa awˬ e suh˗e ve yoˬ.

AWˬ TEHˬ VE Aˬ HTOꞈ MA LE? Heˬtiˬ mvuhˇ miˬ lo Ha pa 1 maˬ 2010 hk’awꞈ htaˇ, 7.0 miˬ hiˆ hehnˇ jaˇ ve pa taw, chaw 300,000 g’aˇ hpaˆ suh˗e ve yoˬ. Mvuhˇ miˬ yaˇ 1.3 lanˬ g’aˇ laꞈ tcuh laꞈ haˉ chehˇ kuiˬ maˇ cawˬ ve yoˬ. Heˬtiˬ mvuhˇ miˬ lo chi teˇ pawˆ miˬ hiˆ hehnˇ jaˇ ve htawˇ, k’awꞈ hiˆ chehˇ sheˍ ve yoˬ. 2009 hk’awꞈ te leh 2010 hk’awꞈ teˇ hk’awꞈ ve awˬ yanˇ hk’aw miˬ guiˬ chi hk’oˆ lo miˬ hiˆ hehnˇ jaˇ ve 18 kaˬ cawˬ ve yoˬ.

MAˇ˗AWˍ VE CHAW HK’Aˬ HK’E K’Oˆ VE LE? Miˬ hiˆ ve hk’e taw maˇ cawˬ maˇ. Awˬ hk’eun awˬ suhˉ awˬ suhˉ yehˇ tuˬ te tawˆ maˇ ve pa taw, oˇ htaˇ teˇ co˗e aꞈ kehˉ chi teˇ hkui miˬ hiˆ ve awˬ lawn g’a kaˇ maˇ jaˇ.

CHI HK’E K’Oˆ VE AWˬ HK’Aˇ CA˗AW LAˇ? Awˬ tehˬ ve chi htaꞈ chaˬ nyi sheˍ: Awˬ leh meuˇ ve awˬ yanˇ hk’aw miˬ hk’aˬ nyiˇ pawˆ hiˆ tuˬ Liꞈ hpu hk’aw maˇ g’a k’oˆ laˇ taˍ. Yaꞈ hk’aˇ, Liꞈ hpu hk’aw k’oˆ ve, “miˬ gʼaˇ hteꞈ hiˆ ve, chehˇ kuiˬ teˇ kaˬ peuˬ teˇ kaˬ awˬ hkʼaw lo” hpehꞈ la tuˬ yoˬ. Awˬ leh meuˇ gaˬ la paˇ neˇ ve pa taw, teˇ co˗e peuˬ teˇ co˗e aꞈ kehˉ chi teˇ hkui miˬ g’aˇ hteꞈ hiˆ ve yoˬ.—Maˍkuˆ 13:8; Luˉkaꞈ 21:11.

NAWˬ HK’Aˬ HK’E DAWˇ VE LE? Liꞈ hpu hk’aw tcuh kaˍ paˍ tawˇ hkawˇ k’oˆ taˍ ve hk’e, miˬ hiˆ hehnˇ jaˇ ve htaꞈ ngaˬ hui g’a mawˬ˗aw laˇ?

Ngaˬ hui awˬ leh meuˇ ve awˬ yanˇ hk’aw chehˇ ve tehꞈ shiˍ tuˬ, miˬ hiˆ ve teˇ ceuˬ ceh tiˉ shaˉ hkiˆ hpehꞈ ve maˇ heˆ. Tcuh kaˍ paˍ ve tawˇ hkawˇ laiˉ ceuˬ ve hk’aw miˬ hiˆ ve kaꞈ teˇ ceuˬ awˬ tehˬ hpehꞈ la ve yoˬ. Tcuh kaˍ paˍ ve tawˇ hkawˇ 2 hkawˇ teˇ hkawˇ htaꞈ teˇ geh k’awꞈ nyi sheˍ.

[Awˇ ceˍ awˇ fa]

“Ngaˬ hui [chaˬ nyi tehˆ nyi paˍ] awˬ heˆ chi ve htaꞈ miˬ hiˆ hehnˇ jaˇ ve tehꞈ k’oˆ gaˇ ve yoˬ. Awˬ nu ve chaw k’o, luˬ ve sheˆ ve tehꞈ k’oˆ ve yoˬ.”—HKEN HA˗NAˆ AˍMAˬRIˆKAꞈ MVUHˇ MIˬ HK’AW CHAˬ NYI TEHˆ NYI PAˍ.

[Awˬ han yuˬ laˬ kuiˬ]

SHAW NYI KUIˬ liꞈ