Eulo 1. Ovinimawe

“Makukaenda ovinimawe ovinene.”—LUCAS 21:11.

● Winnie, ankho una enima like no nohanyi ononkhuana, wayovolua momatunthu onondyuo mbahanyua mo Haiti. Etyi vo Televisau vakatala otyiponga otyo, veiva omona ulila. Omona wahupa kotyinimawe mahi ovohe vankhia.

OITYI TYIKAHI NOKUMONEKA? Otyinimawe otyinene tyaenda ko Haiti mu Kupupu yo 2010, tyaipaa ovanthu valamba po 300.000. Tupu, ovanthu vehika po 1,3 yonomiliau vakala tyihena onondyuo. Otyinimawe tyapita mo Haiti, namphila otyinene, kuaenda vali ovikuavo. Mohanyi ya Tyikukutu yo 2009 alo mu Tyikukutu yo 2010, mouye auho muapita ovinimawe 18 ovinene.

OITYI OVANTHU VAPOPIA? Mokonda younongo womouye hono, kakumoneka vali ovinimawe ovinyingi, onthue tualunguka vali tyipona ovanthu vokohale.

OKUTI ETYI OVANTHU VAPOPIA OTYILI? Tala otyili etyi: Ombimbiliya kaipopi ovinimawe viñgapi mavimoneka mokueenda kuononthiki mbahulililako. Mahi, ipopia okuti “kononthele mbumwe na mbumwe makukamoneka ovinimawe ovinene”, otyo tyilekesa onthele imwe onene yenyingilikilo lio nonthiki mbahulililako.—Marcos 13:8; Lucas 21:11.

OITYI OVE USOKA? Okuti tukahi nokumona ovinimawe ovinene, ngetyi Ombimbiliya yapopia?

Ovinimawe havioko vala vilekesa okuti tukahi kononthiki mbahulililako. Vilinga vala onthele imwe yeulu likahi nokufuiswapo. Tutalei eulo liavali.

[Onondaka Mbavilapo pefo 4]

“Onthue ova [geofísicos; vokulilongesa konthele yohi] tuviihana okuti ovinimawe ovinene. Tupu ovanthu aveho veviihana okuti ovivi unene.”​—KEN HUDNUT, SERVIÇO DE PESQUISA GEOLÓGICA DOS E.U.A.

[Olutalatu Lualandwa pefo 4]

© William Daniels/​Panos Pictures