Ngapezo 1. Azɛlɛkpusulɛ

“Azɛlɛkpusulɛ mgbole basisi.”—LUKU 21:11, NW.

● Wɔ Haiti, bɛhwenle Winnie mɔɔ ɛli ɛvolɛ ko siane nna la bɛvile sua bie mɔɔ ɛbubu ɛgua la abo. Menli mɔɔ bɔ nolo wɔ TV zo mɔɔ hɔle ɛleka mɔɔ esiane ne zile la dele kɛ ɔlɛkponle. Ɔnyianle ngoane noko azɛlɛkpusulɛ ne hunle ye awovolɛ.

DASELƐ BONI A WƆ ƐKƐ A? Mɔɔ azɛlɛkpusulɛ kpole bie zile wɔ Haiti wɔ January 2010 anu la, menli mɔɔ bo 300,000 wule. Mekɛ ko ne ala menli mgbe 1.3 awuke bɔle bɛ. Haiti azɛlɛkpusulɛ ne yɛ ɛzulolɛ ɛdeɛ, noko ɛnee tɛ yemɔ angome a yɛ ɛzulolɛ a. Ɔvi April 2009 kɔdwu April 2010, azɛlɛkpusulɛ mgbole 18 a zile wɔ ewiade amuala a.

DUZU A MENLI TA KA A? Tɛ kɛ azɛlɛkpusulɛ ne a ɛlɛso a; emomu, adwuleso ninyɛne mɔɔ bɛyɛ la ɛlɛmaa yɛadwenle azɛlɛkpusulɛ nwo dɔɔnwo yɛadɛla menli mɔɔ dɛnlanle aze wɔ tete ne la.

ASOO ƆLE NƆHALƐ? Suzu nɔhalɛ edwɛkɛ ɛhye anwo: Tɛ azɛlɛkpusulɛ dɔɔnwo mɔɔ basisi wɔ awieleɛ mekɛ ne anu la a Baebolo ne si zo a. Emomu, ɔka “azɛlɛkpusulɛ mgbole” mɔɔ ɔbara “ɛleka” ɛleka la anwo edwɛkɛ. Ɛhye maa yɛnwu kɛ ɔle mekɛ ɛhye mɔɔ yɛde nu la anwo sɛkɛlɛneɛ ne bie.—Maake 13:8; Luku 21:11, NW.

KƐ WƆ ADWENLE SE WƆ Ɛ? Asoo azɛlɛkpusulɛ mgbole ɛlɛsisi kɛmɔ Baebolo ne hanle dole ɛkɛ ne la ɔ?

Azɛlɛkpusulɛ angomekye ɛngile kɛ yɛde awieleɛ mekɛ nu. Noko ɔle ngapezo mɔɔ ɛlɛba nu la anu ko. Nea mɔɔ tɔ zo nwiɔ la.

[Edwɛkɛ mɔɔ bɛkpa wɔ mukelɛ 4]

“Abɔdeɛ nwo nrɛlɛbɛvoma fɛlɛ bɛ azɛlɛkpusulɛ mgbole. Menli mɔɔ ɛha la fɛlɛ bɛ esiane mɔɔ yɛ ɛzulolɛ.”—KEN HUDNUT, U.S. GEOLOGICAL SURVEY.

[Nvoninli Ɛvileka wɔ mukelɛ 4]

© William Daniels/Panos Pictures