Kikanenu 2. Nzala
Kikanenu 2. Nzala
‘Kua ka kala nzala mu ixi.’—MARKU 13:8.
● Diiala u lengela ku sanzala ia Quaratadji mu ixi ia Niger. O jindandu ja diiala didi, a mu sange, akexile mu lenga o nzala mu sanzala iâ. O diiala didi, ua zale dixisa phala ku kala ubheka ué. Mukonda diahi? Sidi, sobha ia sanzala, uambe: “Muéne ka tenene ku dikila [o muiji uê] né ku tala ngó ku pholo iâ.”
IHI ILONDEKESA O IZULUKUTU ÍII? Ku mundu uoso, mu 7 dia athu, muthu 1 u bhita kizuua kia muvimba sé kudia. Mu África subsariana, o nzala iene mu dibandekesa dingi, muthu 1 mu 3 kia athu, u kala sé kudia. Xinganeka ngó muiji, mama, tata, ni kabuetele kâ. Se bhu kala ngó kudia phala ene kiiadi, nanhi u xala se kudia? O tata? o mama? anga o kabuetele? Kiki kiene mu bhita ku miji iavulu izuua ioso.
IHI IZUELA O ATHU? O ixi iene mu bhana kudia kuavulu ku athu oso mu ngongo. O jimbongo ja ixi a tokala ngó ku ji uana kiambote.
O KUILA O ATHU A MU ZUELA O KIDI? Mu kidi o adimakaji a tena ku kuna ni ku bhongolola kudia kuavulu. O jinguvulu a tokala ku uana kiambote o kudia ku bhana o ixi, phala ku zubha o nzala. Maji né muene mu ku bhanga kiki tundé ukulu, ene kene mu tena ku zubha o nzala.
IHI I U BANZA? O kuila o divulu dia Marku 13:8, dia mu dikumbidila? Sumbala ni ima ia bhanga dingi o jingijiie, o kuila o nzala ki iene mu tula ku mundu uoso?
O itungutu ia ixi ni nzala, iene mu bheka maka a mukuá a bhanga mbandu ku kijimbuete kia mukuá kia izuua isukidila-ku.
[Kilombuelelu ku bandu 5]
“Ana avulu ene mufuá ni uhaxi ua izavu, ni kabhualala, ni mauhaxi a mukuá, a-nda kuíza se ka a dikila kiambote.”ANN M. VENEMAN, FORMER EXECUTIVE DIRECTOR OF THE UN CHILDREN’S FUND.
[Muxinda ua tokala ku foto ku bandu 5]
© Paul Lowe/Panos Pictures
