Uporofete 2. Erumbu

“Ngapa kara marumbu.”—MATEUSA 24:7.

● Mugara kwa wiza momukunda gwaQuaratadji, mosirongo saNiger, nehuguvaro lyokuyagwana ko nondya. Vamwe vekoro lyendi nawo kwa wizire mokutjwayuka nzara. Nye mugara kuna rara gelike perwara. Morwasinke? Sidi foromani gomomukunda kwa tanta asi: “Kapi ana hara kupaukira epata lyendi morwa kapi ana kuvhura kulirera.”

YISINKE AGA LIKIDA MAUMBANGI? Mouzuni mudima, movantu 7, gumwe kapi a gwana nondya dokugwanena po nkenye ezuva. Nye ukaro wangoso kwa ligwederera unene moAfrika. Vantu wovanzi kurara nonzara. Gazadara ko kepata omu mwa kara guhya nazinya nomunwa. Nsene pana kara tupu nondya dokulya vantu vavali, vakurona ngava sigira munona a lye a kute, makura yilye ogu na dira kulya? Guhya ndi zinya? Eli kuna kara etokoro eli ga hepa kutura po mapata gangoso nkenye ezuva.

EPATANESO MUSINKE LYA KARA PO? Evhu kugava nondya dokugwanena po. Va hepa tupu kuyigendesa nawa yipo vantu navenye va gwane nondya.

EPATANESO OLYO USILI NDI? Yosili, vanandima kuvhura va zangure nokutuma nondja dononzi kupitakana pwanare. Mapangero govantu ngano kuyigendesa nawa yipo va kohonone po udigu wonzara. Awo va hetekera ko nomvhura dononzi nye kapi ya va tompoka.

OVE YISINKE ONO KUGAZARA KO? Mateusa 24:7 kuna kusikilira mo ndi? Nampili ngomu yikwakonentu yina vhuka, erumbu kuna kukundama vantu uzuni mudima ndi?

Makankamo gevhu nerumbu rorunzi kutwaredesa komaudigu gamwe hena gosidiviso sopomazuva gopouhura.

[Nonkango depepenuno 5]

“Sinzi sovanona wokuvera kokapunga ndi ezimo lyokupwaga-pwaga ndi mauvera gapeke kufa morwa kudira kugwana nondya dokugwanena po.”—ANN M. VENEMAN, MUGENDESI GWANARE GOYIMALIWAPUNGURWA YOVANONA MOAMERIKA.

[Ntundiliro zefano lyepepenuno 5]

© Paul Lowe/Panos Pictures