Profecía 2. Mrö nika

“Ni kwati rabadi mrö nike krübäte” (MARCOS 13:8).

● Ni iti ngitiani kä kädekata Quaratadji (Níger) yekänti mrö nika köböite. Etenbatre, ngwaitre aune etebakrätre kwe ngitiani arato kä yekänti. Ni ye nämäne kaibe se kwrere tibien. ¿Ñobätä? Sidi, ni ji ngwanka kä yekänti tä mike gare krörö: “Ñobätä ñan aune mrö ñaka kwe mräkä bukara aune ñan tö mrä kwe tuai mrö nike ja okwäbiti”.

¿KUKWE NAKANINANKA TÄ DRE MIKE GARE? Kä jökräbiti tibien mrö ñaka krubäte kwetakäre köbö kwatire kwatire nitre kwati ie. Akwa África subsahariana yete, nitre bäri kwati tä mrö nike tare. Ñodre, ani töbike ni rüne iti, muko kwe aune ngobo kwe yebätä. Mrö tädre siä kukube. ¿Nirekwe mrö nikadre? ¿Ni rüne o ni meyere? Kukwe yebe nitre ja mräkäre kwati tä ja tuin mantre jetebe.

KUKWE NIETA BIBLIA RÜERE. Jondron nökata käbiti tibien yebiti ni jire jökrä buka raba, akwa mrö ñan döräita ja erebe yebätä nitre ruäre tä nemen mrö nike.

¿KUKWE NIETA YE METRE? Kä nengwane nura nökata aune mrä döräita bäri yebrä metre. Gobrantre rabadre ja di ngwen ne kwe mrö rabadre ni jökrä kräke. Ja di ngwanina kwetre, akwa ñan nemen bare ietre.

¿KUKWE NE TUIN ÑO MÄI? ¿Kukwe nieta Marcos 13:8 ye metre mä kräke? Tecnología krubäte nengwane, ¿akwa nitre täbe mrö nike ruin mäi?

Dobo kri aune mrö nika köböite kukwe mada tä nakainkä abokän tä nitre ngwen ja tare nike. Kukwe ye rabai bare kä krüte näire Biblia tä mike gare arato.

[Kukwe mikata gare braibe]

“Monsotre kwati tä nemen bren neumonía, grie aune bren mada kisete ye raba nementa räre, akwa nämänentre mrö nike yebätä kä ñan nükani ietre”. (ANN M. VENEMAN, EX DIRECTORA EJECUTIVA DE UNICEF)

[Üai kite nirekri]

© Paul Lowe/Panos Pictures