1. Lizikinyeho

“Lizikinyeho ze tuna za lifasi li bonahale.”—LUKA 21:11.

● Mbututu ya likweli ze 16 ya libizo la Winnie, i hohiwa kwatasaa masitina a muyaho wo wile mwa naha ya Haiti. Babihi ba makande ne ba utwile mbututu yeo inze i tongela mwatasi ha ne ba sweli ku fa piho ka za zikinyeho yeo. Nihaike kuli mbututu yeo i punyuhile zikinyeho yeo, bashemi ba yona ha ba si ka punyuha.

ZE EZAHEZI LI BONISAÑI? Zikinyeho ye tuna ha ne i lengile naha ya Haiti mwa kweli ya January 2010, ne i bulaile batu ba ba fitelela 300,000. Mi mandu a batu ba 1.3 milyoni naa sinyehile mwa nako iliñwi feela. Nihaike kuli zikinyeho yeo ne li ye tuna hahulu, haki yona feela ye se lengile mwa lifasi. Ku zwa kweli ya April 2009 ku to fita kweli ya April 2010 se ku ezahezi lizikinyeho ze tuna ze 18 mwa lifasi kaufela.

BATU BA HANYEZANGAÑI? Ha lu lengiwi ki lizikinyeho ze ñata; lu li lemuha feela hahulu ku fita batu ba kwa kale bakeñisa lizwelopili ku za sayansi.

KANA KU HANYEZA KO KWA UTWAHALA? Mu nyakisise taba ya niti ye: Bibele ha i koñomeki palo ya lizikinyeho ze ka ezahala mwa mazazi a maungulelo. Kono i bulela kuli “lizikinyeho ze tuna” li ka ezahala “mwa mabaka a mañata,” ili ku li bonahaza kuli ki ze ñwi za lika ze zibahaza linako za butokwa ze lu pila ku zona.—Mareka 13:8; Luka 21:11.

MINA MU BONA CWAÑI? Kana lu sweli ku bona lizikinyeho ze tuna, sina mo ne i polofitezi Bibele?

Lizikinyeho ka ili zona feela mwendi ha li koni ku lu kolwisa kuli lu pila mwa linako za maungulelo. Kono bupolofita ka za lizikinyeho haki bona feela bo bu sweli ku talelezwa. Ha lu nyakisiseñi bupolofita bwa bubeli bo bu sweli ku talelezwa.

[Manzwi a fa likepe 4]

“Luna [Baituti ba za sibupeho sa lifasi ni ze ku lona] lu li biza kuli ki lizikinyeho ze tuna. Kono batu ba ba sa zibi sayansi ba li biza kuli ki lizikinyeho ze maswe hahulu.—KEN HUDNUT, U.S. GEOLOGICAL SURVEY.

[Manzwi a bañi ba siswaniso fa likepe 4]

© William Daniels/Panos Pictures