1. Etọ re Bẹrẹ
1. Etọ re Bẹrẹ
“Otọ che mu kpogho.”—LUK 21:11.
● E sivwin Winnie rọhẹ emeranvwe 16 vwo nẹ otọ rẹ iwevwin ri kporon she teyọn vwẹ Haiti. Ihwo re niyẹnrẹn kpahen oghwọrọ na tare nẹ ayen nyori ro vwo kperẹ ghẹnrẹghẹnrẹ. O sivwinrhọ, ẹkẹvuọvo ọsẹ vẹ oni rọyen ghwuru.
DIE YEN IYẸNRẸN NA DJEPHIA? Vwẹ January 2010, ọke otọ vwọ bẹre vwẹ Haiti rọ gan te ovwanvwe 7.0, ihwo re vrẹ 300,000 yen ghwuru. Ọ da rha guọghọ iwevwin rẹ ihwo ri te oduduru 1.3 ugege yena. Dede nẹ otọ rọ bẹre vwẹ Haiti na ganre mamọ, jẹ ọ dia Haiti ọvo yen otọ da bẹre-e. Etọ re bẹre vwẹ akpọeje vwẹ uvwre rẹ April 2009 fiẹ April 2010, e da hanvwe mamọ 18.
DIE YEN IHWO TA? Ọ dianẹ etọ re bẹrẹ na buẹnphiyọ fikirẹ ena kpokpọ ihwo ruẹ-ẹ, ẹkẹvuọvo avwanre di vwo oniso rayen enẹna vrẹ obo ri jovwo.
OBO RẸ AYEN TA NA UYOTA? Roro kpahen uyota nana: Baibol ghwa vuẹ avwanre kpahen uchunu rẹ etọ re cha bẹre vwẹ ẹdẹ re koba na-a. Ẹkẹvuọvo, ọ tare nẹ, “otọ che mu kpogho” vwẹ “asan buebu” rọ nẹrhe ọnana rhe dia oka ọvo ra sa jokaphiyọ vwẹ ikuegbe rẹ ihworakpọ vwẹ ọke nana.—Mak 13:8; Luk 21:11.
DIE WO RORI? Avwanre mrẹ etọ re bẹrẹ nonẹna kirobo rẹ Baibol na tarọ phiyotọ jovwo?
Etọ re bẹrẹ ọvo cha ghwa sa kẹ avwanre imuẹro nẹ ẹdẹ re koba na yen avwanre de yerẹn re na-a. Ẹkẹvuọvọ, ọnana ọvo usun rẹ orugba rẹ aroẹmrẹ ri Baibol na. E jẹ a ta ota kpahen aroẹmrẹ rivẹ.
[Ẹkpo rọ teyenphia vwẹ aruọbe 4]
“Avwanre Ihwo ri yono kpahen otọ na [geophysicists] sere etọ re bẹrẹ. Ihwo efa ki rhe se ukpokpogho.”—KEN HUDNUT, U.S. GEOLOGICAL SURVEY.
[Asan rẹ Ifoto Nurhe rọhẹ aruọbe 4]
© William Daniels/Panos Pictures