Tagna 1. Mga Linog

“Magkakaada magkusog nga mga linog.”​—LUCAS 21:11.

● Hi Winnie, nga 1 1/2 ka tuig an edad, ginkuha tikang ha mga kagubaan ha Haiti. Usa nga TV crew nga nagrireport mahitungod han kalamidad an nakabati han iya mahinay nga tuok. Nakatalwas hiya ha linog, pero an iya mga kag-anak waray.

ANO AN IGINPAPAKITA HAN MGA REPORT? Han nagkaada linog nga 7.0 an kakusog ha Haiti han Enero 2010, sobra 300,000 nga tawo an namatay. Ngan may-ada 1.3 ka milyon nga tigda nga nawarayan hin balay. Bisan kon makusog gud ito nga linog ha Haiti, usa la ito han diri maminos 18 nga magkusog nga linog nga nahitabo ha bug-os nga kalibotan butnga han Abril 2009 ngan Abril 2010.

ANO AN KOMON NGA PAGRIWA? Diri karuyag sidngon nga nagdamu an linog yana; mas nababantayan la naton ito kay han una tungod han moderno nga teknolohiya.

MAKATADUNGANON BA ITO NGA PAGRIWA? Hunahunaa ini: Diri ginpapabug-atan han Biblia an kadamu han mga linog ha kataposan nga mga adlaw. Nagsiring la ito nga magkakaada “magkusog nga mga linog” “ha iba-iba nga mga lugar,” usa nga matin-aw nga bahin han tigaman hinin importante nga panahon han kasaysayan.​—Marcos 13:8; Lucas 21:11.

ANO HA IMO PAGHUNAHUNA? Nakakaeksperyensya ba kita hin magkusog nga mga linog, sugad han igintagna han Biblia?

Diri la mga linog an nagpapamatuod nga nagkikinabuhi na kita ha kataposan nga mga adlaw. Kitaa an ikaduha nga tagna nga natutuman yana.

[Blurb]

“Gintatawag namon [mga geophysicist] ito nga magkusog nga linog. Pero gintatawag ito han iba pa nga tawo nga makangingirhat.”​—KEN HUDNUT, U.S. GEOLOGICAL SURVEY.

[Ginkuhaan han Retrato]

© William Daniels/Panos Pictures