Masaalo 1. Baattote Huxano

“Addi addi darga baatto huxidhanno.”—LUQAASI 21:11.

● Heyiti gobbara, Wiinii yinannita mittu dirinna shoolu agani qaaqqo kinnate duuno giddonni goshoonshe fushshinoonni. Kalaqantino dano daafira odoo gamba assitara martinori televizhiinete gaazeexanyooti, hatti qaaqqo kinnate giddo heedhe qaanqattanna macciishshitino. Tini qaaqqo baattote huxanonni gattinoha ikkirono, annisenna amase kayinni digatino.

TAJE MAA LEELLISHSHANNO? Arfaasa 2010nni Heyiti gobbara 7.0 ikkitannoti baattote huxano ikkiteenna 300,000 saꞌꞌanno manni reyino. Qoleno 1.3 miliyoone ikkanno manni anga iima miniweelo gatino. Heyiti gobbara ikkitinoti baattote huxano jawa ikkiturono, togooti baattote huxano ikkitinohu kayi hakkiicho calla diꞌꞌikkino. Alamete doyichora, Dotteessa 2009 kayise Dotteessa 2010 geeshsha ajayi ajeenna 18 jajjabba baattote huxano ikkitino.

DUUCHU MANNI KAYINNI MAYYAANNO? Yannankera tekinoolojete uduunni baatto huxidhino deerra albinni roore anfeemmo gede assino daafira ikkiina, baatto bashshonni roore dihuxidhino.

HATTO YAANSA GARAHO? Hanni tenne hedi: Qullaawu Maxaafi goofimarchu barruwara ikkitannota baattote huxano kiiro dikulanno. Hatteentenni, “addi addi darga jajjabba baattote huxano” ikkitannota kulanno; konni daafira, togooti baattote huxano heeꞌnoommohu goofimarchu yannara ikkinota leellishanno malaati widooti yaate.—Maarqoosi 13:8; Luqaasi 21:11, NW.

TENNERA ATI MAYYAATTO? Qullaawu Maxaafi jajjabba baattote huxano ikkitanno yiinori woꞌmanni nooha lawannohe?

Baattote huxano calla, heeꞌnoommohu goofimarchu barraati yine ammannanni gede assitanno taje lawa hooggara dandiitanno. Ikkirono, baattote huxano yannankera woꞌmitanni noo masaalo giddo mittetella. Hanni layinki masaalo laꞌno.

[Murre Haaꞌnoonni Hedo]

“Ninke [baattote daafira xiinxallineemmo sayinsooti] baatto huxidhanno woyite, jajjabba baattote huxanootilla yineemmo. Rooru manni kayinni bararraaqissanno danooti yaanno.”

KEENI HADNAT, AMEERIKUNNITA BAATTOTE XIINXALLO.

[Buicho]

© William Daniels/Panos Pictures