1. Mojmolinia tlali

“Kampa ueli tlauel mojmolinis tlali” (LUCAS 21:⁠11).

● Kema ipan Haití chikauak mojmolinik tlali, katli kipanoltiaj noticias ipan televisión kikajkej se akajya chokayaya kampa tlauelontoya. Eliyaya Winnie se pilsiuapiltsi katli kipixtoya se xiuitl uan tlajko, uan teipa kikixtijkej kampa itstoya. Maske ya amo tleno kipanok, itatauaj mijkej.

¿TLAKE KINEXTIA TLEN PANOTOK? Ipan enero 2010 kema tlauel chikauak mojmolinik tlali (magnitud 7) ipan Haití mijkej kipano 300 mil maseualmej uan se millón trescientos mil ayokmo kipixkej kampa itstosej. Maske nopa tlauel tetlasojsoljuilik, nojkia mojmolinik tlali ipan sekinok altepemej. Ipan abril 2009 uan tlanki ipan abril 2010, 18 imiakpa chikauak mojmolinik tlali.

TLEN SEKIJ KIIJTOUAJ. Sanse moojolinia tlali kej achtouia. Ipan ni tonali san kichijchijtokej tlamantli tlen techpaleuia ma tijmatikaj kema mojmolinia tlali uan uejkajkia amo onkayaya nopa.

¿NELIA TLEN KIIJTOUAJ? Maske Biblia amo kiijtoua keskipa mojmoliniskia tlali ipan itlamia tonali, kena kiijtoua “kampa ueli” tlauel chikauak mojmoliniskia tlali, uan yeka nopa tlauel pankisaskia ipan ni tonali (Marcos 13:8; Lucas 21:11).

¿TLAKE TIMOILJUIA? ¿Chikauak mojmolinia tlali kej Biblia kiijtok?

Maske sekij moiljuiaj kema chikauak mojmolinia tlali amo kiijtosneki tiitstokej ipan itlamia tonali, kena kinextia moaxitia se tlajtolpanextili. Ma tikitakaj seyok.

[Tlajtoli tlen pankisa]

“Tojuantij [geofísicos] tikijtouaj chikauak mojmolinia tlali uan maseualmej san kiitaj kej se tlamantli tlen tlauel amo kuali” (KEN HUDNUT, KATLI KIITAJ TLEN PANO IPAN TLALTIPAKTLI KATLI ITSTOKEJ IPAN ESTADOS UNIDOS).

[Katli iaxka tlaixkopinkayotl]

© William Daniels/Panos Pictures