1. Ditšhišinyego tša Lefase

“Go tla ba le ditšhišinyego tše dikgolo tša lefase.”—LUKA 21:11.

● Winnie, yo a nago le dikgwedi tše 16, o ntšhwa ka gare ga mokgobo wa nthogorogo kua Haiti. Sehlopha sa boraditaba tša thelebišeneng seo se bego se bega ka masetlapelo ao se ile sa kwa ge a tsetla. O phologa tšhišinyego ya lefase, eupša batswadi ba gagwe ga ba phologe.

DITHEREŠO DI BONTŠHA ENG? Ge tšhišinyego ya bogolo bja 7,0 e be e hlasela Haiti ka January 2010, go ile gwa hwa batho ba ka godimo ga ba 300 000. Batho ba bangwe ba dimilione tše 1,3 ba ile ba šala ba se na magae ka ponyo ya leihlo. Gaešita le ge e be e šiiša, tšhišinyego ya lefase ya kua Haiti ga se yona feela yeo e kilego ya ba gona. Go bile le bonyenyane ditšhišinyego tše 18 tše dikgolo tša lefase lefaseng ka bophara magareng ga April 2009 le April 2010.

KGANETŠO E TLWAELEGILEGO KE EFE? Ga go be le ditšhišinyego tše dintši tša lefase; re fo ba re di lemoga kudu go feta batho ba nakong e fetilego ka baka la thekinolotši ya mehleng yeno.

NA KGANETŠO YEO E A KWAGALA? Ela hloko therešo ye: Beibele ga e bolele kudu ka palo ya ditšhišinyego tša lefase tša mehleng ya bofelo. Lega go le bjalo, e bolela gore “ditšhišinyego tše dikgolo tša lefase” di tla ba gona “lefelong le lengwe ka morago ga le lengwe,” e lego seo se di dirago gore e be dilo tšeo di lemogegago kudu tša lebaka le le bohlokwa la nako historing.—Mareka 13:8; Luka 21:11.

O NAGANA’NG? Na re bona ditšhišinyego tše dikgolo tša lefase, bjalo ka ge Beibele e boletše e sa le pele?

Ditšhišinyego tša lefase di nnoši di ka no se bonale e le bohlatse bjo bo ka dirago gore go phethwe ka gore re phela mehleng ya bofelo. Lega go le bjalo, di fo ba di phethagatša boporofeta bjo tee. Ela hloko bja bobedi.

[Ntlhakgolo go letlakala 4]

“Rena [borathutamahlale ba thutafase] re di bitša ditšhišinyego tše dikgolo tša lefase. Batho ka moka ba re ke tše šoro.”—KEN HUDNUT, NYAKIŠIŠO YA UNITED STATES YA TŠA THUTASWIKA.

[Mothopo wa Seswantšho go letlakala 4]

© William Daniels/Panos Pictures