1. Emitsitsa

Nihaija ‘kubaho emitsitsa y’amaan.’​—LUKA 21:11.

● Winnie, omwereere w’ameezi 16, nibamwiha omu bishenyagurika omuri Haiti. Ab’amakuru abaabaire nibagamba aha kihikiirizi eki bakahurira omwana ogwo naacura ataine maani. Akahonokaho aha mutsitsa ogu, kwonka abazaire be bakafa.

OBUHAME NIBWOREKA KI? Omutsitsa gw’amaani ku gwataire Haiti omu kw’Okubanza 2010, abantu abarikurenga omu 300,000 bakafa. Kandi abandi abarikurenga akakaikuru 1.3 bakaba batakiine buraaro. N’obu omutsitsa ogwo guraabe gwabaire guri ogw’amaani, eihanga rya Haiti tiryo ryonka erirateirwe omutsitsa. Hakabaho emitsitsa y’amaani nka 18 aha gati y’Okwakana 2009 n’Okwakana 2010.

ABANTU BAINGI NIBAKIRA KUGAMBA KI? Tiharikubaho emitsitsa mingi obunaku obu, kureka ahabw’entunguuka omu bwengye, nitubaasa kumanya emitsitsa ebaireho kukira ira.

EKI BARIKUGAMBA SHI KIHIKIRE? Teekateeka aha buhame obu: Baibuli terikugamba aha bwingi bw’emitsitsa omu biro by’emperu. Kureka neetworeka ngu nihaija kubaho ‘emitsitsa y’amaani’ omu “myanya mingi,” kandi ekirikutuhwera kumanya gye obwire obu turimu.​—Mako 13:8; Luka 21:11.

NOOTEEKATEEKA KI? Nitureeba harikubaho emitsitsa y’amaani ei Baibuli yaagambireho?

Emitsitsa yonka neebaasa kutatuha obuhame bwona oburikutuhamiza ngu turi omu biro by’emperu. Kwonka hariho obunabi obundi oburiyo nibuhikiirira. Yetegyereze obwa kabiri.

[Ebigambo ebitoorainwe]

“Itwe [abarikucondooza aha ku ensi ekozirwe] nitugyeta emitsitsa y’amaani. Abandi bo nibakeeta akagwe.”​—KEN HUDNUT, U.S. GEOLOGICAL SURVEY.

[Obukomooko bw’ekishushani]

© William Daniels/​Panos Pictures