Eprofesia 1. Itetere

“Sinookhumelela itetere suulupale”.—LUKA 21:11.

● Winnie, yoowo orina mwakha mmosa ni myeeri mixexe, aahoopoliwa okathi wa etetere waHaiti. Maxornalista a TV ahimmye wira yaanimwiiwa okathi inla awe vanceene. Owo ahoopowa, masi anamuyari awe yaahikhwa.

ITTHU SINCEENE SINOONIHERYA EXEENI? Etetere ya magnitude 7.0 yaahiphiya waHaiti, Janero a 2010, nto yaahikhwa atthu yaavikana 300.000. Nave-tho, moohipisa atthu imilyau 1.3 khiyaarina ipa. Nnaamwi etetere ele ya waHaiti yaahononne itthu sinceene, khahiyo etetere yoopacerya nnakhala yookiserya. Olumwenku wotheene sookhumelela itetere 18 suulupale okhuma Abril a 2009 mpakha Abril a 2010.

ATTHU AKINA ANIHIMYA EXEENI? Khahiyo wira itetere sinimuncerereya, hiyo ninniiwa wira sookhumelela itetere sinceene mwaha wa etekonologia. Nto atthu a mahiku ala annaakuva wiiwa ihapari iyo waavikana atthu a khalai.

NIIREKE ITTHU IYO ANIHIMYA AYA TI SEKEEKHAI? Nkahaya muupuwele ela: Biibiliya khonittittimiherya nummuru na itetere sinikhumelela mahiku ookiserya. Masi onihimya wira “sinookhumelela itetere suulupale, . . . mapuro oovirikana”, seiyo saarowa wooniherya wira nikhala mahiku ooxankiha a sowiiraneya sa apinaatamu.​—Marko 13:8; Luka 21:11.

NYUWO MUNOONELA SAI? Niireke sinnikhumela itetere sinceene, ntoko Biibiliya aahimmye awe vahinatthi?

Atthu akina pooti ohimya wira, khivanreerela ohimya wira nikhala mahiku okiserya mwaha wookhumelelaka itetere paahi. Masi musuweleke wira itetere siniirela mpantta iprofesia sikina siniiraneya olelo-va. Nwehe etthu ya nenli.

[Eponto yuulupale epaaxina 4]

“Hiyo [ninsoma makhalelo a elapo] ninhimya wira iyo itetere suulupale. Atthu akina anihimya wira ti sootakhala”.—KEN HUDNUT, CENTRO DE PESQUISA GEOLÓGICA DOS EUA.

[Masu a Elatarato ya Epaaxina 4]

© William Daniels/Ifootu ni Ilatarato