Kwaghôron u Profeti 1. Tar Ngu Tenger Sha Ajiir Kposo Kposo

KUHWA

Kwaghôron u Profeti 1. Tar Ngu Tenger Sha Ajiir Kposo Kposo

“Tar ua tenger tsung sha ajiir kpishi.”—LUKA 21:11.

Yange i dugh anwankwase u kuman inyom i môm man iwer inyiin shin alôgh ken tar u Haiti. Iti i anwankwase shon ér Winnie. Yange tar tenger ken Haiti, wua mbamaren nav, kpa un yô war. Mbanan abaver sha televishen sha kwagh shon ungwa lu vaan, kpa ikyenge na lu duen tsembelee ga.

TAR TENGER SHA AJIIR AGEN KPA? Ken uwer u Janawari, inyom u 2010 la, yange tar tenger tsung ken tar u Haiti, nahan kwagh ne wua ior hemba 300,000. Shi kwagh ne vihi ior uya je yô, iorov miliôn môm man dubu deri utar kera lu a ijiir i tsan ga. Kpa lu ken Haiti tseegh tar tenger tsung nahan ga. Hii ken uwer u Aipor, inyom i 2009 zan zan kôr ken uwer u Aipor, inyom 2010 la, yange tar tenger tsung sha ajiir kposo kposo sha tar, hemba ajiir 18.

KA NYI IOR KPISHI KA VE ÔR U NYIMAN IKYAV I KWAGH NE? Tar ngu hemban tenger hegen ga, sha ayange a tsuaa la kpa lu nahan; kpa ior mba tsuaa mbara faan ashighe man ajiir a tar ua tenger la kpishi er se fe hegen nahan ga, sha ci u ukômputa mba ve wasen se u fan kwagh ne hegen la, lu sha shighe ve la ga.

KWAGH U KA VE ÔR LA KA MIMI JE KPA? Kwagh u i doo u u fa yô: Bibilo ôr ikwa i tar ua tenger ken ayange a masejime ga. Kpa i kaa ér “Tar ua tenger tsung,” man a lu “sha ajiir kposo kposo.” Kwagh ne cii ka di kwagh môm tsô, ken akaa a vihin tsung agen a aa lu eren sha tar hen shighe u cieryol ne yô.—Marku 13:8; Luka 21:11.

U NENGE NENA? Tar ngu tenger tsung sha ajiir kposo kposo er Bibilo i ôr nahan, se mba nengen kpa?

Kwagh u tar u lu tenger sha ajiir wue wue la tseegh una fatyô u lun ikyav i tesen ér se mba ken ayange a masejime ga. Nahan kpa, kwagh ne cii ka kwaghôron u profeti môm tsô, a lu kuren sha mi ye. Nenge ase kwaghôron u profeti ugen ken ngeren u u a dondo ne.

[Mkaanem ma]

“Se [mbasainsi mba tôvon gbenda u tar u we shin inya zan zan i due sha kwavaôndo la] se nenge ser tar ngu tenger ainge sha utaha tsung. Ior kpishi nenge kwagh ne ér ka kwagh u cier iyol di tsô.”—Mkaanem ma orsainsi ugen ken MBASAINSI MBA GOMOTI U TAR U AMERICA MBA TÔVON AKAA A SHIN INYA, iti na ér KEN HUDNUT.

[Ape i zough a ufoto]