Kiraya kuma 2nan. Kɔngɔ

“Kɔngɔbaw na kɛ.”—MARKA 13:8.

● Cɛ dɔ bolila kɔngɔ ɲɛ ka taga Niger dugu misɛnin dɔ la min bɛ wele ko Quaratadji. O cɛ balimakɛw ni a balimamusow fana ye u ka dugu bila walasa ka boli kɔngɔ ɲɛ. Sisan, o cɛ filɛ dɛbɛn kan, a kelen dalen don. Mun na? “Ikomi a dɛsɛlen bɛ ka a ka denbaya balo, a maloyalen don ka u filɛ,” Sidi y’o fɔ o min ye o yɔrɔ dugutigi ye.

KO KƐLENW BƐ MUN JIRA? Ni i ye mɔgɔ 7 ta diɲɛ kɔnɔ, olu cɛla i bɛ ta’a sɔrɔ mɔgɔ 1 tɛ dumuni kɛ ka fa don o don. Ni i taara farafinna sahara worodugu yan fan fɛ, olu ta ka jugu kosɛbɛ bawo ni i ye mɔgɔ 3 ta, i bɛ ta’a sɔrɔ kɔngɔ bɛ mɔgɔ 1 na tuma bɛɛ. Walasa ka o kuma faamu ka ɲɛ, e ka miiri denbaya dɔ la mɔgɔ 3 bɛ min kɔnɔ: fa, ba ani den. Ni u ye dumuni sɔrɔ min bɛ bɛn mɔgɔ 2 dɔrɔn ma, jɔni de bɛna jɛ o don dumuni kɔ? Fa, ba walima den? O de ye denbaya dɔw haminanko ye don o don.

SƆSƆLI KUMA JUMƐN BƐ FƆ O KO LA? Dugukolo bɛ fɛn caman di minnu bɛ se ka bɛɛ ladumuni ka ɲɛ ni u tilatila la koɲuman.

YALA O SƆSƆLI KUMA IN BƐNNEN DON WA? Tiɲɛ don ko sisan, sɛnɛkɛlaw bɛ se ka balo caman sɛnɛ ani ka a lase mɔgɔw ma yɔrɔ caman na nɔgɔya la ka tɛmɛn fɔlɔ kan. O la, hadamaden gofɛrɛnɛmanw ka kan ka se ka dumuni lase bɛɛ ma diɲɛ bɛɛ kɔnɔ walasa ka kɔngɔ kɛlɛ. Hali u ka san tan caman cɛsiribaw kɛlen kɔfɛ, halisa u dɛsɛlen don ka kɔngɔ kɛlɛ.

I HAKILINA YE MUN YE? Yala Marka 13:8 tɛ ka waleya wa? Hali ni ɲɛtaaw kɛra sira dɔw fɛ, yala kɔngɔ tɛ ka mɔgɔw sɛgɛn diɲɛ fan bɛɛ la wa?

Dugukolo yɛrɛyɛrɛw ni kɔngɔ bɛ na ni gɛlɛya dɔw ye. O gɛlɛya ninnu fana bɛ bɔ fɛn sabanan dɔ la min bɛ laban donw taamashyɛn jira.

[Sɛbɛnni min bɛ ntiiri fila kɔnɔ]

“Ni i ye dɛnmisɛnnin saba ta minnu sara ka a sababu kɛ ninakili bana dɔ ye min bɛ wele ko pneumonie, walima k’a sababu kɛ kɔnɔboli walima bana wɛrɛw ye, i bɛ ta’a sɔrɔ kelen tun bɛ se ka balo ni a tun ladumuni na ka ɲɛ.”—ANN M. VENEMAN, O YE FONDS DES NATIONS UNIES DIRECTRICE KƆRƆ YE KA ƝƐSIN DENMISƐNNINW MA

[Foto tigiw]

© Paul Lowe/Panos Pictures