Kikite 1. Ngaahi Mofuike

“‘E ai ‘a e ngaahi fu‘u mofuike.”—LUKE 21:11.

● Ko e māhina 16 ko Winnie, ‘oku fusi hake ia mei he mapakipaki‘i piliki ‘i Haiti. Ko ha kau ngāue TV na‘a nau līpooti e fakatamakí ne nau fanongo atu ki he‘ene ki‘i to‘eto‘é. ‘Okú ne hao ‘i he mofuiké, ka ‘oku ‘ikai pehē ‘a ‘ene ongo mātu‘á.

KO E HĀ ‘OKU FAKAHAA‘I ‘I HE NGAAHI MO‘ONI‘I ME‘Á? ‘I he taimi na‘e taa‘i ai ‘e ha mofuike 7.0 ‘a hono mālohí ‘a Haiti ‘i Sanuali 2010, ko ha kakai laka hake he toko 300,000 na‘e mate aí. Tānaki atu ki ai ko ha toko 1.3 miliona na‘e mole leva honau ngaahi ‘apí. Neongo ‘a ‘ene mālohí, ko e mofuike ‘i Haití na‘e ‘ikai ko ha me‘a makehe ia. ‘Ikai si‘i hifo he mofuike lalahi ‘e 18 na‘e hoko ‘i māmani lahi ‘i he vaha‘a ‘o ‘Epeleli 2009 mo ‘Epeleli 2010.

KO E HĀ HA FAKAFEPAKI ANGA-MAHENI? ‘Oku ‘ikai ke tau hokosia ha mofuike lahi ange; koe‘uhi ko e tekinolosia fakaeonopōní, ‘oku tau lāu‘ilo lahi ange ai pē ki ai ‘o laka ange ia he kakai ‘i he kuohilí.

‘OKU ‘UHINGA LELEI ‘A E FAKAFEPAKI KO IÁ? Fakakaukau ki he mo‘oni‘i me‘a ko ení: ‘Oku ‘ikai fakamamafa‘i ‘e he Tohi Tapú ia ‘a e lahi ‘o e ngaahi mofuiké lolotonga ‘a e kuonga fakamuí. Kae kehe, ‘oku pehē ai “‘e ai ‘a e ngaahi fu‘u mofuike” ‘e hoko “‘i he ngaahi potu kehekehe,” ‘o ‘ai ai ia ko e taha ‘o e ngaahi tafa‘aki ‘iloa ‘o e vaha‘a taimi mahu‘inga ko eni ‘o e hisitōliá.—Maake 13:8; Luke 21:11.

KO E HĀ HO‘O FAKAKAUKAÚ? ‘Oku tau sio ki ha ngaahi fu‘u mofuike, ‘o hangē tofu pē ko ia na‘e tomu‘a tala ‘e he Tohi Tapú?

‘Oku ‘ikai nai hā ngali ko e ngaahi mofuiké pē ‘a e fakamo‘oni aofangatuku ‘oku tau mo‘ui ‘i he kuonga fakamuí. Neongo ia, ko e kikite pē ia ‘e taha ‘a ia ‘oku fakahokó. Vakai angé ki hano ua.

[Fakamatala ‘i he peesi 4]

“Ko kimautolu [kau ako sioloki fakafīsikí] ‘oku mau ui ia ko e ngaahi fu‘u mofuike. Ko e fa‘ahinga kehé kotoa ‘oku nau ui ia ko e me‘a fakalilifu.”—KEN HUDNUT, SAVEA FAKASIOLOKI U.S.

[Credit Line ki he Fakatātā ‘i he peesi 4]

© William Daniels/Panos Pictures