2. Tiggulutom

“May kakulang sa kalan-on.”—MARCOS 13:8.

● Ang isa ka tawo nagdangop sa isa ka lugar sa Quaratadji, Niger. Ang iya mga pakaisa kag mga manghod naghalin man sa naligwin nga lugar sang ila pungsod bangod sa gutom. Ini nga tawo nagahigda sing isahanon sa banig nga nahumlad sa duta. Ngaa isahanon lang sia? “Indi niya mapakaon [ang iya pamilya] kag indi niya mabatas nga makita ang ila kahimtangan,” siling ni Sidi, nga pangulo sang lugar.

ANO ANG GINAPAKITA SANG MGA REPORT? Sa bilog nga kalibutan, mga 1 sa 7 ka tawo ang wala sing bastante nga pagkaon kada adlaw. Mas grabe pa gid sa isa ka lugar sa Aprika, diin 1 sa 3 ang wala sing bastante nga makaon. Halimbawa, hunahunaa ang isa ka pamilya nga may amay, iloy, kag isa ka bata. Kon ang ila pagkaon igo lang sa duha, pakaunon anay sang ginikanan ang ila bata. Dayon, sin-o ang magutuman? Ang amay ukon ang iloy? Amo ini ang problema nga ginaatubang sini nga mga pamilya kada adlaw.

ANO ANG PILA KA PAGPATI? Ang duta nagapatubas sang bastante katama nga pagkaon para sa tanan. Kinahanglan lang nga atipanon sing maayo ang manggad sang duta.

HUSTO BALA INA NGA PAGPATI? Indi pareho sang una, ang mga mangunguma subong makapatubas kag makapadala sing mas madamo nga pagkaon. Dapat kuntani atipanon sing maayo sang gobierno ang mga patubas sang duta para masolusyunan ang gutom. Pero bisan dinekada na nila ini nga gintinguhaan, wala nila ini masolbar.

ANO SA BANTA MO? Nagakatuman bala ang Marcos 13:8? Bisan pa nag-uswag na ang teknolohiya, ginakulang bala gihapon sing pagkaon ang mga tawo sa bilog nga kalibutan?

Ang mga linog kag tiggulutom masami nga ginasundan sang iban pa nga problema nga tanda sang katapusan nga mga adlaw.

[Blurb sa pahina 5]

“Sobra sa 30 porsiento sang mga kabataan nga nagakapatay bangod sa pulmonya, lupot, kag iban pa nga balatian ang nag-ayo kuntani kon bastante sila sa nutrisyon.”—ANN M. VENEMAN, ANAY EXECUTIVE DIRECTOR SANG UN CHILDREN’S FUND.

[Picture Credit Line sa pahina 5]

© Paul Lowe/Panos Pictures