Inatiri 1. Uttettemelaca Wotthaya

“Unaahala ukhala uttettemelaca wotthaya.”​—LUKA 21:11.

● Winnie, mwanhima omwaakha mmoca ni myeeri micese, ahoopoliya vathi waya citthu cammorenle nlattu woottettemelaca itthaya, ilapo yo Haiti. Majornalista ooteeveeni yaahoomwiiwa eepulelaka. Uyova hoopwaa asithumwaane mena.

CITTHU CINKHUMELELA CINTHOOYERA ISIYANI? Ilapo yo Haiti, mweeri wo Janeiro mwaakha wo 2010, yahottettemelaca itthaya venci cinene ni yahokhwa atthu uvikana 300.000. Uhiya commo, atthu imiliyau 1,3 yahohaleela miteko caya, nwo uttettemelaca wotthayanwo waahokwanyulacaru citthu cinci, khawaakhumelenle wonwo paasi. Ikhumelo mweeri wo Abril wo 2009 mpaka mweeri wo Abril wo 2010, ntuninyani motheene yahottettemeleca itthaya mapuro ookhalaka 18.

ISIYANI ATTHU ENCI INEERAAYA? Khunakhala wiira uttettemelaca wotthaya piinvira wuncereryaaka. Masi nlattu wotekonologiya, mahukwaala khunnirikarikela wiiwa ihapari cinttonkaca uttetteemelaca wotthaya uvikana khalayi.

NIIREKE IYO IKHANLE IKHWEELI? Moone ila ntthwiila: Ibiiblya khinhimya ikwaha kavi yaahalaaya uttettemelaca itthaya yaphiyaka mahuku ookhicera. Masi iyo ineera wiira wanhala ukhala “uttettemelaca wotthaya wokhula nipuro,” nwo uttettemelaca wotthayanwo yaahala ukhala itthu yaahala wiirannya ala mahuku ookhiceraala.—Markus 13:8; Luka 21:11.

NYUUVA NNOONELA CANI? Niireke ineera ittettemelacaka itthaya khampa inhimyaaya Ibiiblya ikhumelo yokhalayi?

Atthunaka ahaavo aneera wiira uttettemelaca wotthaya paasi, khuntosera uthoonyihera wiira khweeliini ninkhala mahuku ookhicera. Masi, uttettemelaca wotthaya khinakhala inatiri imoca ineerannya mahukwaala. Moone inatiri ikhwaawe.

[Moolumo o wapaaginani ootepa woonannya 4]

“Hiivano [masiyentista va] nineehana uttettemelaca wo itthaya venci. Masi atthu enci aneehana ihasara.”​—KEN HUDNUT, NIPURO NINSOMASOMIA ITTHAYA NIMPHWANYANNYA U ESTADOS UNIDOS.

[Mwaneene ilatarato 4]

© William Daniels/Panos Pictures