1. Yisichinya

“Tikuchiŵa kwana yisichinya.”​—LUKA 21:11.

● Winnie, mwanache jwa chaka chimo ni myesi mcheche jamgwilile nyumba ligongo lya chisichinya chachatendekwe ku Haiti, nambo mwaupile jwakulupwiche. Atolangani wawutuchile ku malo kwakwatendekwe chisichinyaku niŵampikene Winnie ali mkulila panandipanandi. Mwanacheju jwakulupwiche pa chisichinyachi, nambo achinangolo ŵakwe ŵawile.

ANA MAUMBONI GAKULOSYA YAMTULI? Mu Januwale 2010 ku Haiti kwatendekwe chisichinya chamachili gakwana 7.0. Pandaŵiji ŵandu ŵakupunda 300,000 ŵawile. Konjechesya pelepa, ŵandu 1.3 miliyoni nganakola malo gakutama kwakandawi nditu. Atamose kuti ku Haiti kwatendekwe chisichinya chamachilichi nambo panasoni madela gane gagakusatendekwa yisichinya yamachili mnope. Mwachisyasyo, yisichinya yakwana 18 yatendekwe pachilambopa kutandila mu Epulo 2009 mpaka Epulo 2010.

ANA ŴAKUSISYA AKUSASALA YAMTULI? Masiku agano, ngatukusimana ni yisichinya yejinji ligongo yipangiso yamakono yikusatukamuchisya kumanyilila yakwamba yisichinya kulekangana ni mwayaŵelele kala.

ANA YAKUSALA ŴAKUSISYAŴA YILI YISYENE? Aganichisye ayi: Baibulo jangasala ya winji wa yisichinya yayichitendekwa m’masiku gambesi. Nambope jikusasala kuti “yisichinya” yamachili yichitendekwa “ku malo gakulekanganalekangana.” Yeleyi yikutendekasya kuti yisichinya yiŵe chimo mwa yindu yakumanyika yayiŵele mkutendekwa mu ndaŵi jambesi jino.​—Maliko 13:8; Luka 21:11.

WAWOJO AKUGANISYA WULI? Ana tukuyiwona yisichinya yamachili yili mkutendekwa mpela mwajasalilile kala Baibulo?

Yisichinya pajika nganiyiŵa umboni wakwanila wakulosya kuti tukutama m’masiku gambesi. Nambope, chili chimo mwa yakulochesya yayikukwanilichikwa. Kwende tukambilane ya chakulochesya chaŵili.

[Maloŵe Gagombelechesya pa peji 4]

“M’weji [ŵasayansi] tukusati yisichinya yamachili. Nambo ŵandu akusati ngosi syakogoya mnope syachilengedwe.”​—KEN HUDNUT, JWAKUWUNGUNYA YA MAGANGA SONI LITAKA KU UNATED STATES (GEOLOGICAL SURVEY).

[Picture Credit Line on page 4

© William Daniels/Panos Pictures