2. Bipupo bya Nzala

“Bipupo bya nzala nabyo bibafikanga.”—MAKO 13:8.

● Muntu umo wanyemena mu kibundi kya Quaratadji, mu Nijer. Banababo ba ku ba inandi, bana-balume ne bana-bakaji, nabo badi banyeme nzala kunja. Uno muntu kalēle witolwele pa mukeka. Mwanda waka wetolola? Sidi, mulopwe wa mu kibundi’mwa unena’mba: “Kabwanyapo kudisha [kisaka kyandi] ne bibamukwata bulanda pa kwibatala.”

I BIKA BINE BILONGEKA? Kujokoloka ntanda yonso muntu umo pa basamba-babidi ukomenwanga kusokola bidibwa bibwane difuku ne difuku. Kibalwa kibabipila’ko mu Afrika wa kunshi kwa dilungu dya Sahara, ako muntu umo pa basatu udi mu nzala ya nyeke. Pa kwimvwanija’kyo, fwatakanya kisaka kibundilwe na tata, mama, ne mwana mutyetye. Shi kudi’nka bidibwa bityetye bya bantu babidi kete, le i ani kasapo kudya? Le i tata, le i mama’ni nansha i mwana mutyetye? Buno i butongi bufwaninwe kutonga bisaka difuku ne difuku.

BAVULE BANENA’PO NAMANI? Ntanda ilupulanga bidibwa bivule kutabuka ne pa bibwanya kudya muntu ne muntu. Bilupula ntanda’ko byo bifwaninwe kwingidijibwa senene.

LE BINO BYOBANENA I BYA BINE? Eyo, babidimye babwanya pano kulupula ne kusela bidibwa bivule kutabuka mu mānga. Mungya milangwe, maludiki a bantu adi afwaninwe kwingidija senene bidibwa bilupula ntanda mwa kupwijija makambakano a nzala. Inoko, pano ke myaka mivule yapita’po yobakankelwe kupwija uno mwanda.

LE ULANGA’PO NAMANI? Le Mako 13:8 ufikidilanga? Nansha byaendelela sianse, le ulanga nzala ibaleka kukambija bantu ntanda yonso?

Divule, kutenkana kwa ntanda ne bipupo bya mbá biletanga makambakano alombola kipindi kikwabo kya mu kiyukeno kya mafuku a mfulo.

[Bushintuludi pa paje 5]

“Mwana umo pa basatu ufwanga na kikofolo, munda kupita, ne misongo mikwabo yadi ikokeja kwepukwa shi bantu badi badya biyampe.”—ANN M. VENEMAN, WADI NTANGIDIJI WA KITANGO KYA BUMO BWA MIZO KITALA LUPETO LWA KUKWASHA BANA.

[Kutambile Kifwatulo pa paje 5]

© Paul Lowe/Panos Pictures